Македонија
Најчевска ја обвини ДИК дека го крши изборниот законик, оттаму ѝ вратија дека ги нарушува правото и правната држава
Професорката Мирјана Најчевска на ФБ објави статус во кој вели дека Државната изборна комисија го крши изборниот законик.
„Дури и тогаш кога се обидуваат да ги следат измените на Изборниот законик направени на неправен начин тие повторно го кршат.
Имено, според измените станува збор за избори кои се одржуваат во исто време. Меѓутоа изборите за претседател се на 24 април а за парламент на 8 мај. Значи ајде бре луѓе како може да гласате партии кои на функција ги ставаат најголемите кецароши“, напиша таа.
Потоа напиша уште еден статус.
Од Државната изборна комисија демантираат.
„Со последните измени на Изборниот закон( Службен В. на Р.М. бр:76/2024 од 03.04.2024 ) во членот 68 по став (3) се додава нов став (4), кој гласи:
“(4) Доколку во ист период се одржуваат повеќе видови на избори, подносител на листа на кандидат/и чијшто реден број на гласачкото ливче е определен согласно со ставот (1) на овој член, може со писмена согласност да дозволи неговиот реден број да се користи истовремено на гласачкото ливче и за друга листа на кандидат/и за друг вид на избори, доколку кандидатот/ите се поддржани од иста политичка партија или коалиција и/или користат ист симбол, за што задолжително ја известуваат Државната изборна комисија.”
Врз основа на овој член ДИК го утврди и редоследот на кандидатските листи за пратеници во Собранието на Република Северна Македонија на гласачкото ливче од број 1 до број 7, соодветно на редоследните броеви на потврдените кандидати за претседател на државата, на 95 тата седницата која ДИК ја одржа на 11.04.2024.
Останатите редодоследни броеви на кандидатски листи за пратеници во Собранието беа утврдени со ждрепка која се спроведе на 96- тата седница на ДИК која се одржа на 12.04.2024“, велат од ДИК.
Од Комисијата додаваат: „Врз основа на тоа дека Проф. Најчевска цитира не точни членови од Изборниот закон, таа го руши интегритетот на ДИК како институција но и ја доведува во прашање регуларноста на изборниот процес, сакаме уште еднаш да истакнеме дека сите учесници во изборниот процес и оние кои во јавноста влијаат на креирање на јавното мислење, пред да излезат во јавност со обвинувања за прекршување на изборен законик од страна на ДИК , треба добро да се запознаат со законските одредби и редовно да ги следат измените на законот кои се објавуваат во Службен весник.
Повикувајќи се на несоодветни одредби од Изборниот закон, проф. Најчевска со изнесување на нејзините наводи во јавноста, во најмала рака се обидува да ја наруши професионалноста и интегритетот на ДИК , да создаде негативна слика за изборниот процес, угледот на институцијата и државата, и да ја доведе јавноста до забуна преку креирање на нереална слика базирана на неинформираност“.
„Државната изборна комисија работи професионално и нема да дозволиме нашиот интегритет и углед да биде нарушен од вакви неосновани наводи.
Посебно не е за очекување од врвна интелектуалка ваков неодговорен и непрофесионален настап во јавноста, па затоа ДИК не очекуваше дека би било потребно на ова ниво да дава правни совети во јавноста на угледни професорки, дотолку повеќе што законите и работата на ДИК се јавни. Со вакви јавни настапи, професорката Најчевска ги нарушува правото и правната држава како основа на која функционира нашиот систем.
Државната изборна комисија секогаш е на нивото на одговорност и професионалност штитејќи го сопствениот углед и угледот на државата пред домашната и меѓународна стручна и општа јавност“, пишува ДИК во својата реакција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Православните верници денеска го слават Велигден и Ѓурѓовден
Денес, освен вториот ден од Велигден, се празнува и Ѓурѓовден, празник во чест на Свети великомаченик Георгиј Победоносец, празникот на обновувањето на природата и на животот воопшто.
Празникот на светиот великомаченик Георгиј познат како Ѓурѓовден се празнува на 6 мај според новиот или на 23 април според стариот календар.
Тој се смета за најголем пролетен празник што го празнува не само христијанското туку и целото население во Македонија што од друга страна значи дека во неговата основа е празнувањето на природата, на разбудувањето на вегетацијата и на животот воопшто.
Македонија
Времето денеска сончево, од среда пороен дожд и грмежи
Времето денеска ќе биде сончево со мала до умерена локална облачност и со слаб до умерен ветер од јужен правец. Попладне во планинските региони ќе има услови за изолирана појава на краткотраен пороен дожд. Минималните температури ќе бидат во интервал од 3 до 10, а максималните ќе достигнат од 20 до 26 степени.
Во Скопје ќе преовладува сончево време со мала облачност и со слаб ветер од јужен правец. Минималните температури ќе се спуштат до 8, а максималните ќе достигнат до 26 степени.
Во вторник попладне ќе има локална појава на нестабилност, а во среда и четврток под влијание на нов влажен бран во поголем дел од земјава ќе има пороен дожд и грмежи, а локално процесите ќе бидат поинтензивни и во форма на невреме со пообилни врнежи и засилен ветер. Потоа условите за нестабилно време ќе се намалуваат.
Македонија
Мециновиќ: На носителите на ЗНАМ, на личните профили им стојат слики со Заев и Пендаровски
– На носителите на ЗНАМ, уште на личните профили им стојат слики за поддршка на Заев и Пендаровски. Тоа се поддршки што јавно им ги дадоа, така што сегашното нивно делување е малку повеќе лицемерно од нивна страна – истакна Носителот на ИЕ2 и портпарол на Левица, Амар Мециновиќ, во дебатата на ,,24 Вести”.
Според Мециновиќ, СДСМ ако ја примеа пораката, немаше Оливер Спасовски да биде носител во ИЕ2, после скандалите со пасошите за белосветски криминалци, за голготата за македонските граѓани со пасошите и за бегството на Груевски:
– Од друга страна, за СДС имам конкретна порака, но СДС не ја прима пораката! Пораката не е примена, затоа што нивниот носител во Двојка имаше страшни резултати. Имаше: од бегството на Груевски до оваа голгота што им се случи со пасошите на граѓаните и во меѓувреме – издавањето на пасоши за белосветски криминалци.
Говорејќи за Францускиот предлог и за ненаситноста кон бизнис – интересите од страна на СДСМ, Мециновиќ рече:
– Исто така, не ја примија ни пораката кога народот го отфрли Францускиот предлог. Не ја примија ни пораката кога Заев го изгуби легитимитетот, така што на сила се одржаа на власт до 2024 год. Практично, за да ги задржат нивните бизнис – интереси.
Мециновиќ постојано става акцент и на неоспорниот факт дека челниците од ЗНАМ го избришаа АСНОМ од Уставот:
,,ЗНАМ го избришаа АСНОМ од Уставот кога го носеа Преспанскиот, со оглед на фактот дека тогаш беа дел од раководството на тогашното СДС. Затоа, целата нивна сегашна реторика е лицемерна”.
Левица е единствена искрена, чесна, неподмитлива опција, која се бори за нулта – корупција, радикални промени во системот и нуди решенија за сите целни групи граѓани во Македонија:
,,На 8 мај, заокружете го број 5! Искористете го своето право на глас и гласајте за Левица! Со повеќе пратеници во Парламентот, борбата ќе биде посилна!”