Градоначалникот на општина Аеродром, Тимчо Муцунски, утрово изврши увид на градежните работи на сообраќајниците во населбата Лисиче, каде што активно се работи на реконструкција на една улица, а набргу почнуваат активностите на уште две улици во истата населба.

„Продолжуваме со инвестициите во инфраструктурни проекти, кои сериозно го менуваат изгледот на Аеродром. Проектите што ги почнавме на почетокот на годината го добиваат својот финален изглед, а со тоа решаваме важен инфраструктурен проблем, но и ја подигнуваме на безбедноста во сообраќајот за граѓаните што живеат во овој дел од населба Лисиче“, напиша тој на својата фејсбук-страница.

Во овој период се изведуваат работни активности за реконструкција на улицата Мите Богоевски, во должина од 1.245 метри, а по нејзиното завршување, почнува и обновата на улиците Црноризец Храбар и Илија Димовски, со вкупна должина од 1.000 метри. Реконструкцијата опфаќа промена на асфалтот и поплочување на пешачките патеки со бекатон-плочки, како и поставување хоризонтална и вертикална сигнализација.

Вкупната вредност на овој проект изнесува 60 милиони денари, средства обезбедени од Светската банка преку проектот на Министерството за транспорт и врски за финансирање инвестиции и во инфраструктурата на општинските патишта и улици.

Во следниот период почнува реализацијата на неколку важни инфраструктурни проекти, со кои ќе го унапредиме урбаното живеење во неколку населени места во општината.