Македонија
(Видео) Пендаровски ќе ги потпише законите за „Бехтел и Енка“, 60-часовна работна недела нема во указите што ги добил
Претседателот Стево Пендаровски ќе ги потпише предложените измени на законите за олеснување на проектот за „Бехтел и Енка“, кои Собранието ги изгласа во петокот. Тој образложи дека по неговите јавни изјави оти нема да потпише 60-часовна работна недела затоа што е неуставна, во указот што стигнал кај него таков предлог немало.
Претседателот извести дека ќе ги потпише сите пет измени на законите, односно измени на Законот за работните односи, на Законот за експропријацијата, на Законот за урбанистичкото планирање, на Законот за градењето и на Законот за утврдување јавен интерес и номинирање стратешки партнер за имплементација на проектот за изградба на коридорите.
„Во однос на Законот за именувањето и дополнувањето на Законот за работните односи, сакам да ја информирам јавноста дека текстот на усвоениот закон не ја содржи оспорената одредба од Уставниот суд, која предвидуваше дека работното време на секој работник може да биде во просек 60 часа неделно во текот на годината. Изминативе месеци дадов изјави дека нема да потпишам указ за прогласување закон што содржи одредба која претходно е оспорена од Уставниот суд и во таа насока новиот закон не ја содржи формулацијата 60-часовна работна недела. Изминативе денови направив низа консултации со експерти од областа на трудовото право, со поранешни судии од Уставниот суд и со советниците во мојот кабинет. Донесов одлука да го потпишам указот за донесување на овој закон и на другите 4 закони“, рече претседателот Пендаровски.
„Уставен суд рече дека целиот закон е во ред освен членот 12 каде што пишуваше 60 часовна работна недела. Таму има една одредба која можам да ја цитирам која ми помогна, членот 171 во својот став 2 зборува за тоа колку може да трае прекувремената работа, значи да трае најмногу 8 часа во текот на една недела, најмногу 190 часа годишно и тука влегуваме со тоа образложение дека ова може да биде противуставен член или одредба. Вели освен за работи кои имаат специфичен процес на работа. И сега да преведам, овдека зборуваме за патишта, знаете дека градежната сезона трае 3 до 6 месеци максимум, така што на ниво на квартал или година, мое уверување е дека нема да се пробијат законските саати“, објасни претседателот Пендаровски.
Тој остави можност оние кои не се задоволни од неговата одлука повторно да поднесат иницијатива до Уставниот суд за чија одлука не мора да се чека со години.
„За оние кои тоа не го знаат, Уставниот суд некој ќе рече ќе одлучува долго време, години и години може да поминат и работата ќе заврши. Не, Уставниот суд во својата работа, има и таканаречена времена мерка. Може да каже до конечна одлука на Уставниот суд стопираме се, така што тоа се опциите“, рече претседателот Пендаровски.
Собранието ги изгласа петте закони за „Бехтел и Енка“ откога тие вторпат беа предложени. При првиот обид, кога измените на законите беа предложени од пратеници, заглавија во собраниска процедура, а опозицијата недвосмислено рече дека ќе ги блокира.
За да ја заобиколи блокадата, Владата ги предложи измените на петте закони со европско знаменце и покрај забелешките од амбасадорот на ЕУ во земјата, Дејвид Гир, дека знаменцето е злоупотребено оти не се работи за усогласување со европското законодавство.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Тошковски: Ова беа можеби најмирните и најдемократски избори што се случиле било кога
Во Република Македонија се одржаа можеби најмирните и најдемократски избори што се случиле било кога, особено од безбедносен аспект, изјави министерот за внатрешни работи, Панче Тошковски.
Тој оцени дека не се констатирани посериозни прекршувања на изборниот процес во текот на целиот ден.
Се заблагодари на македонските полицајци, граѓаните кои, како што рече, покажаа дека заслужуваме да бидеме дел од европското семејство, набљудувачите и новинарите.
„Да се живи и здрави македонските граѓани, да ни е вечна Македонија“, рече Тошковски.
Дополнителниот заменик министер, Митко Бојмацалиев, истакна дека изборите поминале во фер демократска и слободна атмосфера.
„Полицијата беше на својата задача и ги создаде сите предуслови за демократски чин. Честитки на директорот на Бирото за јавна безбедност. Честитки и до граѓаните кои не подлегнаа на притисоци, и на медиумите за транспаретноста“, изјави Бојмацалиев.
Македонија
Даштевски: Сега можеме да кажеме дека цензусот е исполнет, за претседател гласале 767.715 гласачи
Државната изборна комисија (ДИК) вечерва извести дека одѕивот на претседателските избори е 46,31 отсто, а на парламентарните 53,30 отсто. До 18.30 пристигнати се податоци за одѕивот на претседателските избори од 3186 избирачки места. Од вкупно запишани 1.657.939 гласачи на овие избирачки места гласале 767.715 гласачи односно 46,31 отсто.
„Сега можеме да се кажеме дека е исполнет цензусот“, рече претседателот на ДИК, Александар Даштевски.
Најголем одѕив до 19 часот за претседателските избори има во Новаци со 72,76 отсто, а најмал одѕив во Липково со 7,35 отсто.
Споредено со првиот круг од претседателските избори во 2024 година има намалување од 3 отсто.
До 19 часот пристигнати се податоци за одѕив на гласачите за парламентарните избори од 3186 места. Од вкупно запишани 1.665.591 гласач на овие избирачки места гласале 887.767 гласачи односно 53,30 отсто. Најголем одѕив на парламентарните избори има во Новаци со 74,85 отсто, а најмал во Центар Жупа со 18, 62 отсто.
Споредено со парламентарните избори во 2020 година има зголемување на одѕивот од 7,43 отсто на овие избори.
Првични резултати од гласањето Даштевски најави дека ќе соопшти во 23,30 вечерва.
Македонија
„Македонија добива нов претседател и нова влада“, најави Муцунски
„Цензусот е постигнат. Македонија добива нов претседател и нова влада, предводена од Христијан Мицкоски“, напиша на социјалните мрежи, потпретседателот на ВМРО-ДПМНЕ, Тимчо Муцунски.
Тој упати благодарност до граѓаните за поддршката, како и за нивниот придонес за мирни, фер и демократски избори.