Македонија
Нови судии и обвинители веќе се распределени – 45 на СДСМ, 25 на ДУИ, 20 на АА, вели Милошоски

Во Македонија има најмалку 7-8 правни лица што имаат соодветен електронски софтвер и опремени простории за електронско полагање испити вклучувајќи го тука и самиот Правен факултет „Јустинијан Први“ во Скопје, се вели во реакцијата на Антонијо Милошоски, пратеник на ВМРО-ДПМНЕ, за власта писмено да го спроведе полагањето на главниот тест на Академијата за судии и обвинители и покрај законската одредба за електронско полагање.
„Вчера, Министерството за правда соопшти дека ќе предложи да се смени законот за Академијата за судии за да се озакони писмено полагање на главниот тест за прием на новите 130 судии и обвинители. Се доцни со тендерот за набавка на електронски софтвер за полагање на квалификацискиот тест во Академијата за судии, е оправданието од Академијата. Според член 55 од Законот за јавните набавки, ако нешто е итно, и за електронскиот софтвер може да се набави со преговарање, без јавен оглас“, вели тој.
Да биде појасно, посочува тој, за разлика од електронското полагање, писменото полагање на квалификацискиот тест на Академијата значи човечко влијание, можност за манипулации, дополнително одговарање од страна на трето лице на неодговорените прашања и доделување максимум поени на владините фаворити за судии и обвинители.
„Затоа, реакцијата на Министерството за правда значи дека Владата во заминување сака пред распуштање на Собранието по секоја цена да си намести луѓе, кои утре од позиција на обвинители и судии ќе треба да ги заштитат одговорните за скандалите во М-НАВ, Онкологија, за ‘Беса транс’, убиствата на Панче и Вања, за милионските тендери во РЕК ‘Битола’, за двете евтини куќи во Тафталиџе 2, за ‘Соравија’, за незаконитото работење на видеолотариите и за многу други скандали. Зракот надеж во ова агресивно владино наметнување на адхок-правила е што во раководните органи на Академијата за судии има неколку поединци што не сакаат да си го извалкаат интегритетот и не сакаат да го аминуваат овој владин ‘кронизам’ за инсталирање марионети во правосудството. Таквите совесни поединци и понатаму се свиркачите, чии информации го разобличуваат брзањето на власта со злоупотреба на европското знаменце да го озакони писменото полагање на главниот испит, а тоа е следниот коалициски договор: од вкупно 130 идни судии и обвинители, според изворот од АСЈО, на Академијата ќе бидат запишани – 25 од листата на ДУИ, 20 од листата на Алијансата, 45 од листата на СДСМ и 10 од помалите коалициски партии“, додава Милошоски.
Како што истакнува, другите 30 судии и обвинители ќе бидат избрани од најдобрите меѓу преостанатите 200 пријавени кандидати.
„Значи, од предвидените 130 идни судии и обвинители што треба да се запишат на Академијата, 100 се однапред познати, според ‘кронизам’-методологијата и тие писменото полагање на тестот ќе го поминат со максимум бодови. Реална трка за запишување во АСЈО ќе има само за преостанатите 30 места за што во конкуренција се 200 кандидати што не се на владините коалициски листи на СДСМ, ДУИ, Алијансата и другите помали партии. Во следните денови предлогот за измена на Законот за АСЈО со злоупотреба на европското знаменце се очекува да помине на Владата, а потоа експресно да стигне во Собранието. Целта е законот да се изгласа по скратена постапка преку Комисијата за европски прашања за до крајот на јануари да може да се организира фиктивното писмено полагање на квалификацискиот тест за судиите и обвинителите, од кои 100 веќе однапред се утврдени“, објави Милошоски на својот фејсбук-профил.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Митески: Наместо Градот, ние го собираме отпадот во Аеродром

Кандидатот за градоначалник на општина Аеродром, Дејан Митески, изјави дека општината самоиницијативно се справува со зголемените количества отпад, иако надлежноста за комуналната чистота е на Град Скопје.
„Сликата е жалосна во цело Скопје, но ние во Аеродром не чекаме – дневно депонираме повеќе од 10 тони отпад во Дрисла,“ изјави Митески.
Тој нагласи дека, пред да се воведат казни, неопходно е граѓаните да имаат услови каде да го одлагаат отпадот.
„За првпат како општина воведовме редовни акции коишто траат два месеци на пролет и на есен за одлагање на кабаст отпад, понудивме услуга преку нашето јавно претпријатие да може на повик, граѓаните дојдат и го депонираат отпадот за симболичен надоместок, за првпат лиценциравме јавно комунално претпријатие коешто може да одвезува и да транспортира неопасен отпад“, рече Митески.
Во гостување на Телма, тој додаде дека Аеродром веќе има лиценцирано јавно комунално претпријатие што може да одвезува и транспортира неопасен отпад.
Покрај тоа, Митески најави и дел од инфраструктурните и еколошките проекти од програмата – топлификација на Лисиче, нов културен дом и зелена офанзива со засадување нови садници во соработка со инвеститорите.
Македонија
Во тек голема акција: Финансиската полиција ја тресе прилепската болница, има приведени

Во тек е голема акција на финансиската полиција во Прилеп, поврзана со сомнежи за криминал во работењето на прилепската болница.
Според информациите за „Макфакс“, приведени се повеќе лица кои раководеле со болницата.
Од Основното јавно обвинителство, попладнево, соопштија дека Финнсиската полиција постапува по нивна наредба.
„Се преземаат дејствија во врска со постапка за наводи против повеќе лица за злоупотреби во работењето на прилепската болница. Акцијата е во тек“ соопштија од Обвинителството.
Повеќе детали ќе бидат познати во текот на утрешниот ден.
Македонија
Мециновиќ: Не планирам да водам деструктивна политика, ќе соработувам со сите советнички групи

Кандидатот за градоначалник на Скопје од Левица, Амар Мециновиќ, на првата прес-конференција по почетокот на вториот изборен круг обвини дека Левица е неправедно исклучена од медиумскиот простор, откако АВМУ не ѝ дозволи политичко рекламирање.
Според него, со тоа, нанесен е удар врз демократијата, но најавува позитивна и проактивна кампања, иако, како што рече, условите не се рамноправни.
„Јас не сум најпаметен, ниту најдобар од сите скопјани“, рече тој. „Но знам дека скопјани заслужуваат град каде што нивниот глас нешто значи. Локалната политика е нашето секојдневие: улиците, воздухот, јавниот превоз, зеленилото. Тие работи не смеат да зависат од партиски договори“.
Тој порача дека нема да води деструктивна политика и ќе соработува со сите советнички групи. Нагласи и дека проблемите во претходниот мандат произлегле од партиски суети и лични конфликти. Ги повика и разочараните граѓани да излезат на гласање:
„Овојпат изборот е реален – старите партии веќе не се најголемиот фактор.“
На крај, му порача на својот противкандидат: „Подготвен сум на дебата, па и на јавен дуел под отворено небо. Нека народот нè слушне и избере.“