Денес, во Драчево започна уредувањето на коритото на реката Мала Рада, значаен инфраструктурен проект кој ќе ја зголеми безбедноста од поплави и во целост ќе го унапреди квалитетот на живеење. Проектот, вреден 30.800.000 денари, е одобрен од Владата на Република Македонија во рамки на финансирањето на капитални проекти за општините. На означувањето на почетокот на градежните активности покрај градоначалникот на Општина Кисела Вода, Орце Ѓорѓиевски, присуствуваа премиерот Христијан Мицкоски, вицепремиерот Изет Меџити и министерот за локална самоуправа Златко Перински. Градоначалникот Ѓорѓиевски во својата изјава се заблагодари на поддршката од Владата, истакнувајќи дека овој проект е само дел од пошироката стратегија за подобрување на инфраструктурата во општината, при што веќе се подготвуваат нови проекти за дополнително унапредување на локалната заедница.

-На мое големо задоволство, денес, заедно со премиерот Христијан Мицкоски, како и со вицепремиерот Изет Меџити и министерот за локална самоуправа Златко Перински, сме заедно во Драчево, каде започнуваат градежни активности за уредување на на бетонското корито на реката Мала Рада. Се работи за проект за кој Општина Кисела Вода аплицираше, а Владата на РМ го одобри во рамки на финансирањето на капитални проекти за општините. Истиот чини 30.800 000 денари и е значаен од повеќе аспекти. Реката Мала Рада се протега долж целото село Драчево пред вливањето во реката Вардар, во должина од 2.5км. Рехабилитацијата на бетонските профили и санацијата на потпорните косини ќе овозможат поголема пропусност на водотокот и значително ќе го намалат ризикот од поплави. Истовремено, овој проект ќе ја подобри урбаната слика на нашиот регион и ќе создаде подобри услови за квалитетен живот. Во оваа прилика, сакам да изразам благодарност до Владата на Република Македонија и до Премиерот Христијан Мицкоски за поддршката и одобрувањето на средствата за овој проект, кој е важен дел од нашите напори да го унапредиме квалитетот на животот на нашите граѓани. Воедно, сакам да истакнам дека како дел од оваа целина, Општина Кисела Вода аплицира за изградба на пешачка патека од бехатон елементи долж левата страна на реката Мала Рада, која ќе биде опремена со урбана опрема како клупи, канти за отпадоци, и осветлена со канделабри. Ова ќе биде ново место каде нашите граѓани ќе можат да го поминуваат своето слободно време и да уживаат во природата. Со ова дополнување на проектот, се заокружува целокупниот процес на подобрување на инфраструктурата на овој дел од општината.

Во оваа прилика сакам да истакнам дека во рамките на новиот повик од Владата, Општина Кисела Вода веќе достави 6 целосно подготвени проекти, а до крајот на рокот планираме да доставиме вкупно 22 проекти. Во моментов работиме на подготовка на техничката проектна документација за сите овие проекти, како и на реализацијата на претходно одобрените проекти, меѓу кои се реконструкцијата на патот до манастирот Пеленица и реконструкцијата на улицата Ѓорѓи Димитров. Во тек е и тендерска постапка по која започнуваме и со доградба на ООУ Кирил Пејчиновиќ. Со неа ќе се добијат 6 нови училници со капацитет за 180 деца и ќе се овозможи едносменска настава.

Апелирам до сите останати општини да ги подготват своите проекти на квалитетен начин и да аплицираат за оваа поддршка, бидејќи капиталните проекти се клучни за развојот на нашето население и подобрување на квалитетот на животот на сите наши граѓани. Сите овие проекти носат значајни придобивки и ја покажуваат посветеноста на Владата и општините во обезбедување подобри услови за живеење и развој-изјави градоначалникот Орце Ѓорѓиевски. Претседателот на Владата Христијан Мицкоски му честиташе на градоначалникот и неговиот тим, за добрата подготвеност на проектите, како и на борбата и желбата да се направи проект повеќе, а задоволство од реализацијата на ваквите капитални пректи изразија и вицепремиерот Изет Меџити и министерот за локална самоуправа Златко Перински.