Градоначалникот на општина Аеродром, Тимчо Муцунски, на прес-конференција ги објави деталите за проектот „Смарт Аеродром“, кој, како што најави, ќе биде визионерски потфат што ќе ја искористи моќта на технологијата за да создаде поповрзана, одржлива и помодерна општина. Тој најави дека веднаш откога Советот на Општина Аеродром ќе донесе одлука, преку јавен повик за избор на партнер, ќе биде воспоставено јавно-приватно партнерство, со кое ќе се реализира овој проект. На јавниот повик ќе може да аплицираат сите заинтересирани компании што ги исполнуваат дадените услови.

„Проектот ‘Смарт Аеродром’ претставува сеопфатен напор за интегрирање на напредните технологии во нашата општина во насока на подобрување на разните аспекти на секојдневното живеење. ‘Смарт Аеродром’ е проект кој е важен технолошки исчекор напред, проект во чии рамки се пресретнуваат технологија и одржливоста, а се реализира за првпат во Македонија, токму во општината Аеродром“, рече тој.

Зборувајќи за придобивките од проектот, Муцунски на денешната прес-конференција потенцира дека станува збор за проект кој сериозно ќе го смени ликот на средината, ќе влијае на зголемување на безбедноста и сигурноста, ќе придонесе за ефикасна потрошувачка и заштеда на средства, ќе овозможи олеснет пристап до информации, ќе имплементира одржливи транспортни решенија и ќе придонесе на подобрување на економскиот раст и иновативноста на локално ниво.

Физибилити-студијата предвидува компанијата што ќе биде избрана како партнер на Општина Аеродром да има обврска да имплементира смарт (штедливо) осветление на територијата на целата општина, што сериозно ќе влијае на заштедата на средства за електрична енергија и ќе биде одговор на зачестените забелешки за постојниот систем за осветление, кој е застарен и нефункционален. Дополнително, се предвидува компанијата да постави информативни и комерцијални дигитални дисплеи или т.н. тотеми, кои Општината ќе има право да ги користи за информирање на граѓаните; да нуди ефикасни услуги за изнајмување електрични велосипеди и електрични тротинети, кои ќе може да ги користат граѓаните, да постави полначи за електрични автомобили на локации во Аеродром и да формира т.н. хотспот-точки со бесплатен безжичен интернет.

Kомпанијата што ќе биде стратешки партнер на Општина Аеродром во реализацијата на овој проект ќе има обврска целосно да го финансира и одржува целиот проект, а Општина Аеродром, освен што нема да има никакви директни трошоци за негова реализација, туку и преку намалување на потрошувачката на електрична енергија сериозно ќе ги намали трошоците и ќе оствари заштеда на средства од буџетот.

„Убеден сум дека по успешното завршување на повикот и воспоставување јавно-приватно партнерство, ќе може официјално да му посакаме добредојде на проектот, кој ќе даде една нова енергија на иднината и живеењето во нашата општина. Со имплементацијата на проектот општина Аеродром ќе стане првата високотехнолошка и паметна општина, како и вистински пример на локална самоуправа што поддржува иновации и промовира одржливост“, заклучи Муцунски.