Македонија
Наместо на политички игри во училиштата, Општина Тетово да се фокусира на квалитетна настава, апелира Министерството

Контролите на Државниот просветен инспекторат над работата на основните и средните училишта во државата во изминатите неколку месеци потврдуваат дека Тетово е општина што најлошо ги менаџира своите надлежности и обврски во областа на образованието. Тоа е резултат на несовесно работење на градоначалникот, кој, наместо на квалитетот на наставата и интересите на учениците, е фокусиран на политички игри, кои ги спроведува токму преку образовните установи, истакнуваат од Министерството за образование и наука.
„Од страна на просветните инспектори констатирани се многубројни неправилности, особено при избори и именувања директори, и тоа во седум општински основни и средни училишта, за што давани се насоки за постапување и поведувани се соодветни постапки.
Во три основни училипта – „Истикбал“, „Ѓерѓ Кастриот Скендербег“ во Порој и „Беса“ во Мала Речица, именувани се директори што не ги исполнуваат законските услови за извршување на функцијата. Двајца од нив (во „Истикбал“ и „Беса“) се назначени и без да се спроведе оглас за избор на директор, исто како и во гимназијата „7 Март“.
Во средното училиште „8 Септември“ не е распишан оглас за избор на директор три месеци пред истекот на мандатот на актуелниот директор на училиштето, како што наложува законот, додека во гимназијата „Кирил Пејчиновиќ“ противзаконски е разрешен директор и не е постапено во согласност со насоките од записникот на просветните инспектори при констатитирањето на прекршокот, што е утврдено за време на контролниот надзор.
Најнов случај на констатирана нерегуларност е обидот на директорката на ОУ „Лирија“ за преземање вработени од други институции со лажна изјава за што известени се надлежните органи и институции за понатамошно постапување“, се наведува во соопштениетот од оваа институција.
Законите, како што додаваат, важат еднакво за сите и мора да се почитуваат.
Според МОН, раководството на Општина Тетово е свесно за прекрошоците што ги има направено и залудни се обидите да се даде политички контекст на реакциите на институциите и на голем дел од тетовските граѓани.
Потенцираат дека никој не е над законот и за непочитувањето треба да знае дека сноси одговорности и има последици.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Тетово повика на јавна дебата за промена на имињата на улиците

Општина Тетово в петок, со почеток во 15:00 часот, организира јавна дебата за предлози за имиња на улиците.
„Ги повикуваме сите граѓани, здруженија, невладини организации и граѓанскиот сектор да учествуваат на оваа јавна дебата за именување на улиците“, велат од општината преку допис.
Додаваат дека секој предлог од граѓаните е важен и помага овој процес да биде инклузивен и успешен за граѓаните и градот Тетово.
Македонија
Тошковски: Припадниците на МВР денеска примија плата зголемена за 10 отсто

Припадниците на МВР денеска примија плата зголемена за 10 отсто, информира министерот за внатрешни работи, Панче Тошковски.
„Изминативе години сосема оправдано имаше критики дека платите во МВР се ниски, а очекувањата и одговорностите големи. Често се укажуваше на разлики во однос на некои сродни служби, а чувството на потценетост беше реално и оправдано. Ова зголемување не е доволно, но е еден од многуте чекори што ќе следат во насока на враќање на достоинството и угледот на полицаецот. Целта е јасна – да изградиме модерна, професионална и силна полиција која ќе биде вистински сервис на граѓаните. Продолжуваме понатаму кон обезбедување на подобри услови, поголема поддршка и вистинско вреднување на трудот што секојдневно се вложува“, напиша Тошковски во објавата на социјалните мрежи.
Македонија
Оставката на Папазов помина на владина седница

Владата ја прифати оставката на градоначалникот на Кочани, Љупчо Папазов.
Советот на општината ќе треба да назначи в.д. градоначалник на Кочани, откога одлуката ќе биде објавена во „Службен весник“.
Инаку, Папазов ја поднесе оставката по пожарот во дискотеката „Пулс“ каде животот го загубија 59 лица, а околу 200 беа повредени и префрлени низ клиниките во земјава и странство.
Папазов по оставката беше приведен и одреден му беше притвор. Во куќен притвор се и неговите двајца претходници од градоначалничката фотелја.
Според истрагата, тројцата осомничени градоначалници на Кочани во периодот од 2012 година до 16 март кога се запали дискотеката, не ги извршиле своите правни обврски во согласност со Законот за заштитата и спасувањето, со што овозможиле кабарето „Пулс“ незаконито да продолжи со вршење угостителска дејност. За целиот овој период, како што беше истакнато, Општината примала уплати по основ на надоместок за угостителски објект.