САД се загрижени за тоа што можеме сами себе да се блокираме, па од тука доаѓа изјавата на американскиот сенатор Крис Марфи, кој минатата недела беше во посета на Македонија. Тој рече дека САД и НАТО ќе ги загрижи евентуалното неизгласување на уставните измени за кои рече дека се технички. Вака претседателот на државата Стево Пендаровски објасни прашан за ставот во врска со можното влошување на односите со САД и НАТО.

„Имав средба со сенаторот Марфи во 9 часот наутро и бев прв во серијата средби што ги имаше во Македонија. Можам да ви кажам дека не стана збор за таа тема, мојата претпоставка е дека тој знаеше со кој разговара од другата страна. Го знае мојот став и оној на Владата дека ние немаме проблем со овој тип на уставни измени. Јас го тврдам тоа и многупати го повторувам – внесувањето други делови од народи што живеат тука нема да ја загрози безбедноста на Македонија, ниту нејзината иднина, како што не ги загрозија стабилноста и иднината на Македонија наназад 20 години овие седум народи, кои се дел од преамбулата и нормативниот дел. Претпоставувам дека Марфи мислел на луѓето од опозицијата, со кои исто така имаше средба, а нивниот став е познат – под ниедни околности додека не заврши мандатот на овој пратенички состав тие не сакаат да размислуваат за уставни промени. Тоа значи дека на 1 декември сами себе ќе се блокираме и тоа секако е причина за загриженост на нашиот стратешки партнер“, појасни претседателот Пендаровски.

Извести дека ги знае амандманите што ќе бидат поднесени од Владата до Собранието и тие од првата до последната линија смета дека се целосно во рамките на она што Собранието го побара пред една-една и пол година.

И покрај тоа што не е извесно двотретинското парламентарно мнозинство за гласање на уставните измени, претседателот Пендаровски охрабрува да се почне постапката во Собранието.

„Тоа е една голема политичка дилема, политичка не е правна, дали да влегувате во уставни измени ако немате обезбедено две третини претходно. Денеска сум повеќе склон да верувам дека е потребно да се влезе во парламентот, дури под претпоставка да немате сигурни 80 претходно, со тоа што јасно на таков начин би се идентификувале двата главни блока во државата – проевропски и антиевропски блок“, рече Пендаровски.

На ист начин Пендаровски потсети дека во 2015 година почна првата процедура за преспанскиот договор кога тогашната владина конструкција немаше обезбедено 80 гласа и до последен момент не се знаеше дали ќе се постигне мнозинство за отворање на процедурата за менување на Уставот.