Македонија
Нова велосипедска патека пред главната пошта
Пешачката површина пред објектот на главната пошта во центарот на градот од денеска има нов лик, изградена е нова велосипедска патека, поставени се клупи и канти за отпадоци, како и жардиниери со ниско украсно зеленило со сопствен систем за наводнување.
„Градот Скопје преку ЈП ‘Паркови и зеленило’ и другите јавни претпријатија работи на ослободување на јавниот простор за потребите на пешаците и на велосипедистите, но и на уредување на зеленилото во нашиот град. Се наоѓаме на место каде што минатата година засадивме 16 јавори со систем капка по капка за да ги заштитиме овие дрвја. Оваа година ја изработивме оваа прекрасна жардиниера која ќе го одвојува движењето на пешаците и велосипедистите од преостанатиот сообраќај, а движењето на овој дел ќе го направи попријатно и за едните и за другите. Намерно ги оставивме плочките на кои се обележани паркинг-места со цел граѓаните да ја видат и да ја сфатат разликата од минатото и сега. Порано на јавните простори се паркираа возила, а сега јавните простори ги користиме за тоа за што се наменети – за пешаците и за велосипедистите. Истата слика ја имаме овде во близина, наспроти Соборната црква и во делот кај ‘Тинекс’, каде што беше паркиралиште. Ни останува овој потег кај Градски ѕид, којшто во наредниот период ќе го ослободиме од возила и ќе го уредиме во сличен стил“, изјави градоначалникот Шилегов.
Тој додаде дека Градот Скопје го стимулира алтернативниот начин на транспорт на граѓаните – велосипедизмот, пешачењето и електричните тротинети за да покаже дека ваквиот начин на транспорт е поедноставен, полесен и подобар за движење низ урбаната средина.
„Градот Скопје тука нема да застане, ова е почеток на она што ние го нарековме ‘микро 20’, односно годинава очекувам да уредиме 20 локации. Мислам дека е видлива разликата како порано беше третирано зеленилото и како беше запуштано откако ќе беше поставено на некоја локација. Скопје загуби 70 проценти од зеленилото во Малиот ринг во лудилото на проектот ‘Скопје 2014’. Имаме обврска него да го надоместиме и секојдневно работиме на тоа“, нагласи Шилегов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Боки-13 за операцијата „Бумеранг“: поднесе кривични против Заев, Спасовски, Русковска
Бојан Јовановски-Боки 13 поднел кривични пријави против поранешниот премиер Зоран Заев, ексминистерот за внатрешни, Оливер Спасовски, и двајцата генерални секретари на СДСМ, поранешниот Александар Кирацовски и актуелниот Миле Зачевиќ, како и против поранешната шефица на Јавното обвинителство за гонење организиран криминал и корупција, Вилма Русковска.
Тој дошол во Обвинителството на покана на актуелниот шеф на оваа институција, Ислам Абази.
Најави дела кривично-правната операција е наречена „Бумеранг“.
„Сите мои наводи и описот на настаните ќе бидат материјализирани со докази што потекнуваат од мојот телефонски уред, кој ми беше одземен при моето апсење во предметот ‘Рекет’. Се работи за кривични дела што се однесуваат на злоупотреба на службената положба и овластувањето, за изборни измани, незаконско финансирање политичка партија, злоупотреба на јавните набавки“, додаде тој.
Најави и продолжение на предавање докази во писмена форма.
„Поднесена е кривична пријава и против Вилма Русковска за злоупотреба на службената положба, примање поткуп, примена на тортура. Зоран Заев е речиси во секоја пријава“, рече Јовановски.
Македонија
Мицкоски на средба со коалицијата: доби поддршка за почнување преговори за состав на идната влада
Претседателот на ВМРО-ДПМНЕ, Христијан Мицкоски, денеска оствари средба со претседателите на партиите во состав на коалицијата „Твоја Македонија“.
Беше констатирано дека коалицијата оствари успешен и историски резултат, кој создава и одговорност за реализирање на очекувањата.
Мицкоски доби поддршка од претседателите на коалициските партии за почнување преговори за состав на идната влада.
Според заклучокот на состанокот, разговорите треба да се водат врз основа на постулати за забрзан економски развој на Македонија, силна борба против криминалот и корупцијата и европските интеграции врз база на принципи и вредности, соопштија од партијата.
Македонија
Лукаревска: СДСМ секогаш бил достоинствен поради зрелоста на неговите раководства да се соочат со поразот и одговорноста, јас не сакам да бидам исклучок
Изборните резултати ги искушуваат нашата искреност како политичари и искреноста на нашите зборови дека сме ја разбрале вашата порака, напиша на социјалните мрежи потпретседателката на СДСМ, Сања Лукаревска, откога неколку членови и партиски функционери во СДСМ претходно си поднесоа оставки.
СДСМ, додава таа, секогаш бил достоинствен и поради зрелоста на неговите раководства да се соочат со поразот и со одговорноста.
„Јас не сакам да бидам исклучок. Благодарам за укажаната доверба да бидам заменик-претседател на СДСМ. И таа должност ја извршував со почит, совесно, одговорно и чесно. Секако, со поддршка од сопартијците и незаменливата потпора од моите родители. Благодарам е најмалку што можам да им речам.
Горда сум што 8 мај беше празничен ден за демократијата. Тоа беше и суштината на борбата на СДСМ за ослободување од ‘заробената’ држава. Воедно, им благодарам на сите граѓани за секој глас за СДСМ, особено во Третата изборна единица. Вредна за внимание е и пораката од оние што не излегоа на гласање, како и на оние што гласаа против.
На ред е нашата внатрепартиска средба со вистината. На отчетниот конгрес на СДСМ неминовна e отворена, искрена и самокритична анализа на нашите погрешни чекори, на лошите кадровски решенија, како и за нашата немост за успешните политики што ги спроведовме во исклучително тешки услови предизвикани од светските кризи.
Го презедовме товарот и на тешките политички одлуки. Но, тоа е СДСМ кому државата, нејзината стабилност и иднина секогаш му биле пред сė друго. Така било. Така мора и да остане“, порача во напишаното Лукаревска.
Оценува дека на Македонија ѝ потребен СДСМ.
„Што побргу заедно ја консолидираме партијата толку побргу ќе можеме да кажеме – тука сме. Јас верувам во СДСМ, а уште повеќе во неговата сила да се реформира, да се обедини и да се подготви.
Честитки на победникот и на сите 120 пратеници.
Во искреното соочување со причините за изборниот пораз е нашата прва победа. Тоа е најмалку што им го должиме на сопартијците, на симпатизерите и поддржувачите на СДСМ, но и на демократска Македонија“, додава Лукаревска.