Македонија
Николовски се пофали дека Царината за пет месеци сработила колку за три години, но спореди со периодот од 2020 до 2022 година

Директорот на Царинската управа, Бобан Николовски, се пофали дека со засилени контроли за неполни пет месеци сработиле колку што претходно се завршувало во период од три години, но за споредба го избра периодот од 2020 до 2022 година кога границите се затвораа и се пропуштаа само возила што пренесуваа лекови и храна.
„Царинската управа со засилени контроли постигна рекордни резултати годинава. За неполни пет месеци, поднесени се 85 кривични пријави, што е еднакво на вкупниот број пријави поднесени во тригодишен период од 2020 до 2022 година“, рече директорот Николовски.
Царинската управа изминативе месеци работела на сузбивање на долгогодишните криминали со употребувани возила, на злоупотребите и на царинските измами со увоз на храна за избегнување на плаќањето давачки и за сите се поднесени соодветни пријави.
„Годинава, до Основното јавно обвинителство за гонење организиран криминал и корупција и до Основното јавно обвинителство одделението за истраги при секторот за контрола и истраги поднесе 41 кривична пријава против 32 правни и 118 физички лица за сторени кривични дела со 140 возила. Директната штета нанесена на буџетот на Македонија со избегнување плаќање давачки изнесува 14,7 милиони денари или 239 илјади евра“, рече директорот Николовски и појасни дека измамата ја направила организирана мрежа од царински службеници, шпедитери, нотар и полициски службеник.
Откриле „мерцедес“ увезен во јули 2024 година, а прикажан како штотуку увезен, со лажно завршена царинска постапка и форензички докажано фалсификувани потпис и печат на фирма што воопшто не била поврзана со увозот на возилото. За овој случај кривични пријави се поднесени против деветмина.
Во друг случај откриле дека увозник, со помош на царински застапник, во период од 2022 до 2024 година увезувал автомобили и за нив употребувал лажни податоци за да не ги плати давачките кон државата во износ од 1,6 милион денари. На тој начин успеал да увезе вкупно 34 автомобили.
„Станува збор за 34 автомобили, со вкупна вредност 145.251 евро, при што осомничените при царинење автомобили ги декларирале како моторни возила за превоз на стока за да избегнат плаќање данок на моторни возила. За овој случај дополнително се наплатени 1,6 милион денари и се поднесени кривични пријави против две правни и две физички лица“, извести директорот Николовски.
Откриле и пет случаи во кои увозници на месо го тарифирале месото со пониски каматни стапки за да не платат 1 милиони денари или 178,9 илјади евра. Парите се наплатени, а против сторителите се поднесени соодветни пријави.
Директорот рече и дека на граничниот премин Пелинце, каде што со години немало записник за царински прекршок кој завршил со кривична пријава, спречен е обид за шверцување на злато и сребро во вредност од 2,4 милиона денари или 39 илјади евра.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Герасимовски: Од Капиштец почнува караванот „Се гледаме во маало“

Градоначалникот на Општина Центар, Горан Герасимовски, утрово на брифинг појадок со новинари најави дека караванот „Се гледаме во маало со Горан Герасимовски“ отпочнува денеска од населбата Капишец, а ќе трае до 4-ти јули.
Герасимовски потенцираше дека преку овој караван, граѓаните ќе се информираат за тоа што е реализирано во изминатите три ипол години, но исто така центарци ќе можат да дадат и свои идеи, сугестии и предлози за поубав Центар.
„Караванот почнува денеска и ќе трае до 4-ти јули. Заедно со граѓаните ќе креираме политики и идеи и ќе ги реализираме. Самиот караван почнува од населбата Капиштец, од детското игралиште кај Зебра. Со општинските служби ќе бидеме заедно со граѓаните и ги слушаме сите нивни предлози и идеи, она што го правиме во текот на годините преку буџетските форуми, истражувањата, анкетите. Нашата цел е да ги слушнеме центарци за нивните предлози и идеи. Се гледаме вечер во маало“, рече Герасимовски.
Македонија
Салата Работнички ќе биде готова до октомври, Герасимовски вели дека лично тој, редовно прави увид

Салата „Работнички“ чија реконструкција по 50 години почна во јануари годинава, ќе биде готова до октомври. Градоначалникот на Општина Центар Горан Герасимовски денес извести дека редовно оди во контрола на градилиштето.
„Во полн ек е работата на салата Работнички. Добро одат градежните работи. Имаме редовни увиди од страна на службите, но и од моја страна за да видиме како течат самите работи. Планираме септември-октомври, доколку се оди во најдобар ред, доколку навремено се исплаќаат сите оние ситуации кои што се доставуваат од фирмите кои што работат на салата, верувам дека до октомври месец истата ќе биде отворена“, вели градоначалникот Герасимовски.
Спортската сала „Работнички“ се реконструира со пари од државниот буџет. Во декември 2023 година Владата изгласа 30 милиони денари да бидат префрлени на Општина Центар за оваа намена, а оваа година Општината од Владата доби дополнителни 1,5 милион евра.
Проектот предвидува нов покрив, фасада, проширен терен, нова еластична подлога, подно греење, климатизација, модерно осветлување и на местото на бетонските клупи да бидат поставени 891 седиште.
Македонија
Арсовска до Стојкоски: Дали ги праша жителите на Ѓорче Петров дали сакаат хемиски фабрики и над 30 висококатници?

Градоначалничката на Град Скопје, Данела Арсовска, го обвини градоначалникот на Ѓорче Петров, Александар Стојкоски, дека молчи за дивоградби и висококатници кои одобрил да се градат на булевар на небезбедна одалеченост. Таа го повика Стојкоски да организира референдум за ѓорчепетровци да кажат дали сакаат своите деца и домови да им се наоѓаат меѓу хемиски фабрики.
„Стојкоски, освен твоите другарчиња од штаб, сите останати знаат да читаат, тоа ти е сега најголемиот проблем.
Дали ти ги праша жителите на Ѓорче Петров дали тие сакаат хемиски фабрики на 157.000 m2 и над 30 висококатници да се градат сред општината? НЕ! И покрај тоа што како град Скопје дадовме негативно мислење за овој ДУП, ти упорно сакаш да убедиш некој дека хемиски фабрики е супер да се градат во Ѓорче, а ги молчиш дивоградбите таму и висококатниците кои си дал амин да се градат на булевар на небезбедна одалеченост. Никому јас не стварам никаква несигурност, освен на тебе и твоите пајташи!
Ајде сега читај и гледај фото:
1: Како изгледаше ДУПот во Ѓорче Петров 2: Како изгледа ДУПот што си го изгласал за кој имаш негативно мислење од Град Скопје
3: Како изгледа сега таа локација сред Ѓорче
4: Во твојот ДУП објект Хемиска фабрика 1
5: Во твојот ДУП објект Хемиска фабрика 2
6: Во твојот ДУП објект Хемиска фабрика 3
7: Стојкоски кога лаже 1
8: Стојкоски кога лаже 2
Целиот ДУП е достапен на твојата веб страна за ова да си го видат граѓаните: https://opstinagpetrov.gov.mk/wp-content/uploads/urbanizam/vazecki_urbanisticki_planovi/dup_gradska_cetvrt_sz_16_17_02_2024/sintezen_sz_16_gp.pdf
Бидејќи многу сакате референдуми Стојкоски, направи сега еден да ти кажат ѓорчепетровци лично дали сакаат своите деца и домови да им се наоѓаат меѓу хемиски фабрики!“, напиша Арсовска на „Фејсбук“.