На Универзитетската клиника за гинекологија и акушерство – Скопје во петокот првпат беше изведен екстраперитонеален царски рез врз трудница, а министерот за здравство, Венко Филипче, денеска, на одделот пуерпериум при ГАК – Скопје, ги посети родилката и нејзиното новородено, соопштија од Министерството за здравство.

Екстраперитонеалниот царски рез е специфична техника на царски рез, која е позната пред 70 години и во поново време првпат е реафирмирана во Франција. Ваков вид породување со царски рез, освен во Франција, се изведува во Брисел – Белгија, во Загреб – Хрватска, но и во Тунис во Северна Африка, објаснуваат од Здравство.

„На ГАК Скопје на 8 октомври овој вид царски рез беше изведен врз 23-годишна пациентка, која претходно имала три големи хируршки абдоминални операции поради повреди на внатрешни органи. Постоеја индикации нејзиното породување да заврши со царски рез, кој требаше да се направи во интерес на бебето“, велат од Министерството.

„Првпат во Македонија во петокот беше извршено породување со екстраперитонеален царски рез, со што ГАК Скопје стана и прва клиника во регионот каде што се примени оваа невообичаена техника. Среќен сум што по 30-годишно работно искуство на нашата клиника се роди бебе со екстраперитонеален царски рез, нешто за што сме слушале од повозрасните колеги. Пациентките со овој тип на царски рез побрзо и полесно се враќаат во нормален живот, нешто слично како по вагиналното породување. Бенефитот од екстраперитонеалниот царски рез е што родилката само неколку часа по операцијата, може да се движи, да јаде, да пие и да му се посвети на своето новородено. Со оваа техника се намалува и ризикот од внесување интераабдоминални инфекции и намалување на срастенките на внатрешните и на репродуктивните органи, со што се намалува и можноста од постоперативен стерилитет“, изјави доц. д-р Игор Самарџиски, кој го изведе оперативниот зафат во петокот.

Тој како што информираат од Министерството, тој неодамна се вратил од едукативен престој – активен курс во болница во Ница, Франција, каде што учествувал во изведување екстраперитонеални царски резови.

Инаку, според појаснувањата на здравствените работници, техниката за екстраперитонеалниот царски рез е специфична, почнува во ист стил како и клисичниот царски рез, но кон местото на сечењето на матката и вадењето на плодот се пристапува со посебна техника на странично истуркување на мочниот меур од местото каде што треба да се направи екстараперитонеалниот царски рез. Потоа следува специфично кружно шиење на отворот на матката, што исто така придонесува за намалување на времетраењето на интервенцијата и за подобро зараснување на местото каде што е пресечена матката.