Македонија
Обвинителството поднесе жалба и ќе ја преиспита пресудата за убиството во Ново Лисиче
Обвинителството соопшти дека поднело жалба во однос на висината на изречената казна за убиството во Ново Лисиче и Апелациониот суд Скопје ќе одлучи по таа жалба, а согласно Законот за кривична постапка, по службена должност, ќе ја испита пресудата. Реакциите на социјалните мрежи, во јавноста и протестите во поглед на правната оцена на кривичното дело треба да бидат изземени од какви било дневно-политички интереси и притоа да не се злоупотребува загубата на еден млад човечки живот, соопшти Обвинителството.
На 14.08.2019 година на булеварот „Видое Смилевски – Бато“ во населбата Ново Лисиче, обвинетиот 18-годишник, доведен без своја вина во состојба на силна раздразнетост со напад и тешко навредување, со умисла го лишил од живот Никола Христовски. Група од повеќе лица, во која бил и оштетениот, го пресретнала обвинетиот во близина на една бензинска пумпа и започнале да го навредуваат и физички да го напаѓаат со влечење и удари по телото. Обвинетиот започнал да бега кон зградите, а групата од околу 30 лица трчале по него, извикувајќи навреди и пцовки. Кога се доближил до влезот на една зграда обвинетиот се обидел да влезе, но не успеал. Во тој момент, прв до него стигнал оштетениот Никола Христовски, па обвинетиот доведен во состојба на силна афективна раздразливост, реагирал импулсивно и не бил во состојба логично да размислува, да расудува и да раководи со своите постапки. Тој извадил нож со сечиво од 9 сантиметри и на оштетениот му задал убодна рана во десната страна на градниот кош. Оштетениот бил пренесен во Ургентниот центар „Мајка Тереза“ каде му бил извршен хируршки зафат, но починал како резултат на крваречки шок.
По спроведена претходна постапка, Основното јавно обвинителство Скопје на 07.02.2020 година до Основниот кривичен суд Скопје поднесе обвинение против едно лице за убиство на миг од член 125 од Кривичниот законик.
„Законското битие на кривичното дело – убиство на миг од член 125 од Кривичниот законик пропишува дека тој што друг ќе лиши од живот на миг, доведен без своја вина во состојба на силна раздразнетост со напад или со тешко навредување од страна на убиениот ќе се казни со затвор од една до пет години. Поднесувањето на обвинението со таа правна квалификација следеше по сеопфатна анализа на сите вербални и материјални докази обезбедени во текот на претходната постапка. Па така, од тие докази неспорно произлезе дека обвинетиот го сторил кривичното дело во состојба на силна афективна раздразнетост, делувал афективно-импулсивно и не бил во состојба логично да размислува, да расудува и да раководи со своите постапки. Оваа психолошка состојба на сторителот неспорно произлезе од изготвениот вешт наод и мислење од ЈЗУ Универзитетска клиника за психијатрија – Скопје од тим од три вешти лица.
Од субјективен аспект, ова кривично дело е умислено, а не е кривично дело сторено од небрежност, со тоа што се работи за миговна умисла и донесување брза и ненадејна одлука да се изврши делото, кога сторителот се наоѓа во состојба на силна раздразнетост без своја вина. Тоа се случило и во конкретниот случај затоа што најнапред обвинетиот со оштетениот и група други лица се сретнале кај бензинска пумпа во Ново Лисиче, каде обвинетиот бил навредуван и физички напaднат од страна на оштетениот и групата. Тој се исплашил и започнал да бега кон зградите, а групата од околу 30 лица трчала по него, извикувајќи навреди и пцовки. Кога дошол до влезот на зградата за да се скрие обвинетиот не успеал да влезе, а прв до него стигнал оштетениот. Во тој миг, на кој претходел напад врз него, тешко навредување и бегање за да се спаси, кај обвинетиот се створил афект на страв за својот живот, па тој посегнал по ножот и му ја задал убодната рана на оштетениот.
Ваквата правна квалификација за кривичното дело – убиство на миг од член 125 од Кривичниот законик Основниот кривичен суд Скопје ја прифати и донесе пресуда со која обвинетиот го огласи за виновен и му изрече казна затвор во траење од три години.Оваа правна квалификација, која во целост одговара на случениот настан, произлезе од утврдената фактичка состојба од страна на Судот со изведување на сите вербални и материјални докази на јавниот обвинител и на одбраната“, соопшти Обвинителството.
