Македонија
Муцунски – Дуџијак: Поздравена континуираната поддршка од ОН за севкупниот напредок на нашата земја
![](https://makfax.com.mk/wp-content/uploads/2024/07/Mucunski_Dudziak2.jpeg)
Министерот за надворешни работи и надворешна трговија, Тимчо Муцунски, денеска ja прими постојаната координаторка на ОН во земјата, Росана Дуџијак.
На средбата стана збор за рамката за соработка за одржлив развој 2021 – 2025, при што беше нагласено дека нејзината имплементација ќе придонесе и за целосна реализација на целите за одржлив развој до 2030, на што земјава е во целост посветена.
Министерот се заблагодари на досегашната поддршка на Канцеларијата на резидентниот координатор на ОН во земјата во исполнувањето на нашите национални приоритети нагласувајќи ја посветеноста на новата Влада на реформските процеси и понатамошниот демократски развој.
Дополнително, беше поздравена континуираната поддршка од ОН за севкупниот напредок на нашата земја преку разни проекти и активности нагласувајќи дека тие им помагаат и на нашите клучни процеси, како што е процесот на пристапување во ЕУ.
Воедно, стана збор и за нашето учество на Генералното собрание на ОН, што ќе се одржи во септември оваа година, како и за календарот на активности во претстојните месеци.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Скопје
Целосно реконструиран вториот дел од улицата Козле 3 во Нерези
![](https://makfax.com.mk/wp-content/uploads/2024/07/Kozle-3-2jpg.jpg)
Денеска, се реализира завршната фаза од целосната реконструкција на вториот дел од улицата Козле 3 во урбаната заедница Нерези. Оваа сообраќајница е во должина од 300 квадратни метри, а од буџетот на Општина Карпош издвоени се 3.311.670,12 денари. Изведувач на градежните работи е Друштвото за градежништво, трговија и услуги, „Гама градба“ ДООЕЛ Скопје, извести Општина Карпош.
Во изминатиот период локалната самоуправа издвои финансиски средства за асфалтирање и обновување неколку краци од улици, како и поголеми сообраќајници, со цел граѓаните на Карпош да се движат по безбедни и реконструирани улици, додаваат од Општина Карпош.
Македонија
Средба на претседателот Гаши со шпанскиот амбасадор Гарсија
![](https://makfax.com.mk/wp-content/uploads/2024/07/gashi-garsija3.jpg)
Претседателот на Собранието, Африм Гаши, оствари средба со шпанскиот амбасадор, Хосе Луис Лозано Гарсија.
Притоа изрази задоволство од посетата и подршката што нашата земја ја добива од Кралството Шпанија во процесот на евроинтеграција.
Континуираното формирање пратеничка група за соработка со парламентот на Кралството Шпанија придонесува во развивањето на севкупните односи помеѓу нашите две земји.
Исто така, Гаши искажа благодарност за програмата на стручна обука за службеници на нашето Собрание во парламентот на Шпанија, што се организира секоја година. Во овој контекст соговорниците беа согласни дека соработката треба да се прошири и со заемни посети на парламентарни делегации, со што ќе се пренесат шпанските искуства кај нашите пратеници, но и на највисоко ниво – на претседатели на парламенти.
Шпанскиот амбасадор честита за демократските избори и посака успешен мандат на функцијата претседател на законодавниот дом. Недвосмислено ја изрази својата заложба и шпанската поддршка за нашата, пријателска и партнерска земја, во кој било сегмент.
Македонија
Средба Муцунски – Лосон: Во фокусот на разговорите сојузништвото во рамките на НАТО
![](https://makfax.com.mk/wp-content/uploads/2024/07/1-1-1.jpeg)
Министерот за надворешни работи и надворешна трговија, Тимчо Муцунски, денес се сретна со амбасадорот на Обединетото Кралство, Метју Лосон.
Како што извести МНР, на средбата било истакнато заемното задоволство од развојот на одличните билатерални односи, кои двете пријателски земји во континуитет ги негуваат во изминатиот тридецениски период. Притоа беше искажана и подготвеност за натамошното унапредување на меѓусебното пријателство и долгогодишната соработка во периодот што следува.
Во фокусот на разговорите беше сојузништвото во рамките на НАТО, при што беше истакната потребата за продолжување на блиската соработка на двете земји во рамките на алијансата, особено во контекст на претстојниот самит на НАТО во Вашингтон. Како сојузници двете земји континуирано и со заемни заложби активно придонесуваат во правец на зачувување на глобалниот мир и трансатлантската стабилност имајќи ги предвид актуелните безбедносни предизвици, соопшти МНР.
Министерот Муцунски се осврна и на тековниот британски проект за јакнење на капацитетите на Директоратот за НАТО, при што изрази благодарност за поддршката, која придонесува за уште поефикасно остварување на нашата политичка и координативна улога за разни прашања врзани со членството во алијансата.
Како најголем трговски партнер на ОК во регионот и воедно втор најголем странски директен инвеститор за нашата земја соговорниците ги потврдија силните економски и трговски односи меѓу двете земји и го нагласија интересот за нивно натамошно зајакнување.
На средбата стана збор и за нашиот евроинтегративен процес, посветеноста на реформите и севкупниот општествено-политички и демократски развој на земјата, се додава во соопштението на МНР.