„Во низата суштествени, реформски и програмски зафати во рамките на Министерството за внатрешни работи, што ги подготвувавме и реализиравме изминативе години, бездруго важно место заземаат и напорите за квалитативно унапредување на сегментот на крим-техничкото, форензичко работење. Тоа денеска го официјализираме и со најавата за почнување на градежните работи за изградба на новиот објект за криминалистичко-технички испитувања, со современа форензичка лабораторија на МВР, што ќе се реализира во текот на 2020 година“, истакна министерот за внатрешни работи, Оливер Спасовски, на настанот по повод почетокот на изградбата на нов објект наменет за одделот за криминалистичко-технички испитувања и вештачења на МВР.

„Станува збор за објект што ќе биде опремен во согласност со сите најнови европски полициски стандарди во доменот на крим-техниката, односно форензиката. Или, пластично кажано, објект што реално претставува есенција во полициско-истражителското дејствување, така што со право очекуваме во голема мера да се подигнат на уште повисоко ниво не само професионалните стандарди туку и конкретните ефекти на овој дел од оперативното полициско работење“, рече Спасовски.

Тој појасни дека во рамките на ИПА-програмите за 2013 и 2014 година, во изминатите три години се реализирани проекти во делот за набавка на опрема за институциите од областа на правдата и внатрешните работи, како и во делот на натамошното јакнење на капацитетите за истраги на местото на настанот, со што се овозможи квантитативно и квалитативно унапредување во овој домен, а круна на целиот тој пат е изградбата на новата форензичка лабораторија – проект за чија реализација во рамките на ИПА-програмата за 2016 година се издвоени потребните над три милиони евра.

За претседателот на Владата, Зоран Заев, со овој проект се отвора нова страница во историјата на службата за криминалистичка техника во нашата држава.

„Со изградбата на овој објект, конечно, се унапредуваат условите за работа на крим-техничките работници во нови лабораториски и канцелариски простории. Го фаќаме чекорот со современите постапки во оваа сфера и нивна хармонизација со најдобрите европски практики и стандарди. Уверен сум дека оваа инвестиција ќе даде голем придонес во правосудниот систем во нашата држава бидејќи услугите што ги нудат форензичките лаборатории се клучни во сите постапки на судовите и обвинителствата. Придобивки од условите, кои ќе ги нуди новиот објект, ќе имаат и граѓаните како крајни корисници на услугите. Модерната форензика ќе биде од придонес за поголема ефикасност и ефективност на судските постапки со навремено, квалитетно и стручно спроведување на потребните анализи и вештачења“, нагласи премиерот Заев изразувајќи задоволство од реализацијата на нови инвестиции во државата и уверување дека Владата и институциите остануваат партнер во унапредување на условите за работа и нивно усогласување со европските и меѓународните стандарди.