Тие додаваат дека при неспорна фактичка состојба, не биле исполнети законските услови за примена на член 398 став 2 од Законот за кривична постапка, според кој, судот не е врзан за предлогот на тужителот во однос на правната оценка на делото. Во текот на судската постапка, правата на законските застапници на оштетениот – неговите родители ги штитеше нивен полномошник – адвокат кој во текот на целата постапка не ја оспори ниту фактичката состојба, ниту правната квалификација на делото, се додава во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Тошковски: Со нова донирана опрема, МВР ќе ја подобри истрагата на местото на настанот
Денеска во Министерството за внатрешни работи беше извршено примопредавање на опрема за поефикасна истрага на местото на настанот во кривични дела кои вклучуваат оружје. Опремата ќе се користи првенствено од Одделот за форензички испитувања и единиците за истрага на местото на настанот во Секторите за внатрешни работи низ целата држава.
Опремата е донирана во рамките на проектот „Зајакнување на капацитетите на системот за форензика и истрага на местото на настанот за подобрување на кривично-правната контрола на мало и лесно оружје“, кој го имплементира УНДП во рамките на Патоказот за контрола на мало и лесно оружје на Западен Балкан, чиј потписник е Македонија. Како донатор на проектот се јавува Мултилатералниот доверителен фонд на Обединетите нации за мало и лесно оружје на Западен Балкан, кој го сочинуваат Германија, Шведска, Холандија, Франција, Обединетото Кралство и Норвешка, со поддршка на Европската Унија.
Опремата, во вкупна вредност од над 200.000 американски долари, се состои од универзални и специјализирани несесери за истрага на местото на настанот, фото камери, како и компјутери и соодветна хардверска опрема што ќе се користи за обработка на местата на настанот, односно злосторството. Форензиката и истрагата на местото на злосторството играат клучна улога во системот на кривичната правда кога станува збор за случаи кои вклучуваат огнено оружје. Преку анализа на балистика, траги и отпечатоци од прсти, форензичарите и увидните екипи кои работат во овие единици обезбедуваат важни докази за да помогнат во решавањето на злосторствата како и во спречувањето на идното потенцијално насилство. Целта е ефикасно откривање на сторителите и нивно санкционирање, со цел подобрен кривично-правен одговор на злоупотребата на огнено оружје, според надлежните.
Дел од донираната опрема ќе се користи и за опремување на новите простории за симулација за истраги на местото на настанот, кои УНДП ги развива во Центарот за обука на МВР во Идризово.
Министерот за внатрешни работи Панче Тошковски изјави дека „Имплементацијата на овој проект е од огромно значење Министерството за внатрешни работи, со што ја потврдуваме нашата определба кон остварување на целите од Патоказот за контрола на мало и лесно оружје, а особено кон усвојување на законската рамка за контрола на оружјето која ќе биде целосно усогласена со регулаторната рамка на ЕУ и стандардизирана во регионот, значително редуцирање на нелегалниот проток на огнено оружје, муниција и експлозиви како во рамките за Западен Балкан, така и пошироко и секако преку зајакнување на свесноста и едукативни активности со цел поефикасна контрола на малото и лесно оружје и спречување на нелегалната трговија со оружје.“
Постојаниот претставник на Програмата за развој на Обединетите нации, Армен Григорјан се наврати на долгогодишната соработка со Министерството за внатрешни работи во борбата против поседувањето, злоупотребата и ширењето на мало и лесно оружје во државата. „Како резултат на нашите заеднички напори, обезбедивме специјализирана опрема за истрага, организиравме сертифицирани обуки за полициски службеници и развивме софтвер за собирање и анализа на податоците. Ова резултираше со значително подобрени истраги и превентивни мерки кои имаат за цел да ја зајакнат безбедноста на сите граѓани. Денеска бележиме нов чекор во успешната соработка со Одделот за форензички испитувања и единиците за истрага на местото на настанот низ државата. Но, не застануваме тука. УНДП моментално ја финализира адаптацијата и опремувањето на балистичката лабораторија, која ќе служи за испитување на огнено оружје и муниција во кривична постапка. Следуваат и обуки за родова сензибилизација, како и надградување на полицискиот Модул за евиденција на инциденти, документи и активности, претходно развиен од УНДП, со нови функционалности за евидентирање случаи на родово-базирано и семејно насилство“ изјави Григорјан.
