Македонија
Николовски – Кочоска: Преку стратешки пристап до економска трансформација на Македонија
![](https://makfax.com.mk/wp-content/uploads/2024/07/DSC05178.jpg)
Се обврзавме на економска трансформација на Македонија и раст на економијата од 5 проценти. Притоа потребни се реформски политики и поддршка во нивното спроведување на највисоко ниво. Резултатите треба да бидат мерливи преку забрзување на транспортот и трговијата, сузбивање на криминалот и корупцијата, подобрување на условите за водење бизнис и привлекување нови директни инвестиции. Ова беа едни од суштинските пораки на денешниот состанок на директорот на Царинската управа, Бобан Николовски, со министерката за финансии, Гордана Димитриеска-Кочоска, која се одржа во кабинетот на министерката, заедно со директорката на Управата за јавни приходи, Елена Петрова.
На средбата беше истакнато дека е потребна жестока борба против криминалот и корупцијата, како и подигнување на институционалните капацитети, што треба да резултира со повисоки стапки на раст и подобрување на животниот стандард на граѓаните.
„Како креатори на политиките, наша должност е да обезбедиме македонската Царина да испорача повисоки резултати во секој аспект од царинското работење. Ова значи подобрување на институционалните капацитети и испорачување подобри резултати, кои ќе бидат ефективни и мерливи, како и имплементација на нова информатичка технологија, што ќе овозможи сузбивање на криминалот, забрзување на транспортот и генерирање повисоки приходи во буџетот. Стратешкиот пристап е клучен, при што институциите ќе работат заеднички за подобрување на условите за водење бизнис и остварување повисоки стапки на раст на економијата“, истакна Николовски и порача дека лично ќе се осигури секој царински службеник да испорача подобри резултати.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Македонија
Средба меѓу Гаши и хрватската амбасадорка Тигањ: Треба да делуваме како Европејци пред да бидеме дел од ЕУ
![](https://makfax.com.mk/wp-content/uploads/2024/07/3.jpg)
Претседателот на Собранието, Африм Гаши, оствари средба со Нивес Тигањ, амбасадорка на Република Хрватска.
Беше изразено задоволство од средбата меѓу претставници на две пријaтелски и блиски држави, кои немаат меѓусебни отворени прашања.
Гаши искажа голема благодарност за континураната поддршка што Хрватска ја дава на европската перспектива на нашата земја. Реформскиот пат на земјата продолжува, вклучително и усогласувањето со европското законодавство.
Треба да делуваме како Европејци пред да бидеме дел од ЕУ – порача Гаши.
Во двата законодавни дома функционираат групи за пријателство, како потврда за заложбите за поблиска меѓупарламентарна соработка и пријателски врски. Исто така, одлични се и политичките и бизнис релациите, а делуваме и како НАТО сојузници. Хрватска веќе го изоде патот кој ние треба да го одиме и затоа добродојдени се нејзините искуства и практики.
Соговорниците беа согласни дека Западен Балкан треба да биде дел од европското семејство, заедно со сите свои проблеми, кои таму ќе се решаваат.
Амбасадорката Тигањ беше децидна дека Хрватска и понатаму ќе се залага во Брисел кај европските партнери за што поскоро отворање на преговорите за нашата земја и зачленување во ЕУ.
Македонија
Николоски: Во фокусот е модернизација на инфраструктурата и унапредување на регионалната поврзаност
![](https://makfax.com.mk/wp-content/uploads/2024/07/IMG-020c37f99e78eeefe98b656ded5fd340-V.jpg)
Заменик претседателот на Владата и министер за транспорт Александар Николоски, денеска оствари работна средба со директорот на Секретаријатот на Транспортната заедница, Матеј Закоњшек.
На средбата се разговараше за имплементација на Договорот за транспортна заедница кој е во согласност со започнатиот процес на интеграција во европските структури.
Министерот Николоски го потенцираше значењето на реализација на проектите во делот на патната и железничката инфраструктура на Коридорите 8, 10 и 10 -д како дел од Европската мрежа на транспортни коридори. Тој увери за силната заложба на Владата за унаредување и модернизација на истите.
На средбата се отворија и прашања за поголема соработка и поврзаност со земјите од регионот.
„Верувам дека Договорот за основање на транспортна заедница на подолг рок, ќе придонесе за подобрена ефикасност, пониски трошоци и подобар квалитет на услугите за корисниците на транспортот, преку отворање на пазарите и зајакнување на конкуренцијата. Се надевам дека преку спроведувањето на Договорот за транспортна заедница целосно ќе се интегрира регионот во Европското транспортно семејство и ќе ја надополни политиката на проширување на Заедницата“, истакна министерот Николоски на средбата.
Македонија
Меџити се сретна со Гир: Нашиот пат кон евроинтеграциите и чесно и правично владеење е јасно зацртан
![](https://makfax.com.mk/wp-content/uploads/2024/07/medziti-gir.jpg)
Првиот заменик претсeдател на Владата и истовремено министер за животна средина и просторно планирање, Изет Меџити, го пречека амбасадорот на ЕУ, Дејвид Гир.
На средбата што се одржа во просториите на МЖСПП се разговараше за повеќе актуелни теми како што се бескомпромисната борба против криминалот и корупцијата, уставните измени и владеењето на правото. Стана збор и за општата стабилност и европскиот дух на новата Влада.
Министерот Меџити му се заблагодари на амбасадорот Гир за укажаната поддршка на патот кон членството во големото европско семејство.
Од друга страна, европскиот дипломат уште еднаш истакна дека граѓаните на Северна Македонија го заслужуваат најдоброто и дека очекуваат Владата максимално да се посвети во извршувањето на своите обврски.
Меџити упати благодарност за досегашната поддршка на ЕУ Делегацијата во реализација на капиталните инфраструктурни проекти, како и во процесите за пристапување на нашата држава кон Европската Унија.
На средбата се дискутираше и за статусот на тековните проекти и за предизвиците во реализацијата на Секторската оперативна програма за животна средина и климатска акција во рамки на ИПА II. Идентификувани се предизвиците и се реафирмираше личната заложба на министерот Меџити и на Владата за надминување на истите и за забрзување на процесите за реализација на активностите од ЕУ програмските документи преку кои се користат средства од ЕУ фондовите.
На крајот, министерот Меџити вети дека максимално посветено ќе работи за да покаже како се владее правично, чисто и чесно.