Македонија
На годишен одмор не мораат сите вработени во приватните компании, Инспекторатот за труд ја појасни уредбата
Неискористените годишни одмори од 2019 година, како и првиот дел од одморот за 2020 година, задолжително треба да ги користат само вработените во приватните компании кои ја користат мерката за чување дете до 10 години, бремените и вработените со хронични болести, кои веќе останаа дома поради епидемијата на коронавирусот. Уредбата на Владата, без дополнителни насоки за постапување, ги збуни приватните компании за тоа како и кому треба да му дадат годишен одмор за време на вонредната состојба.
Од Државниот инспекторат за труд за „Макфакс“ објаснуваат дека уредбата не важи за вработените што работат, без разлика дали тоа го прават од дома или, пак, од канцеларија.
„Уредбата не важи за сите вработени во приватните компании, туку само за оние што сега користат некоја од мерките за родители на деца до 10 години, бремени жени или хронично болни и веќе седат дома. Оваа уредба е всушност олеснување за приватниот сектор за да не се доведат во ситуација да мораат двапати да им даваат одмори на некои од вработените. За да не се случи оние што сега седат дома, веднаш кога ќе заврши мерката, да побараат одмор, па работодавците да мораат двапати да ги пуштаат на платен одмор“, објасни Злате Стојановски, раководител во Државниот инспекторат за труд.
Доколку вработените, кои се веќе дома, имаат стар одмор од минатата година, уредбата ги обврзува да го искористат заклучно со 31 мај. Првиот дел, пак, од новиот одмор за 2020 година во траење од две недели треба да го искористат до 30 јуни годинава.
Уредбата не остава простор работниците или, пак, работодавците да не се согласни да се користи одморот.
„Уредбата има сила на закон, нејзиното почитување е императив. Не е оставен простор да избираат ниту вработените дали ќе го користат одморот ниту, пак, работодавиците дали ќе ги пуштат работниците на одмор“, вели Аљадин Хавзиу, директор на Државниот инспекторат за труд.
Вработените што не користат некоја од мерките на Владата за спречување на ширењето на коронавирусот годишните одмори може да ги користат како и досега, односно стариот одмор од минатата година да го искористат заклучно со јуни, а првиот дел од новиот одмор до крајот на годината. Оние компании што поради работниот процес нема да имаат можност да им дадат одмор на вработените, одморот треба да им го платат.
„Работниците треба да знаат дека по нивен избор може да користат само два дена од годишниот одмор. Кога ќе го користат преостанатиот дел од одморот, законски одредува работодавецот. Ако поради организирање на работниот процес во приватна компанија работодавецот на работникот не му даде годишен одмор, тогаш тој е обврзан да му плати за секој ден од одморот, а за пресметка се зема последната исплатена плата“, објасни раководителот Стојановски.
Тој ги охрабри сите работници да пријавуваат нерегуларности во Државниот инспекторат за труд, кој постапува по секоја претставка.
Техничкиот премиер, Оливер Спасовски, денес на прашање како ќе постапуваат со оние што нема да ги почитуваат уредбите на Владата, вклучително и уредбата за годишните одмори, рече дека за секое непочитување има одредби во Кривичниот законик и дека надлежните институции ќе поднесуваат прекршочни и кривични пријави.
Мерката еден родител на дете до 10 години да остане дома, како и дома да останат хронично болните и бремените, почна да се применува од 11 март со заклучок на Владата.
Уредбата со законска сила за примена на Законот за работните односи беше објавена во „Службен весник“ на 4 април. Со оваа уредба Владата ги презема трошоците што компаниите ќе ги направат за трите категории граѓани што останаа дома како мерка за заштита од коронавируост.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Посебен сообраќаен режим утре и задутре во Тетово поради предизборни митинзи
СВР Тетово информира дека поради одржување на митинзи на политичките партии во рамки на предизборната кампања во следните два дена (недела и понеделник) ќе има посебен сообраќаен режим во центарот на градот.
