Во објектите на детската градинка „Весели цветови“ во општина Кисела Вода инвестирани се повеќе од 3,5 милиони денари во енергетско-ефикасни прозорци, постелнини, современа кујнска опрема, дидактички материјали и играчки. Градоначалникот Ѓорѓиевски при денешната посета на објектот „Сончоглед“ истакна дека инвестирањето во унапредувањето на условите за децата и поттикнувањето на нивниот когнитивен развој се стратегија што Општина Кисела Вода ја има зацртано и која во континуитет ќе се реализира и во периодот што следува.

„Инвестициите во раниот детски развој, кои овозможуваат поттикнување на интелектуалните способности, кои го стимулираат логичкото мислење и ја подобруваат моториката, се неопходност, која е влог во интелектуалниот, општествениот и во емоционалниот напредок на децата. Оттука, Општина Кисела Вода и јас како нејзин градоначалник, продолжуваме со уште поголем интензитет да работиме на унапредување на условите за децата од предучилишна возраст. Денес, објектите на ЈДГ ‘Весели цветови’ ги опремивме со играчки и дидактички материјали. Обезбедивме и нови постелнини и кујнска опрема, а паралелно со тоа правиме и инфраструктурни подобрувања секаде каде што има потреба. Имено, објектот ‘Сончоглед’, во кој денес се наоѓаме, добива и нови енергетско-ефикасни прозорци, а вакви зафати, кои на директен начин влијаат на подобрување на квалитетот на предучилишното воспитание и образование, се планирани и во другите градинки на територија на општина Кисела Вода. Јавниот систем на воспитување и едукација треба да се гради на високи стандарди, нешто што предучилишните институции, кои се под надлежност на Општина Кисела Вода, секако ќе им го овозможат на нашите најмлади жители“, изјави градоначалникот Ѓорѓиевски.