Македонија
Нуредини: Инвестираме во подобри услови за живеење и заштита на животната средина

Министерот за животна средина и просторно планирање, Насер Нуредини, заедно со градоначалникот на општина Гази Баба, Бобан Стефковски, присуствува на почнување на градежните работи за изградба на фекална канализација во населеното место Страчинци во општина Гази Баба.
„Почнувањето со имплементација на проектот за изградба на фекална канализација во населено место Страчинци во општина Гази Баба е во рамките на нашите заложби за вложување во неопходна инфраструктура. Проектот е во вредност од 21 милион денари, средства обезбедени од буџетот на Министерството за животна средина и просторно планирање“, истакна министерот Нуредини, додавајќи дека со конечната изградба на фекалната канализација и поставување современ систем за одведување на отпадните води што се испуштат од домаќинствата се решава проблемот за повеќе од илјада граѓани од населеното место Страчинци овозможувајќи им поквалитетни услови за живеење, како и заштита и унапредување на животната средина во овој дел од општината.
По претходно доставено барање од страна на Општина Гази Баба и обезбедените финансиски средства за повеќегодишна јавна набавка од Министерството за животна средина и просторно планирање за финансирање изградба на фекална канализација во населеното место Страчинци, пристапено е кон реализирање на втората фаза од проектот за што е склучен договор со Друштвото за производство, промет, градежништво, транспорт и услуги „Коп-инженеринг“ ДООЕЛ увоз-извоз Скопје како изведувач на работите, со рок на имплементација од 12 месеци. Надзор над изградбата на градбата во име на Министерството ќе врши правното лице Друштво за управување со проекти ЕОС Е.Е. ДОО Скопје.
Ова е само еден од многуте проекти што МЖСПП ќе ги реализира во текот на оваа година вложувајќи буџетски средства кои директно ќе се слеваат кај граѓаните преку реални и неопходни проекти во сите општини во државата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Учество на Муцунски на состанокот на министрите за надворешни работи на НАТО: Нагласен фокусот на Алијансата врз Западен Балкан

На покана на генералниот секретар на НАТО, министерот за надворешни работи и надворешна трговија, Тимчо Муцунски, вчера и денес учествува на состанокот на министрите за надворешни работи на земјите членки на НАТО, кој се одржа во седиштето на Алијансата во Брисел, Кралството Белгија, информира Министерството за надворешни работи и надворешна трговија.
Состанокот претставува добра можност министрите заеднички и во поширок формат да се осврнат на актуелните безбедносни случувања кои имаат импликации за европскиот континент и пошироко.
Фокусот на првиот ден од состанокот беше ставен на состојбите поврзани со руската агресија врз Украина, при што беше реафирмирана силната поддршка за дипломатските напори предводени од САД за постигнување прекин на огнот и траен, долгорочен мир преку политички дијалог и почитување на меѓународното право.
Министрите разговараа и за потребата од зголемување на издвојувањата во областа на одбраната, како и зајакнување на капацитетите и способностите на НАТО за градење колективна безбедност и одбрана, со цел ефективен одговор на заедничките закани и предизвици.
Особено беше нагласен фокусот на Алијансата врз Западен Балкан, како важен елемент за обезбедување на регионалната, но и на севкупната европска безбедност и стабилност, известуваат од Министерството.
Во време на сложени геополитички услови, кои носат широки безбедносни предизвици, министерот Муцунски ја нагласи важноста од одржувањето на единството меѓу сојузниците како столб на заедничката безбедност, значаен за заштитата на заедничките вредности.
Во оваа насока, тој ја потенцира и важноста на нашиот регион како простор од стратешко значење и за НАТО и за Европската Унија, со потреба да остане високо на агендата на двете организации. Притоа, побара зголемено внимание и стратешки пристап, особено во контекст на напорите на земјите од регионот за реализација на нивните европски и евро-атлантски аспирации преку брза имплементација на интегративните процеси, соопшти Министерството надворешни работи и надворешна трговија.
Македонија
Уште една жртва од пожарот во Кочани, почина управителот на дискотеката „Пулс“

Уште една жртва од несреќата во Кочани. По неколкунеделно лекување почина Александар Карадакоски, кој бил управител на ММММ Кафе дооел, која што управувала и со дискотеката „Пулс“ во која изби пожарот на 16 март.
Карадакоски на лекување беше испратен во Литванија каде и починал. Тој, исто така, работел и како шанкер во дискотеката во која се случи трагичната несреќа.
Тој е 60 жртва од катастрофата во Кочани.
Македонија
ДУИ: Дали „новиот општествен договор“ е антипод на Охридскиот договор и почеток на реформатирање на уставниот модел на државата?

„Како е можно лидерска средба за таканаречен „нов општествен договор“ да се одржи меѓу првопласираната и третопласираната партија на изборите? Дали критериумот за учество во овие преговори е етничката припадност, наместо демократскиот легитимитет? Дали ова значи дека се воведува нова практика на едноетничко моделирање на државата, каде што Албанците и другите заедници се сведени на набљудувачи“, прашуваат од ДУИ.
„Дали „новиот општествен договор“ е продолжение на коалицијата на олигархијата Мицкоски–Заев? Дали оваа иницијатива претставува почеток на пост-Охридско прекројување на уставниот модел на Северна Македонија?
Зошто на средбата не беше присутен ниту еден претставник од албанската заедница – ниту од позицијата, ниту од опозицијата – ако навистина се разговара за иднината на државниот поредок?
Дали оваа средба е обид за воспоставување на нова политичка хиерархија врз основа на етничка припадност, каде што Албанците се отстранети од суштинските процеси на одлучување?
Дали во оваа рамка се разгледува и меѓусебна заштита од политичка и правна одговорност – еден вид неформален пакт за неказнивост – за трагедијата во Кочани, наспроти трагедијата со модуларната болница во Тетово?
И конечно – дали албанските партии избрани од премиерот биле воопшто консултирани за оваа средба?
Дали ја дале нивната согласност или биле целосно заобиколени? Дали можеме да слушнеме барем еден јасен став од нив за ваквото едноетничко кроење на иднината на државата?
Дали се информирани дека македонскиот дел од Владата веќе договорил формирање на работни групи со етничката македонска опозиција за дефинирање на овој „нов договор“?
Или нивната улога е сведена на неми набљудувачи што ѕиркаат од ходниците, додека се скројува политичката реалност во која и тие, и нивните гласачи, не се прашуваат за ништо“, се додава во соопштението на ДУИ.