Македонија
Неформална вечера во Атина: Лидерите од Западен Балкан и ЕУ го засилуваат партнерството за стабилност

Претседателот на Владата на Република Северна Македонија, Димитар Ковачевски во рамки на дводневната посета на Атина, вечерва присуствува на неформалната вечера која ја организира грчкиот премиер Киријакос Мицотакис, по повод навршувањето на 20 години од Самитот ЕУ-Западен Балкан во Солун и „Солунската декларација“.
Покрај премиерот Ковачевски, на неформалната вечера присуствуваа претседателите на Европскиот совет, Шарл Мишел и на Европската комисија, Урсула Вон Дер Лејен, лидерите на земјите од Западен Балкан – српскиот претседател Александар Вучиќ, црногорскиот претседател Јаков Милатовиќ, премиерката на Босна и Херцеговина Борјана Кришто и косовскиот премиер Албин Курти, како и премиерите од земји членки на ЕУ од регионот и пријатели на проширувањето – на Хрватска Андреј Пленковиќ, на Романија Јон- Марсел Чолаку и на Бугарија Николај Денков како и украинскиот претседател Володимир Зеленски и претседателката на Молдавија, Маја Санду.
Лидерите изразија силна поддршка и солидарност со украинскиот народ во нивната борба за враќање на слободата и потенцираа дека обединетоста околу враќањето на мирот е недвосмислена.
Во дискусијата на неформалната вечера лидерите од регионот разменија мислења за натамошниот тек на евроинтегративниот процес на земјите од Западен Балкан и беше истакнато дека Западен Балкан е од стратешка важност за Европската Унија, што ќе придонесе и за стабилност и просперитет не само на регионот туку и на Европа во целост.
Лидерите од регионот испратија порака дека како никогаш досега е потребна силна политичка поддршка за побрза интеграција на Западен Балкан во ЕУ.
Ценејќи ги вредностите на Европската Унија засновани на демократијата, владеењето на правото како и почитувањето на основните човекови права и слободи, земјите од Западен Балкан се фокусирани кон европската иднина. Како што стои и во Солунската декларација од пред две децении: „Европа ќе биде навистина обединета само откако сите земји во регионот ќе станат нејзин интегрален дел“.
На крајот од неформалната вечера лидерите усогласија заедничка декларација.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) СДСМ обвинува: Со сомнителен тендер од 4 милиони евра ќе се шијат униформи во МВР, едната од фирмите регистрирана 20 дена пред тендерот

Социјалдемократскиот сојуз на Македонија обвини дека во Министрството за внатрешни работи бил распишан сомнителен тендер во вредност од речиси 4 милиони евра.
Портпаролката, Богданка Кузеска, вели дека се работи за договори од милионски износи кои им се доделени на фирми без никакви капацитети, без претходно релевантно искуство, па дури и без никаква историја на јавни набавки. Една од двете фирми, според зборовите на Кузеска, била отворена 20 дена пред тендерот, додека другата имала само двајца вработени.
„Фирмата ‘Ле Бранд Дизајн’ од Битола, модно студио со просечен годишен приход од едвај 20.000 евра и само двајца вработени, добива тендер од над 2 милиони евра за шиење специјални полициски униформи. До вчера двајца вработени шиеја фустани, денес со двајца вработени треба да опремат специјални единици! Кој е овде наивен? Фирмата „Памитекс Тим“ е регистрирана само 20 дена пред распишувањето на тендерот, без веб-страница, без историја на набавки, без транспарентност. Ете ваква фирма добива тендер од 1.710.000 евра. МВР ги отстранило сите критериуми што би овозможиле транспарентна и правична конкуренција – нема услов за претходно искуство, нема минимум приходи, нема проверка на реални капацитети“, рече Кузеска.
Партијата упати прашања до министерот Панче Тошковски, кој навистина ќе ги шие униформите? Каде ќе завршат парите на граѓаните? Кој ќе одговара ако униформите не стигнат, не бидат со потребниот квалитет, или ако бидат неупотребливи за полициските специјалци? Кој ќе одговара?
СДСМ повика на итна постапка од Јавното обвинителство за сомнежи за злоупотреба на службена положба, местење тендер и можно перење пари, поништување на тендерот и отворање на нова постапка.
Македонија
ДУИ oбвинува за дискриминација на Албанците во Царинската управа

Демократската унија за интеграција вели дека 26 службеници во Царинската управа од македонска етничка припадност биле унапрдени, без ниту еден Албанец.
Од ДУИ обвинуваат дека се води систематската политика на етничко исклучување, која директно го поткопува соживотот и меѓуетничката рамнотежа во државата.
Повикаа на итна реакција од Владата и одговорност од оние кои, како што велат, со своето молчење или учество овозможуваат враќање кон дискриминаторски практики.
Македонија
Таравари го разреши Арбен Фетаи и уште неколку членови на претседателството на Алијансата за Албанците

Крилото на Арбен Таравари во Алијансата за Албанците, го разреши Арбен Фетаи од функцијата претседател на партиското собрание.
Таравари изјави дека се исклучени и некои членови на Претседателството кои јавно се изјаснуваат против Алијансата за Албанците. Се работи за 8 од 46 членови. За Мимоза Муса, Таравари рече дека не е донесена одлука оти не е јасно дефинирано дали останува со Алијансата за Албанците, или со Влен.
Тој рече дека ќе соработуват и со ДУИ, и со ВЛЕН на локалните избори за да им помогнат на Албанците, говорејќи дека нема функција, нема име или позиција што има вредност како една чесна структура која излегува пред граѓаните со чисто лице.
Состанокот и разрешувањето се случуваат во период кога повеќе високи партиски функционери се спротивставија на одлуката на Таравари да ги напушти Владата и коалицијата. За нов претседател на собранието на Алијансата е избран Назим Таипи.
Фетаи за денес во 14 часот најави прес-конференција.