На денешниот Управен одбор на ЗЕЛС, претседателот на ЗЕЛС Орце Ѓорѓиевски, градоначалниците, заедно со министерот за внатрешни работи Панче Тошковски, дискутираа за системските решенија за превенција и рана детекција на шумски пожари и поплави. Главен акцент беше ставен на унапредување на координацијата меѓу институциите и преземање конкретни чекори за спречување на природни катастрофи.

Претседателот на ЗЕЛС, Орце Ѓорѓиевски, истакна дека превентивните мерки мора да бидат приоритет на сите локални самоуправи.

„За да ја намалиме опасноста од шумски пожари и поплави, неопходна е континуирана координација меѓу сите институции. Локалните самоуправи треба активно да работат на чистење на атмосферските канали и одржување на речните корита, а во шумските подрачја да се направат засеци кои ќе спречат ширење на пожарите. Разговаравме и со претседателот на Владата, од каде добивме уверување дека ќе се зајакнат капацитетите на противпожарните бригади, што е клучно за поефикасно справување со овие предизвици“, истакна претседателот на ЗЕЛС Ѓорѓиевски.

На состанокот, од страна на министерот за внатрешни работи Панче Тошковски, беше потенцирана и потребата од ставање во функција на целокупната расположлива механизација и противпожарни возила, како и идентификација на критичните точки каде што е неопходна итна интервенција на државата. Дополнително, беше најавено зголемување на капацитетите за справување со кризни ситуации, вклучително и подготвеност на авионите за брза реакција во претстојната сезона.

Основното јавно обвинителство Кочани ја запира постапката против Александар Карадакоски, кој денеска почина по повредите добиени во пожарот во дискотеката „Пулс“ во Кочани, а во која тој бил управител.

„Со оглед на тоа што денешната 60-та жртва од катастрофалниот пожар во Кочани е лице што претходно беше опфатено со наредбата за спроведување истражна постапка, во својство на управител на правно лице, Основното јавно обвинителство Кочани, по прибавување на официјалната документација за настапената смртна околност, ќе донесе наредба за запирање на истражната постапка за него“, соопштија од Јавното обвинителство.

Министерот за здравство Арбен Таравари утрово потврди дека Карадакоски им подлегнал на повередите во болницата во Литванија, каде што беше на лекување.

Валентин Манасиевски, член на ЦК на ВМРО-ДПМНЕ, го обвини Димитар Апасиев дека купил деловен простор во Центар за 721 евра м2. Тој обвини и дека се крие договор под маса меѓу Апасиев, извршителот и банката за купување на деловниот простор во строгиот центар на Скопје.

„Апасиев да каже како купил деловен простор во строг Центар на Скопје за 721 евра м2. Пропаднатиот аскет во обид, Апасиев е целосно демаскиран. Тој на 26.11.2024 година преку Левица купил 409м² деловен простор во строгиот центар на Скопје, зад седиштето на компанијата А1, по цена и до три пати пониска од пазарната. Левица на Апасиев за м² платила 721 евро, во услови кога м² не може да се купи под 2000 евра. Дополнително, овој имот Левица го купува преку извршител, што значи истиот е одземен од некој граѓанин или од фирма“, тврди Манасиевски.

Според него, се поставува логичното прашање, како извршителот не можел да постигне цена на објект во строг центар на Скопје, анимирал ли доволно потенцијални купувачи или целиот процес го водел многу тивко?

Манасиевски прашува дали се крие договор под маса помеѓу извршителот – Апасиев и доверителот?

„Доверителот во овој случај е УНИ банка, со бугарски капитал. Се поставува прашањето како банката дозволила и не анимирала свои клиенти за наддавањето? Особено кога се зема во предвид дека во банките се даваат кредити за слични објекти и станови на граѓани во градба кога м² се проценува и над 2000 евра? Која е економската логика на банката тука? Дали зад ова купување се крие нешто повеќе и што“, праша Манасиевски и ги повика надлежните институции да истражат.