– Ќе се воведе посебен режим на сообраќајот и тоа по булевар „Илирија“од влезот на Тетово сè до плоштадот, односно кружниот тек со булевар „Илинденска”, при што нема да се дозволува паркирање на возилата низ булеварот. Исто така, за време на митинзите сообраќајот ќе биде пренасочен по другите улици, и тоа по улиците „ЈНА“, „Тодор Ципоски-Мерџан”, „Јане Сандански“ и улица „Никола Тесла“, се вели во соопштението на СВР Тетово.
Отттаму со апел возачите да бидат трпеливи и да ги почитуваат наредбите што ќе ги издаваат полициските службеници.
Македонија
Ковачевски: Имаме задача да не се откажеме од европскиот сон за подобра и просперитетна држава за идните генерации
„Нашата генерација има задача да не се откаже од европскиот сон на земјата и да направи сè за Македонија да стане рамноправна членка на Европската Унија“, порача претседателот на СДСМ, Димитар Ковачевски, на митингот на Коалицијата за европска иднина во Кичево.
Ковачевски истакна дека денеска кога чествуваме 121 година од смртта на македонскиот револуционер, идеолог и учител, Гоце Делчев, важно е да се потсетиме дека низ историјата нашиот народ не се откажувал дури ни пред најтешките предизвици. Порача дека 8 мај е нов историски крстопат, денот кога сите прогресивни и демократски сили во државата треба да одлучат државата одлучно да продолжи на патот кон Европската Унија.
„Само така ќе изградиме подобра и просперитетна држава за идните генерации. Држава со европски животен стандард, европски вредности, европски правила на игра“, рече Ковачевски.
Ако ВМРО ДПМНЕ и Силјановска се дограбат до власта, ќе стават рампа на патот на Македонија кон Брисел и ќе можеме да се збогуваме од ЕУ, истакна Ковачевски.
„Не смееме да ја повториме грешката од минатото и да дадеме преголема моќ во рацете на десничарска партија како ВМРО ДПМНЕ. Уште се свежи раните што ѝ ги нанесоа на државата за време на нивното 11-годишно владеење на Македонија. Сетете се на заробените медиуми, замолчените вработени во јавниот сектор, натепаните студенти во библиотеките и плоштадите. Сетете се на милионите потрошени за жални врби, лажен барок, евтин стиропор само за да се богатат поединци од ВМРО – ДПМНЕ“, истакна Ковачевски.
Лидерот на СДСМ пред граѓаните на Кичево најави повисоки плати и пензии, пакети за поддршка на учениците и студентите, одговорна социјална политика и одлучна борба против криминалот и корупцијата.
Македонија
Проданоски: Експресниот пат Градско-Прилеп ни од далеку не е готов, да ставиме крај на лагите на СДСМ на 8 мај
Тука сме на лице место за да ги разобличиме лагите кои што СДСМ се обидуваат да ги пласираат до јавноста, рече Дејан Проданоски, претседател на ОК на ВМРО-ДПМНЕ Прилеп.
– Овде во Дреновската клисура каде што сме на самиот старт на почетни градежни активности, а за кои што слушнавме дека во 90 % експресниот пат е завршен. Овие се истите лаги исто како оние на почетокот на нивниот мандат кога Фејсбук и Гугл чекаа на граница, истите лаги како фабриката за автомобили во Тетово. Но, македонските граѓани треба да видат и да знаат дека овде на ова место е сам старт на почеток на градежни активности, а не е видлив ниту крајот на она како што тие сакаат да го пласираат. Да не зборувам тука и за третата фаза од експресниот пат за која што има обезбедено средства и за која што можеше исто да биде завршена ако не беа платени пеналите кон компанијата на која што и се бараше рекет за да остане да го гради автопатот и се изгуби значително голем период од изградба на патот и барање на друга компанија, рече тој.
На лагите од СДСМ им нема крај, овие лаги мора да завршат, затоа на 8-ми мај ве повикувам сите да заокружите број 2 за да и ова автопатско решение биде завршено и биде ставено во функција на секој граѓанин на Република Македонија, додаде Проданоски.