Македонија
Муцунски на петгодишнината од членството во НАТО: Македонија останува посветена на заедничката работа со сојузниците и партнерите во справување со предизвиците

Денес во Скопје се одржа работен состанок по повод одбележувањето на петгодишнината од членството на Република Северна Македонија во НАТО.
На покана на министерот за надворешни работи и надворешна трговија, Тимчо Муцунски, на состанокот присуствуваа заменичката министерка за одбрана, Елфет Исмаили, амбасадори и шефови на дипломатски мисии на земјите членки на НАТО, партнерите од Индо-Пацификот, како и претставници од Украина и Европската Унија.
Министерот Муцунски го отвори состанокот со изразување благодарност за помошта што повеќе сојузнички држави ја понудија и обезбедија по трагичната несреќа во Кочани, при што беа повредени многу млади лица. Тој посочи дека оваа солидарност претставува суштинска вредност на НАТО и потврда за силните врски меѓу сојузниците.
Во своето воведно обраќање, министерот ја истакна важноста на членството во Алијансата како стратешка придобивка и клучен надворешно-политички приоритет на Северна Македонија. Посочи дека земјата, преку своето активно учество, придонесува кон зачувување на мирот, стабилноста и безбедноста во евроатлантската заедница.
Муцунски нагласи дека надворешната политика на Северна Македонија се темели на три клучни столба: членството во НАТО како кредибилен сојузник, целосната усогласеност со Заедничката надворешна и безбедносна политика на Европската Унија, и стратешкото партнерство со Соединетите Американски Држави – три ориентации што целосно одговараат на националните интереси.
Тој истакна дека засиленото присуство и ангажман на НАТО и ЕУ во регионот има клучно значење за стабилноста на Западен Балкан, како и дека Северна Македонија останува посветена на заедничката работа со сојузниците и партнерите во справување со предизвиците, јакнење на отпорноста и поддршка на интегративните процеси.
Состанокот овозможи размена на мислења за актуелната геополитичка и безбедносна ситуација, вклучително и во однос на Украина. Беше нагласена потребата од заеднички напори за зајакнување на колективната безбедност и одбрана, преку засилена соработка и координација со сите стратешки партнери.
Посебно беше подвлечена важноста на демонстрацијата на единство меѓу сојузниците, како и потребата секоја земја да го преземе својот дел од одговорноста преку вложување во сопствената одбрана.
Заклучено беше дека овие теми ќе бидат во фокус и на претстојните состаноци и Самитот на НАТО во јуни во Хаг, каде што се очекуваат важни одлуки за иднината на Алијансата и стабилноста на евроатлантскиот регион.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Јанев на заокружување на обуката „Истрага на местото на настанот“, насочена кон унапредување на истражните капацитети на полициските сили

Директорот на Бирото за јавна безбедност Александар Јанев присуствуваше на свеченоста за доделување на дипломите, што се одржа во Центарот за обука на полицијата во Идризово, заедно со помошник министерот за внатрешни работи и началник на Центарот за обука, Влатко Митковски, како и со амбасадорот на Италија во нашата земја, Н.Е. Паоло Палминтери.
Обуката беше реализирана од Вишиот институт за истражни техники на карабинерите на Италија, со организациска поддршка од Италијанската амбасада во Скопје.
Учесниците на курсот имаа можност да стекнат напредни знаења и практични вештини за истражување на место на настан, притоа следејќи современи европски и меѓународни стандарди.
“Посебна благодарност упатувам до италијанските експерти за нивниот професионален ангажман и пренесеното знаење и сакам да истакнам дека како институција, особено ја цениме оваа соработка што претставува значаен чекор кон унапредување на капацитетите на нашата полиција и поддршка на владеењето на правото”, истакна директорот Јанев, додавајќи дека ова е уште еден показател за успешната и стратешки ориентирана билатерална соработка со Италија во областа на безбедноста и претставува дел од заедничките напори за градење побезбедно и посилно општество.
Македонија
Николоски учествува на висок министерски форум во Истанбул

Вицепремиерот и министер за транспорт Александар Николоски денеска и утре учествува на Форум за министри за транспорт што се одржува во Истанбул.
Во планираната агенда е предвидено обраќање на вицепремиерот Николоски на панелот насловен ,, Иновативни можности и решенија за финансирање на транспортни коридори” .
На Форумот ,,Глобална Транспортна Поврзаност” предвидено е да се обрати претседателот на Турција, Реџеп Таип Ердоган, министерот за транспорт на Турција, Абдулкадир Уралоглу како и други министри од Европа и светот.
На настанот ќе земат учество и бројни министри како што се министерот за транспорт на Шпанија, на Албанија, на Саудиска Арабија, Сингапур, Црна Гора, Обединетите Арапски Емирати, како и многу други високи претставници од институции од областа на транспортот.
Македонија
Сиљановска-Давкова прими припаднички на Армијата кои успешно завршија обука во САД

Претседателката Гордана Сиљановска-Давкова ги прими капетанката Неда Волчева и поручничката Сара Тасевска кои успешно го завршија седуммесечниот курс „Maneuver Captain’s Career Course“во Џорџија, САД, организиран од американскиот тренинг центар „Fort Moore”.
На средбата на којашто присуствуваа началникот на Генералштабот на Армијата, генерал-мајор Сашко Лафчиски и американската амбасадорка Анџела Агелер, двете припаднички на Армијата ја запознаа претседателката со фазите, содржините и квалитетот на воено-образовната обука и ги споделија нивните натамошни планови, заложби и амбиции за кариерен напредок.
Препознавајќи во нив потенцијал за идни генерали, Сиљановска-Давкова им честиташе на Волчева и Тасевска за успешно завршената обука и изрази уверување дека стекнатите знаења, вештини и експертиза ќе ги применат во интерес на македонската армија.
Според неа, реализацијата на оваа програма претставува влог во македонско-американското партнерство и е посебно значајна за промоција на земјава како лојален и кредибилен сојузник во НАТО.
Признавајќи ги одличните резултати што ги постигнуваат жените, соговорниците се согласија дека нивното партиципирање во меѓународните обуки треба да биде редовна пракса.
Сиљановска-Давкова на средбата ја реафирмираше својата заложба за формирање на Регионален центар за извонредност за жени, мир и безбедност со седиште во Скопје, заради промоција на жените во безбедноста и одбраната во регионот.