Македонија
Одржан првиот форум за персонализирана медицина и геномско профилирање: унапредување на персонализираната медицина во пракса

Во организација на МАНУ – Истражувачки центар за генетско инженерство, Медицинскиот факултет и Фармацевтскиот факултет при УКИМ и Фармацевтската компанија Рош се одржа форумот за Персонализирана медицина и геномско профилирање. Се дискутираше како да се унапреди персонализираната медицина во пракса.
Поврзаноста на генетиката на канцерот со персонализираната медицина, интегрирање на националната инфраструктура со цел подобрување на патот на пациентите со канцер и сеопфатна стратегија за примена на персонализираната медицина во онкологијата, се темите на кои се дискутираше на Првата конференција за персонализирана медицина и геномското профилирање. Дискусиите се водеа од медицински, фармацевтски и научен аспект со говорници од домашните институции, но исто и советници и здравствени експерти од Велика Британија, Италија, Хрватска.
Геномското профилирање и примена на иновативната терапија е во фокусот и на Министерството за здравство: „Паралелно се вложува и во персонализиран пристап во дијагностиката и третманот на пациентите. Посебно внимание посветуваме на сеопфатното геномско профилирање, како и на воведувањето и примената на иновативни терапии кои се препишуваат на пациентите исклучиво врз основа на претходно направени тестирања и проценка дека токму таа терапија ќе биде ефикасна за конкретниот пациент. Имајќи предвид дека персонализираната медицина подразбира и континуиран развој на дигитализацијата, во соработка со надлежните институции со заеднички заложби работиме и во оваа насока“, истакна заменик министерката за здравство, д-р Маја Манолева.
За интегрални сегменти, особено околу генетиката на канцер, геномските тестирања и можностите за унапредување на третманот на онколошките пациенти со помош на прецизната медицина, Ана Данева, советничка за здравство на Претседателот на Владата, истакна: „Ние со нашето скромно вложување во овој сегмент во последниве години сме насочени да овозможиме што поголем пристап на иновативната терапија што е од особена важност во третманот на пациентите. Она што е важно во индивидуалниот пристап започнува со проценка на фамилијарните предиспозиции и ризикот од развој на одредени заболувања со помош на генетски тестови, продолжува преку целни програми за превенција и рано откривање на болестите, што е основна задача на здравствениот систем, па се до точна и навремена дијагноза која овозможува индивидуализирана третманска стратегија. Персонализираната медицина го надминува пристапот ‘едно-решение за сите пациенти со одредена болест’ и му се посветува на секој поединец, според неговите потреби.“
Во дефинирање на вредноста на персонализираната медицина од локална перспектива, еден од клучните чинители е улогата на Фондот за здравствено осигурување и мерките што ги презема за ефикасно реалоцирање на средства со цел да се овозможи индивидуализирана, поефикасна дијагностика и третман на пациентите со канцер.
На Конференција за персонализирана медицина и геномското профилирање, беа изнесени и искуствата од примената на персонализираната медицина во Хрватска. Во однос на интегрирањето на прецизната медицина во едукацијата и сеопфатна стратегија за примена на персонализираната медицина, свое мислење даде и експертската јавност.
ПР
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Можност за воведување на нови авиолинии, тема на средбата меѓу вицепремиерот Николоски и шведскиот амбасадор Солстром

Заменик претседателот на Владата и министер за транспорт Александар Николоски денеска оствари работна средба со новоименуваниот амбасадорот на Шведска, Ола Солстром.
На средбата, вицепремиерот Николоски го запозна амбасадорот со владината програма во делот на капиталните проекти и вклученоста на Македонија во регионалните инфраструктурни проекти со што сe дава придонес во развој и промоција на регионалната соработка.
Се разговараше и за можностите и услови за инвестирање што ги нуди Македонија и јакнење на економската соработка.
Исто така, вицепремиерот Николоски ја отвори и темата за поквалитетна поврзаност меѓу двете земји и можностите за зголемување на авиолиниите меѓу Македонија и Шведска.
На средбата беа потврдени добрите билатерални односи меѓу Македонија и Шведска кои традиционалнo се пријателски. Двајцата соговорници ја нагласија потребата од интензивирање на соработката во дејностите од заеднички интерес за двете земји.
Македонија
Нова програма за Тетово на Касами: бесплатен јавен превоз, 100 евра за првачиња, нови училишта, жичница

Кандидатот за градоначалник на Општина Тетово, Билал Касами, денес одржа прес-конференција на која ја претстави својата изборна програма за следниот четиригодишен мандат.
Касами истакна дека изминатите четири години биле посветени на итни интервенции и решавање на основните проблеми со инфраструктурата, финансиската стабилизација и редот во општината.
– „Тетово денес е многу подобро отколку што беше пред 4 години. Успеавме да реализираме стотици проекти и да вратиме долг од 9 милиони евра. Сега сме подготвени да преминеме на ново поглавје – развој и модернизација на градот“, истакна Касами.
Во својата програма за 2025–2029 година, тој предвидува целосно решавање на проблемите со водоснабдување и отпадни води, модерна канализациона и улична инфраструктура, електрични автобуси и бесплатен јавен превоз, дигитализирани јавни услуги и стратегија за паркирање.
Посебен фокус е ставен на образованието со целодневна настава, нови лаборатории, подобрени услови во училиштата и субвенции од 100 евра за секое дете запишано во прво одделение.
Програмата предвидува и урбанистичка трансформација на Тетово со нов Генерален урбанистички план, изградба на Плоштад со подземен паркинг, катни гаражи, пешачки подвозници и жичница Тетово–Лисец–Попова Шапка.
„Вториот мандат ќе биде мандат за брз развој, за европски стандарди во секоја сфера, за заживување на културата, спортот и туризмот, но и за грижа за најранливите категории“, нагласи Касами, додавајќи дека сите проекти се базирани на конкретни стратегии и финансиски планови.
Тој порача дека Тетово не смее да се врати назад во „ерата на хаос, анархија и корупција“ и дека новата програма е „договор за работа“ кој ќе се реализира доследно.
Македонија
Светски ден на срцето: Граѓаните со голем интерес за бесплатните превентивни прегледи

По повод одбележување 29 септември–Светски ден на срцето, денес министерот за здравство, Азир Алиу, заедно со директорката на Институт за јавно здравје, Марија Андоновска го посетија превентивниот пункт во ТЦ „Дајмонд мол“.
-Граѓаните покажаа голем интерес за бесплатно мерење крвен притисок, холестерол и ниво на шеќер во крвта на превентивниот пункт. Здравствените услуги на пунктот ги врши тим од Институтот за јавно здравје. Со ваквите акции заеднички ја подигнуваме свесноста за навремено откривање и превенција од кардио-васкуларни заболувања. Дополнително, присутните добија индивидуални совети и препораки за здрава и урамнотежена исхрана, редовна физичка активност, како и поддршка и мотивација за откажување од пушење – три клучни фактори во заштитата на здравјето на срцето, изјави министерот Алиу.
Директорката на Институтот за јавно здравје, д-р Марија Андоновска ја истакна важноста на примарната превенција и активниот пристап кон сопственото здравје.
-Светскиот ден на срцето е можност да се потсетиме дека здравото срце значи и квалитетен живот. Институтот за јавно здравје ќе продолжи со активности насочени кон унапредување на здравјето на населението и поддршка на здрави животни навики” изјави д-р Андоновска.