Македонија
Никој во здравството нема да земе плата ако им се намалат 21 отсто примањата на вработените во Фондот за здравство, ќе штрајкуваат

Вкупно 831 вработен во Фондот за здравствено осигурување на Македонија (ФЗОМ) ќе штрајкуваат доколку Управниот одбор, постапувајќи по насоки од Владата, им ги намали платите 21 отсто сметајќи од почетокот на месецот. По осум месеци преговори минатата година, Синдикатот успеа да издејствува 15 отсто покачување на платите на вработените. Зеле една плата со покачување, а на почетокот на овој месец добиле препорака од Владата примањата да се намалат 21 отсто поради усогласување со усвоениот буџет. Вработените сметаат дека намалувањето на платите за процент поголем отколку покачувањето што го добиле во декември е под секое достоинство.
„Намалувањето значи 25 отсто од вработените паѓаат под минималната плата и уште 25 отсто доаѓаат на минималната плата, што не е дозволиво за толкава институција, институција што го има најголемиот буџет во Република Македонија, и тоа ликвиден. Доколку ги намалат платите, ќе се активира одлуката за штрајк, која беше донесена во ноември. Апсолутно прекинуваат сите неесенцијални функции на Фондот за здравствено осигурување. Освен по едно лице што ќе прима документи, другите воопшто нема да работат. Тоа во превод значи дека нема да има никакви исплати ниту за капитација за матичните лекари, ниту за лекови за аптеките, ниту за плати во јавното здравство, ниту за лекови во јавното здравство и така натаму“, најави Бранко Аџигогов, претседател на Синдикатот на Фондот за здравствено осигурување при Синдикатот на работниците од управата, правосудните органи и здруженијата на граѓани (УПОЗ).
Управниот одбор на Фондот денес шести пат се состанува за да донесе одлука за намалување на платите по препораката од Владата. Претседателот на Синдикатот, Аџигогов, вели дека Управниот одбор се мачи да ја донесе одлуката оти е длабоко поделен. Тројца од членовите, како што вели, се цврсто застанати зад Синдикатот, еден е неопределен и двајца гласаат за намалување. За носење каква било одлука, без разлика дали е за намалување на платите или тие да останат на истото ниво, потребно е мнозинство, односно четири гласа.
Претседателот на Синдикатот на УПОЗ, Трпе Деаноски, вели дека иако е несвојствено за претседател на Синдикат, тој најмалку сака да има штрајк на вработените во ФЗОМ оти најпогодени ќе бидат граѓаните.
„Доколку се донесе ваква одлука со намалување, мене ми е жал што ќе кажам, ќе страдаат само граѓаните. Ќе страдаат луѓето што се на боледувања. Нема да се работи воопшто ништо какви притисоци и да имаме и какви притисоци и да имаат вработените зад нас, кои се членови на Синдикатот на УПОЗ“, рече Деаноски.
Тој потсетува дека Фондот е самостојна институција и Владата нема ингеренции да бара нешто од Фондот. Фондот има буџет од речиси 46 милијарди денари, од кои за плати одат 1,19 отсто.
„Колегите зад мене од подрачната во Скопје имаат најниски плати како административци во државата. Решаваат предмети што се во вредност од и од над сто, двесте и триста илјади евра, но и над милион евра. Праќаме луѓе на лекување, имаме доктори, фармацевти, инспектори, кои имаат плата од 25 до 27.000 денари. Тоа е под секое човечко достоинство. Да бидам јасен и гласен, ова барање е од министерот за финансии, Фатмир Бесими. Министерот побара, а Владата го поддржа да се намалат платите 21 отсто. Не знам каде ќе му оди душата на тој човек. Треба да почне да си ги гледа вработените. Секој ден ни заминуваат колеги, секој ден сме помалку и помалку вработени. Од нас се бара да ги извршуваме можеби најсложените работни задачи од здравственото осигурување во државата, што е примарна дејност на Фондот за здравство“, рече Деаноски.
Претставници на Синдикатот и некои од вработените пред зградата на Фондот во Скопје чекаат Управниот одбор да донесе одлука. Велат дека вработените цел јануари доаѓаат на работа иако не знаат за колкава плата работат оти препораката од Владата им стигнала на 4 јануари, од кога Управниот одбор се состанува шестпати за да донесе одлука.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сабри Азири: Бујар Османи поминал повеќе од 10 години на власт, но ниту еден ден за Чаир