Предвидените активности и донации се дел од проектот „Зајакнување на капацитетите на системот за форензика и истрага на местото на настанот за подобрување на кривично-правната контрола на мало и лесно оружје“ и ќе придонесат за надградување на балистичките капацитети и оперативните активности на Одделот за форензички испитувања при МВР и кон подобрување на аналитичките, техничките и истражните капацитети на единиците за Истрагите на местото на настанот низ Републиката.
Македонија
ВМРО-ДПМНЕ: ДУИ останува заглавена во криминалот, бараат етнички теми како последен обид политички да преживее тајфата околу Ахмети
Според ВМРО-ДПМНЕ, ДУИ, најдолговечната владејачка партија, која, како што велат, пред шест месеци замина на буништето на историјата, повторно се обидува да се врати во игра. Сепак, како што оценуваат, наспроти овие проѕирни потези, ДУИ останува заглавена во криминалот, барајќи етнички теми единствено како последен обид да преживее политички тајфата собрана околу Ахмети.
„Каде беше ДУИ кога граѓаните бараа правда и транспарентност? Очигледно, уживаа во комфорот на криминалните приходи, додека народот плаќаше за нивната негрижа.
Зборуваат за „заштита на интересите“, а нивниот најголем интерес секогаш биле нивните банкарски сметки полни со украдени народни пари.
ДУИ се однесува како актер во заборавена сапуница – нивните приказни повеќе никого не го интересираат“, додаваат од партијата на Мицкоски.
Македонија, според ВМРО-ДПМНЕ, нема потреба од нивните спектакли.
Време е да престанат да го манипулираат народот и да го прифатат фактот дека нивното време помина, порачуваат од владејачката партија.
Македонија
Средбите на Мицкоски со високи политички претставници на САД вродуваат со плод, за разлика од оние на СДС каде им затвораа врати пред нос, велат од ВМРО-ДПМНЕ
Средбите на премиерот Мицкоски со високи политички претставници на САД вродуваат со плод, за разлика од оние на СДС кадешто им затвораа врати пред нос, велат од ВМРО-ДПМНЕ откако од СДСМ истакнаа дека Мицкоски немал ниту официјална покана за инаугурацијата на Трамп, ниту бил дел од неа.
„Знаеме дека СДС не можат да сфатат дека се во опозиција и дека уште долго ќе бидат таму, бидејќи граѓаните не им даваат поддршка за нивните политики, затоа што се лажни и лицемерни.
Освен тоа што премиерот Мицкоски беше единствен политичар од Балканот што присуствуваше на инаугурацијата на американскиот претседател Доналд Трамп, беа остварени значајни средби со многу високи политички претставници од САД, на кои беше разговарано за инвестиции, нашиот пат кон членство во ЕУ, стратешките позиции во НАТО алијансата и нашите позиции и ставови.
Премиерот Мицкоски, оствари средби со Крис Павловски, Девин Нунез, Џон Битов, Марко Галина, Такер Карлсон, Ричард Гренел, Ендру Пејкоф, Џеси Спиро, Александар Касаноф, Мајкл Ватли – претседател на Републиканската партија на САД и многу други средби.
Сиве овие средби на премиерот Мицкоски се за подобрување на економијата на државата, како и промовирање на туризмот и носење на странски инвестиции во државата. Можеби на СДС ова им е чудно, бидејќи на нив освен инвестирање во сопствениот џеб од страна на Буџетот, за друго и не знаеја“, се истакнува во соопштението.
Ги потсетуваат граѓаните, дека не се сите исти. Разликата, како што велат, помеѓу ВМРО-ДПМНЕ и СДС е повеќе од јасна.
„На нив сестринските партии им затвораа врати пред состаноците, а на ВМРО-ДПМНЕ вратата е отворена во меѓународната заедница. П.С. Ракувањата „на нога“ се дело на СДС, кога Димитров го фотографираше Заев на „средбата“ од 1,5 секунда со Доналд Трамп.
П.П.С. Македонија ја претставува премиер којшто не ја ведне главата пред светските политичари, туку го негува, промовира и заштитува македонскиот идентитет“, се подвлекува во напишаното од страна на ВМРО-ДПМНЕ.