Претседателот на Владата на Република Северна Македонија, Христијан Мицкоски при посета на Општина Брвеница одговарајќи на новинарско прашање, дали има нови инвестиции, приоритет на којшто Владата е силно фокусирана, информираше дека во државата, на домашниот пазар има една нова инвестиција којашто е завршена и уште неколку коишто се во процес на завршување.

Премиерот очекува бројот на странски инвестиции во државата значајно да се зголемат до крајот на годината.

„Да, да тоа е исто така убава, добра вест. Имаме една нова инвестиција којашто е веќе завршена и уште неколку коишто се во процес на завршување. Очекувам до крајот на годината и тие да ги завршиме, ова е инвестиција на компанијата „Бреjнчаjлд“. Вредноста е некаде околу осум и пол милиони евра и очекувам и таа да вработи околу стотина луѓе. Веќе ја закупија парцелата во зоната Жабени, почнуваат да ја градат првата хала од 3.000 квадратни метри.

Така што во периодот којшто следи ќе бидеме сведоци на уште нови и успешни вести и очекувам бројот на странски инвестиции драматично да се зголеми до крајот на годината“, изјави Мицкоски.

Носењето на нови странски инвестиции значи и отворање на нови работни места и поквалитетен и подобар животен стандард за граѓаните. Затоа Владата посветено работи и ќе продолжи да работи и во иднина за силен економски развој и целосна трансформација на државата. Да се отвораат нови работни места, добро платени, за младите да има услови, да останат да работа, инвестираат и живеат во државата, наместо да се селат во странство, истакнуваат од неговиот кабинет

Утрешниот ден, 18 октомри, ќе биде Ден на жалост во Велес, поради сообраќајната несреќа кај Катланово во која животот го загубија три лица од овој град.

Градоначалникот на Велес, Марко Колев изрази сочувство до семејствата на загинатите сограѓани.

„Трагедиите како оваа која се случи вчеравечер ни ја покажуваат кревкоста на животот и не потсетува на она што е навистина важно. Искрено сочувство до семејствата на загинатите сограѓани во сообраќајната несреќа, нашите мисли и молитви остануваат со повредените и посакуваме побрзо опоравување. На денешната седница на Советот на Општина Велес со едноминутно молчење ја искажавме нашата тага и жал, и по итна точка на дневен ред Советот донесе одлука утрешниот ден да биде ден на жалост во Велес“, сподели Колев.

МВР претходно денес објави дека загинале три лица во сообраќајната несреќа што се случи вчера попладне на автопатот Скопје – Велес, пред тунелот кај Катланово кога се преврте комбе.

Загинатите се А.Н.(37), Ј.А.(47) и Д.Ц.(66), сите од Велес.

Од овој град се и лицата кои се здобија со тешки телесни повреди – возачот О.Д. и сопатниците З.С.(59), В.З.(67), Н.Н.(33) и Б.П.(41).

Според информациите од МВР, до несреќата дошло кога комбето во кое се превезувале излетало од патот и се превртело.

Денес во село Белчишта свечено беше отворен Изложбениот центар за Белчишко Блато / Природнонаучна и етнолошка збирка/ .

Изложбениот центар е дел од проектот „Подобрување на конзервацијата на приоритетните растенија во прекуграничната област”,conse-pp, проект кој општина Дебрца го имплементираше со своите партнери од Македонија и Грција, со средства обезбедени од ИПА програмата за прекугранична соработка Македонија-Грција и во чии рамки беше реконструиран и опремен стариот објект во центарот на село Белчишта, каде е сместен Изложбениот центар.

Градоначалникот Зоран Ногачески објави дека во Центарот преку текстови, фотографии и други содржини прикажани се многу сегменти од биодиверзитетот / флората и фауната/ ,со кој располага Белчишкото Блато, најголемото блато, сочувано во неговата оригинерна форма.

„Со отворањето на Центарот општина Дебрца добива уште еден атрактивен простор, преку кој се репрезентира дел од природното богатство на Дебрца, кое е дел од светското природно наследство. И во оваа прилика изразувам голема благодарност до Делегацијата на ЕУ во Македонија,која финансиски ја помогна реконструкцијата и опремување на објектот, во кој е сместен Изложбениот центар. Исто така, изразувам благодарност и до Здружението за екологија и туризам “Екотуризам 2016”, Охрид,кое заедно со општината годиниве работеше на повеќе проекти за Белчишкото Блато, од кои најзначајни се тие за изготвување на целокупната документација за оправданоста за прогласување на Белчишкото Блато за заштитено подрачје,во категорија “Парк на природата”,постапка која е во тек“, изјави Ногачески.

Како што додаде, тимот на „Екотуризам“, на чело со Ѓоко Зороски и општинскиот тим се погрижија за креирање на сите содржини внесени во центарот.

Целта е Изложбениот центар да биде дел од промовирањето на Белчишкото Блато до сите засегнати чинители – туристи, посетители, ученици, стручна јавност, а Белчишкото Блато да го добие заштитениот статус и по националната регулатива и како идно европско заштитено подрачје, во рамките на Натура 2000.