Македонија
Најмалку два месеца ќе се истражува милионската злоупотреба на социјална помош и социјална пензија: рачно ќе се проверува секое поединечно барање
Социјалните инспектори се на терен и рачно ќе го проверуваат секое поединечно барање за социјална помош и социјална пензија, вели техничкиот министер за труд и социјална политика, Ѓоко Велковски, за „Макфакс“. Првичното вкрстување на базите со податоци на Министерството за труд и на Министерството за внатрешни работи покажа 2.252 незаконски исплати оти лицата што добиле помош или социјална пензија имале возила на свое име иако условот е да немаат возила.
„Инспекторите сега проверуваат дали наодите од вкрстувањето на базите ќе се совпаднат со хартиената документација, која задолжително треба да ја имаат центрите за социјална работа. Со оваа проверка ќе се утврди и чија е вината за незаконски исплатените средства, дали се во базите на податоци или кај корисниците оти и тие имаат обврска да ја пријават секоја промена што би настанала по добивањето помош од државата. Манипулацијата е системска, најверојатно се вклучени повеќе лица и токму поради тоа го правиме вонредниот инспекциски надзор. Физички ќе се оди во секој од 30-те центри и нашите очекувања се дека постапката ќе трае најмалку два месеца“, рече техничкиот министер Велковски.
Проверките се почнати во скопските центри, каде што вкрстувањето на базите покажа најмногу злоупотреби. Во Скопје техничкиот министер Велковски извести дека се регистрирани 714 злоупотреби, во Куманово 235, во Прилеп 229, а во другите центри бројката на злоупотреби е под 100.
Неговите претпоставки се дека се работи за милионски суми имајќи превид дека месечно на корисниците им се исплаќаат околу 270.000 евра.
Неколку директори на центри за социјална работа вчера испратија реакција на тврдењата на техничкиот министер, во која побараа извинување од него оти го нарушил интегритетот на вработените, а тој ги обвини за оркестриран напад.
Тврдењата на Велковски за милионски злоупотреби ги демантира досегашната министерска Јована Тренчевска, која во техничката влада е дополнителна заменик-министерка за труд и социјална политика. За неа, обвинувањата се лажни, без информации со завршени записници, факти и докази. Објасни дека во јануари го потпишала меморандумот за соработка со МВР за превенција за злоупотреба на системот за социјална заштита, кој почнал да се применува од февруари. Таа тврди дека досега во секој случај во кој е утврдено дека корисникот дал лажни информации за поседување имот, правото на социјална заштита му се укинувало и го враќал паричниот надоместок.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Деспотовски: Не ни требаат условени оставки во СДСМ, секој да почне од себе без да ги чека другарите
Потребна е храброст кај партискиот врв за да се прифати реалноста на овој пораз, вели Јован Депостовски од СДСМ.
Тој укажува дека во партијата на е време за условени оставки кои ќе се ефектуираат доколку и другите си поднесат оставки.
„Секој да почне од себе без да го чека партискиот другар до него. Само така овој процес на промена нема де трае предолго а штетата нема да стане ненадоместлива“, вели Деспотовски.
Како што додава, на членството и поддржувачите потребен им е консолидиран, свесен и реформиран СДСМ.
„Вчеравечер пропуштивме огромна шанса да го направиме првиот чекор кој почнува со одговорност, со име и презиме,почнувајќи од врвот. По статутот, тоа ќе отвори веднаш простор за поширока анализа на причините за овој пораз. За одговор на прашањата: Каде исчезна онаа енергија од пред 7 години? Дали ветивме многу работи а малку исполнивме? Каде се стопи довербата и како се загуби сета онаа надеж кај луѓето? Признанието дека имаме огромен проблем е прв чекор за негово надминување“, пишува Деспотовски.
Засклучува дека за носење на брзи и квалитетни одлуки потребна е итна сериозна анализа, која не треба да се одолговлекува.
