Македонија
Нова фудбалска историја! Македонија оди во бараж за СП

Македонската фудбалска репрезентација продолжува да испишува нова фудбалска историја, откако по тензичната, но заслужена 3:1 победа над Исланд, првпат се пласира во бараж на едно Светско првенство, завршувајќи ги настапите во групата Ј со историско второ место.
Во меч во кој бевме апсолутно доминантни од почеток до крај, во еден момент во второто полувреме бевме под импресија дека ќе ја пропуштиме големата шанса откако гостите израмнија, но ја вративме контролата на играта, со малку среќа стигнавме и до втор гол и до фантастична петта победа во квалификацискиот циклус.
Езѓан Алиоски уште во 7. минута ги израдува фановите на арената „Тоше Проески“ со прекрасен гол покажувајќи ја својата класа. Доминацијата во првото полувреме беше потврдена и со вториот гол на Дарко Чурлинов, но тој беше поништен поради минијатурен офсајд.
Во второто полувреме, Исланѓаните успеаја да израмнат преку Торстеинсон во 54. минута, но тимот на Благоја Милевски бргу се созеде и продолжи со нападите кон исландскиот гол, што резултираше во враќање на водството во 65. минута преку Елиф Елмас, откако со малку среќа ударот на Алиоски дојде пред неговите нозе. Исланд, кој покажа груба игра, остана со играч помалку по црвениот картон на Јоханесон во 79. минута, по што Елмас во 87. минута ја потврди големата победа.
КВАЛИФИКАЦИИ ЗА СП, ГРУПА Ј
Македонија – Исланд 3:1
Лихтенштајн – Романија 0:1
Ерменија – Германија 1:4
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Милевски: Виница 4 години назадува, катастрофално владеење на Петков и ВМРО-ДПМНЕ

Така наречениот отчет на градоначалникот Миле Петков и ДПМНЕ е најдобар доказ за четири години катастрофално и досега невидено лошо владеење на една локална власт во Виница, изјави кандидатот на СДСМ за градоначалник на Виница, Гоце Милевски.
Наместо вистински отчет, додаде тој, видовме обид за замачкување на очите на јавноста и бегање од одговорност за неисполнетите ветувања.
„Затоа таканаречениот отчет беше во скап хотел а не на улиците, во градот и селата во Виница. Затоа што реалноста е разочарувачка. Ниту еден од капиталните проекти од програмата на Петков и ДПМНЕ за Виница не се реализирани“, рече Милевски.
Според Милевски, Петков се фалел со наследени проекти од претходната власт на СДСМ и неколку асфалтирани улици.
„Но фактите говорат: сегашната власт нема реализирано ниту 20 километри улици, наспроти 45 километри изградени во времето на СДСМ. Виница денес изгледа како мала депонија од не собереното ѓубре и смет, собирен центар за кучиња скитници, со небезбедни кратери од вода и хаос од неправилно паркираните возила, со запуштени зелени површини и ниту едно ново засадено дрво. Тоа сликата за Виница после 4 години неспособна локална власт на ВМРО-ДПМНЕ. Да не дозволиме оваа казна да продолжи уште четири години! Локалните избори се шанса за промени во Виница“, рече Милевски.
Македонија
Голема акција на Финансиската полиција: уапсени седум лица за даночни измами и перење пари, го оштетиле буџетот за 430 милиони денари

По двегодишна опсежна предистражна постапка, во текот на денешниот ден Управата за финансиска полиција спроведе акција во која беа извршени претреси на повеќе локации на подрачјето на општина Липково, Куманово и Желино.
Се работи за сложена предистрага, која опфаќа повеќе правни и физички лица, а целта е целосно разоткривање на криминална група, која дејстувала подолг временски период и имала цел вршење на кривичните дела злосторничко здружување, даночно затајување, даночна измама и перење пари и други приноси од казниво дело, со намера организаторите и припадниците на групата да стекнат противправна имотна корист во висина од над четиристотини триесет милиони денари, со што е предизвикана огромна штета на буџетот на Република Македонија.
По налог на јавен обвинител од Основно јавно обвинителство за гонење организиран криминал и корупција, во акцијата со асистенција на САЕ „Тигар“ од слобода се лишени седум лица и тие се изведени пред судија на претходна постапка при Основниот кривичен суд, а едно лице не е достапно на органите на прогонот.
Македонија
Утре сончево време, со температура до 34 степени

Времето утре ќе биде сончево со мала до умерена облачност. Попладне во источните делови ќе има услови за локален краткотраен дожд. Ќе дува слаб до умерен ветер претежно од јужен правец, информира УХМР.
Минималната температура ќе биде во интервал од 9 до 18, а максималната ќе достигне од 27 до 34 степени.
Во Скопје сончево со мала до умерена облачност. Ќе дува слаб до умерен ветер од југозападен правец. Минималната температура ќе се спушти до 14, а максималната ќе достигне до 32 степена.
До петок времето ќе се задржи претежно сончево и топло со постепен пораст на дневните температури. Ќе дува слаб до умерен ветер од јужен правец.
За време на викендот времето ќе биде променливо облачно и нестабилно со локален пороен дожд и грмежи. В сабота ќе дува умерен до засилен југозападен, а в недела ветерот ќе го смени правецот во северен.