Сабри Азири, портпарол на изборниот штаб на кандидатот за градоначалник на Општина Чаир од коалицијата „Влен“, Изет Меџити, на прес-конференција зборуваше за политичката кариера на Бујар Османи и отсуството на резултати за граѓаните на Чаир.
Според Азири, Бујар Османи поминал 3.672 дена на високи државни функции, и тоа како министер за здравство (27 јули 2008 – 28 јули 2011) → 1.096 дена, вицепремиер за европски прашања (31 мај 2017 – 30 август 2020) → 1.187 дена, министер за надворешни работи (30 август 2020 – 23 јуни 2024) → 1.389 дена, претседавач со ОБСЕ (1 јануари 2023 – 31 декември 2023) → 365 дена.
Вкупно, 10 години и 22 дена на министерски и извршни позиции, пресмета Влен.
Сепак, во текот на сето тоа време, Азири рече дека Османи ниту еден ден не посветил на чаирчани.
Тој посочи неколку факти кои, според него, ја покажуваат хипокризијата на Османи: Нула дена за чаирчани – два дена со Сергеј Лавров во Скопје. Нула дена за чаирчани – една недела со Никола Груевски во Будимпешта. Нула вработувања за чаирчани – додека сопругата е вработена во АЕК, сестрата во М-НАВ, а бизнисот на братот на Османи напредува.
„Ова е реалниот биланс на Бујар Османи по повеќе од една деценија на власт. Затоа, денес тој нема образ да им ја побара довербата на граѓаните на Чаир“, заклучи Азири.
Македонија
Поранешниот директор на струмички „Комуналец“ пријавен за злоупотреби и бесправна градба

Полицијата во Струмица до Основното јавно обвинителствоподнесе кривична пријава против З.Г. (56) од Струмица – поранешен директор на Јавното претпријатие за комунални дејности „Комуналец“ Струмица, против јавното претпријатие, против Г.Б. (52) од Струмица и против правно лице од Струмица поради постоење на основи на сомнение за сторено кривично дело „бесправно градење“ по член 244-а во врска со член 22 од Кривичниот законик.
Јавното претпријатие, застапувано од З.Г. и правното лице, застапувано од Г.Б., со заеднички дејствија изградиле објект од втора категорија, кој се користел како деловен објект, без издадено одобрение за градење од општина Струмица.
СВР Струмица поднесе кривична пријава против поранешниот директор и поради постоење на основи на сомнение за сторени две кривични дела „злоупотреба на службената положба и овластување“ по член 353 став 1 во врска со член 45 од Кривичниот законик.
Во првиот случај, пријавениот З.Г. склучувал договори за закуп на простор пред објект – настрешница со правно лице од Струмица, која била бесправно изградена на зелена површина. Договорите биле склучувани со непосредна спогодба иако станувало збор за простор за кој согласно Законот за комуналните такси е потребна согласност од општината и наплата на комунална такса. На тој начин била нанесена штета на буџетот на општина Струмица, а ЈПКД „Комуналец“ Струмица остварило финансиска корист во вкупен износ од 847.126 денари.
Во вториот случај, во периодот од 2020 до 2023 година, З.Г. од истото правно лице вршел набавка на храна и угостителски услуги без спроведување на постапка за јавна набавка согласно Законот за јавни набавки, со изговор дека храната била за работници кои работеле прекувремено. Во фактурите нема детално објаснување за набавките, ниту поткрепувачка документација за тоа кои лица користеле оброк и дали работеле ноќе или прекувремено, а претпријатието немало план за работа во смени. Со ваквите дејствија била причинета штета на претпријатието во износ од 307.800 денари.
Македонија
Мисајловски и Хелез на првиот академски час на Воената академија: Академијата е симбол на знаење и лидерство, со високо реноме и квалитетна настава

Денеска (01 октомври), министерот Владо Мисајловски и министерот за одбрана на Босна и Херцеговина, Зукан Хелез кој престојува во официјална посета на земјава присуствуваа и се обратија на првиот академски час на Воената академија, со што и официјално започна новата учебна година за идните офицери.
На новите питомци, министерот Мисајловски им порача да бидат горди што се дел од етаблирана и регионално позната Академија која ги создава идните лидери за македонската Армија и за вооружените сили на неколку земји од регионот.
„Вие сте срцето на татковината, од вас ќе излезат нови генерали, офицери. Гордост е да се види оваа слика со македонската униформа, но и со питомците од пријателски земји кои се заедно со нас“, им порача министерот Мисајловски на питомците. Додаде дека со вклучувањето на питомци од Босна и Херцеговина и Црна Гора, ја развиваме регионалната соработка, а Академијата е симбол за знаење и лидерство. „Бидете силно ангажирани, покажете како се сака татковината зашто вие сте иднината на Армијата“, рече Мисајловски.
Министерот Хелез истакна дека целите – стабилност, мир и членство во евроатлантските структури не се само политички аспирации, туку потреба за нашите народи за сигурност, просперитет и достоинствен живот. „Министерството за одбрана и вооружените сили на Босна и Херцеговина продолжуваат со интензивните реформи, за да бидеме целосно интероперативни со силите на НАТО и во согласност со европските стандарди. Во тој процес, искуствата и поддршката од земјите како вашата кои поминаа низ тие фази за нас се драгоцени“, рече министерот.
На првиот академски час се обрати и деканот на Воената академија, полковникот Ненад Танески на питомците им порача дека „униформата која ја носите е симбол на чест, доверба и служба, кон татковината и кон регионалната безбедност и мир“, укажувајќи дека средбата во ист состав, по четиригодишното образование, кога питомците ќе бидат промовирани во потпоручници, ќе биде најдобрата потврда за заедничкиот успех.