Претходно денес, оставки поднесоа потпретседателите на СДСМ, Фатмир Битиќи, и Перо Костадинов. Битиќи најави дека неговата оставка ќе биде целосно ефективна кога тоа ќе го сторат и останатите сопартијци кои го сочинуваат раководството на партијата.
По изборниот пораз, првиот човек на СДСМ, Димитар Ковачевски, синоќа повика на нови внатрешни избори на сите партиски тела, почнувајќи од раководството на СДСМ до претседателите на општинските организации.
Македонија
Нов состав на Собранието ќе биде избран во следните 20 дена, инаугурацијата на Силјановска-Давкова најдоцна викендов
По завршувањето на парламентарните избори, следен чекор е мандатот на новиот собраниски состав да биде верификуван од ДИК.
Во согласност со Уставот, новоизбраното Собрание се состанува на конститутивна седница најдоцна 20 дена по одржаните избори, а ќе ја свика претседателот на Собранието од претходниот состав.
Доколку не се закаже конститутивна седница во предвидениот рок, пратениците сами се состануваат и го конституираат Собранието на дваесет и првиот ден од денот на завршувањето на изборите.
Мандатот на пратениците во Собранието се избираат за време од четири години, и пратеникот не може да врши други јавни функции или професии. Собранието се распушта ако за тоа се изјасни мнозинството од вкупниот број пратеници.
Во однос на претседателските избори, најдоцна на 12 мај треба да биде свикана собраниска седница за инаугурација на новоизбраната претседателка Гордана Сиљановска Давкова. На 12 мај истекува мандатот на Стево Пендаровски.
Доколку инаугурацијата на Силјановска се случи на 12 мај, таа ќе треба да го додели мандатот за новиот состав на Владата.
Пред преземањето на должноста, претседателот дава свечена изјава пред Собранието со која се обврзува на почитување на Уставот и законите.
Македонија
Силјановска-Давкова го победи Пендаровски со разлика од 308.632 гласа, разликата што тој ја направи во 2019 година беше 58.210 гласа
Според последните податоци од Државната изборна комисија (ДИК), во вториот круг од седмите претседателски избори во земјата Гордана Силјановска-Давкова освои 308.632 гласа повеќе од противкандидатот Стево Пендаровски. Од обработени 99,09 отсто од избирачките места i 99.82 отсто обработени избирачи, за неа гласале 560.173 граѓани, а Пендаровски доби 251.541 глас.
Со поголема разлика во гласовите за претседател беше избран само Киро Глигоров во 1994 година. Тој имаше 517.978 гласа повеќе од противкандидатот Љубиша Георгиевски. Беше избран во првиот круг со освоени 715.087 гласа, а Георгиевски освои 197.109 гласа.
На претседателските избори во 2019 година, кога Пендаровски и Силјановска-Давкова првпат се соочија и влегоа во вториот круг, Пендаровски победи со историски најмала разлика во гласовите од сите досегашни претседателски избори. Доби 58.210 гласа повеќе од Силјановска-Давкова, односно тој во вториот круг освои 435.656 гласа, а Силјановска-Давкова имаше 377.446 гласа.
Во 2014 година Ѓорге Иванов вториот мандат во вториот круг го доби со разлика од 136.834 гласа. Тој освои 534.910 гласа, а Пендаровски, кој тогаш првпат се кандидира за претседател, доби 398.076 гласа.
Со разлика од 188.788 гласа Ѓорге Иванов го доби првиот претседателски мандат во 2009 година. Тој освои 453.616 гласа, а Љубомир Фрчковски 264.828 гласа.
221.138 гласа беше разликата со која Бранко Црвенковски го победи Сашко Кедев на изборите во 2004 година. Тој освои 550.317, а Кедев 329.179 гласа.
Борис Трајковски во 1999 година го победи Тито Петковски со 69.194 гласа разлика. За Трајковски имаше 582.808, а Петковски доби 513.614 гласа.