Македонија
Нека си се истакнат општинските градоначалници, нека работат малку, порача Арсовска
По низа обвинувања за политиканство и гола борба за популизам меѓу градоначалничката на Скопје, Данела Арсовска и советниците од ВМРО-ДПМНЕ, Советот на Скопје попладнево не го прифати амандманот на ВМРО – ДПМНЕ со кој бараа реализација на 98 проекти од кои најголем дел се реконструкции на улици во градот.
Градоначалничката Арсовска објасни дека бараниот обем за реконструкција на улици е поголем од годишните градски буџети и укажа дека голем дел од улиците во амандманот се веќе предвидени и на нив ќе се работи следната година.
„Не можете, доколку некои градоначалници не се способни да си го распределат нивниот буџет, вие да барате ние од основниот градски буџет место нашите проекти да ги реализираме нивните. Да, ние сакаме да помогнеме меѓутоа половина од она што пристига од средствата кои се одделени од страна на граѓаните си одат во општинските буџети. Нека си се истакнат општинските градоначалници, си имаат свои буџети, нека работат малку. Градот Скопје ќе помогне на секоја од општините, но пред се треба да ја работиме и да ја реализираме програмата за која граѓаните на вас ви дале поддршка и мене ми дале поддршка, а тоа е програмата ‘За модерно Скопје’. Приоритетни се проектите кои се таму наведени, не проектите на општинските градоначалници“, рече градоначалничката Арсовска пред гласањето за амандманот за кој рече дека технички неисправен и несериозен.
Советниците од ВМРО-ДПМНЕ со амандманот предложија дополнителни 35 милиони денари од буџетот на Градот да бидат наменети за обнова и реконструкција на улици, но „за“ гласаа само 16 советници, па амандманот не беше прифатен.
Советот на Скопје денес ја почна седницата на која треба да го изгласа буџетот за следната година, а од почетокот на седницата, пред четири часа, советниците од ВМРО-ДПМНЕ поднесуваат амандмани со разни проекти, а градоначалничката бара или да се повлечат или да се гласа против.
Речиси на секое излегување на говорница градоначалничката Арсовска не испушта можност на советниците од ВМРО-ДПМНЕ да им каже дека нема да дозволи градот да го управува „шпицниот градоначалник“, ги повикува да размислуваат со својот ум место да постапуваат по инструкции од лидерот, а советниците од ВМРО-ДПМНЕ, пак, ја нарекуваат вешт оратор кој посегнува по лидери кога нема одговори на прашањата.
Советниците од ВМРО-ДПМНЕ шест пати побараа од градоначалничката Арсовска прецизно да каже кои нивни проекти од предложените 98 се прифатени, по што таа им рече дека тоа на граѓаните ќе им го соопшти на посебна прес-конференција.
Расправата по амандманите за буџетот на Град Скопје за 2023 година се уште е во тек.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски: Верувам дека нема да зборувам за 61 пратеник, туку за 62 пратеници
Претседателот на ВМРО-ДПМНЕ и иден мандатар Христијан Мицкоски денеска најави водење принципиелна политика со соседите. Како идна Влада, како што рече, на денешното одбележување на годишнината од Разловечкото востание, коалицијата „Твоја Македонија“ ќе се залага за принципот „своето не го даваме, туѓото не го сакаме“, потенцирајки дека нема да се прават избрзани чекори, кои можат „многу“ да ја чинат државата.
Лидерот на ВМРО-ДПМНЕ, Христијан Мицкоски изјави дека по прегласувањето на неколку избирачки места во Изборната единица 5 што ќе се одржи во среда, ќе може да каже дека имаат не 61 пратеник, туку 62 пратеници.
„Фокусирајќи се на народот, имаме историска можност како никогаш досега, во овие повеќе од три децении. Треба да ја довршиме задачата, на 22 мај ќе има прегласување во Изборната единица 5, очекуваме уште еден пратеник таму и веќе на следното мое обраќање верувам дека нема да зборувам за 61 пратеник, туку за 62 пратеници“, рече Мицкоски во изјава дадена во делчевското село Разловци, на одбележувањето на Разловечкото востание.
Мицкоски посочи дека е подобро да се придвижуваме за милиметар, но тој чекор да биде цврст.
„Вие сте свесни дека дека против природата не можеме, како народ сме од најмалубројните народи во Европа. Организацијата која што има често и привилегијата да ги брани интересите на еден од најмалобројните народи во Европа – македонскиот народ, треба да е мудра. Не треба да правиме избрзани чекори кои што може да не чинат многу. Подобро да се придвижуваме за милиметар, но тој чекор да биде цврст. Мора да сме трпеливи, мора да сме попаметни, тројно попаметни од сите и помудри, затоа што само така можеме да опстанеме во круг на многу предатори кои што верувајте не сакаат да ја видат Македонија успешна, не сакаат да ја видат Македонија просперитетна, среќна, Македонија полна со граѓани кои што се задоволни. Тоа го видовте уште во првите денови кога ние не бевме се уште разбудени од оној историски резултат на 8 мај, а веќе почнаа страстите да се вжештуваат, но не само наоколу туку и дома“, рече Мицкоски.
Како идна Влада, додаде, победничката коалиција е подготвена сите тие предизвици да ги совлада, како што рече, трпеливо и со паметна политика која како таква политика ќе се води со соседите.
„Ве повикуваме на градење мостови, ги повикуваме сите на заедничка соработка во рамките на овој наш преубав Балкан. Што се однесува до меѓународната политика нема никогаш да не видите како коленичиме, како се вовлекуваме или како се понижуваме самите себе. Имав можност изминативе години да среќавам светски авторитети од Вашингтон преку Брисел и Берлин и останатите светски важни главни градови. Ништо повеќе за мене не е инспиративно отколку овој преубав македонски народ и ова преубава наша македонска држава, така што ќе имаме и кон нив една политика која што ќе се темели на аргументи, бидејќи никогаш не се плашиме да ги вкрстиме нашите аргументи со аргументите на нашите соговорници“, додаде Мицкоски.
Мицкоски отфрли какво било беспотребно иритирање кон соседите, напоменувајќи дека сепак треба да се почитува елементарното човеково право кое е загарантирано.
Македонија
Нестабилно време со дожд и грмежи до среда
По врнежите и невремето по кое во текот на ноќта полавени беа подруми во Охрид, од УХМР најавуваат дека до среда ќе се задржи нестабилно време, претежно во попладневните часови со локален пороен дожд и грмежи.
Во четврток ќе има услови за краткотраен дожд, претежно во планинските подрачја, а преодно стабилизирање на времето се очекува во петок.
Температурите ќе бидат без значителна промена.
Македонија
Делови од Аеродром, Карпош и Ѓорче Петров утре без струја
Без електрична енергија утре ќе останат делови од општините Аеродром, Карпош и Ѓорче Петров.
Како што соопшти РЦУК – Скопје, без струја во периодот од 09:00 до 15:00 часот ќе останат корисниците на дел од село Долно Лисиче, реонот околу чаталот, ул.10 во општина Аеродром, од 10:30 до 14:30 часот дел од улица 16, на патот кон Визбеговово општина Карпош, а од 13:00 до 14:30 часот објектите на градинката Росица, на ул.„Мечкин Камен“, бр.45А. во општина Ѓорче Петров.