Македонија
Од следната недела 12 меѓународни експерти на ОБСЕ-ОДИХР ќе почнат со интензивно следење на медиумите за изборите
Дванаесетмина набљудувачи на ОБСЕ-ОДИХР се веќе во земјата и следната недела ќе почнат интензивно да ги следат медиумите. Шефицата на мисијата, Џилијан Стирк, најави дека покрај клучниот тим за набљудување на изборите, ќе има дополнителни 20 долгорочни набљудувачи распоредени во неколку градови, а побарале и 300 краткорочни набљудувачи, кои треба да стигнат во земјата непосредно пред изборите.
„Имаме клучен тим од 12 меѓународни експерти во Скопје од 12 земји учеснички на ОБСЕ. Станува збор за многу разнообразна група. Ќе бидеме во земјата и за претседателските и за парламентарните избори и ќе заминеме на 19 мај. Покрај мојот колега, господинот Наџ, имаме и други експерти, кои работат на изборната администрација, правната рамка, политичката средина, кампањата, политичкото финансирање и финансирањето на кампањата и медиумите. Од наредната недела ќе почнеме со интензивно следење на медиумите. Покрај главниот тим, ќе имаме група долгорочни набљудувачи, вкупно 20 лица, кои ќе бидат распоредени во земјата во тимови по двајца. Ќе бидат стационирани во Тетово, Охрид, Битола, Прилеп, Струмица, Кочани, Куманово и Штип, а два тима ќе има во Скопје. Долгорочните набљудувачи беа испратени од 20 земји, учеснички на ОБСЕ. Ние исто така побаравме и 300 краткорочни набљудувачи, кои треба да пристигнат непосредно пред изборите. Ќе одат во избирачките места, ќе ги набљудуваат избирачите и процесот на пребројување на гласовите и сумирањето на резултатите. Тие ќе дојдат непосредно пред 24 април“, рече шефицата на мисијата, Стирк.
Ова се 22. избори во Македонија што ги набљудува ОБСЕ-ОДИХР, а првпат набљудуваат двојни избори.
Зголемениот број на набљудувачи шефицата Стирк објасни дека е одлука на мисијата за процена што имала предвид дека првпат во земјата се набљудуваат двојни избори.
Прелиминарниот извештај на ОБСЕ-ОДИХР за изборите ќе биде готов две недели пред изборниот ден, прелиминарните наоди, кои ќе бидат претставени на прес-конференција, а ќе подготват и конечен извештај, кој треба да се објави два месеца по изборниот процес.
Со оглед на тоа што денес им беше прв работен ден во Скопје, шефицата на мисијата побара повеќе време за анализа за да одговори на прашањето дали препораките на ОБСЕ-ОДИХР, кои беа усвоени пред две недели, беа доцна усвоени.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Без струја денеска делови од Центар, Сопиште и Бутел
Од ЕВН Македонија АД известуваат дека денеска без електрична енергија ќе останат:
· во периодот од 07:30 до 15:00 часот, корисниците на блокот на згради од булеварот Партизански Одреди бр.17 кон улица Максим Горки, општина Центар.
· во периодот од 07:45 до 15:30 часот, корисниците на селата Јаболци, Ново Брезница, Патишка Река, Држилово, Малчиште, Црн Врв, Елово, Осинчани, Карст с.Јаболци Викендици Држилово, Сателитски Центар, Ново Брезница, Рудпроект, Јаболци, Патишка Река, општина Сопиште.
· во периодот од 08:30 до 10:30 часот, корисниците на улицата Тале Христов, Поликлиника ВФВ и Објектите околу ВРВ Поликлиник, општина Бутел.
· во периодот од 09:00 до 12:00 часот, дел од корисниците на улицата Елисие Поповски – Марко бр.21,47 и други корисници во непосредна близина, општина Центар.
Македонија
Делови од Центар и Аеродром денеска без вода
Од ЈП Водовод и Канализација известуваат дека денеска:
– поради изведување на водоводен приклучок ф-80 мм на улицата Франклин Рузвелт бб, прекинато водоснабдување ќе имаат корисниците на дел од истата улица, односно потегот од Орце Николов до Благој Давков, општина Центар.
Водоснабдувањето ќе биде прекинато од 10:00 часот до завршување со работните активности.
– поради промена на вентил во шахта ф-2“ на улицата Венијамин Мачуковски бб, прекинато водоснабдување ќе имаат корисниците од истата улица, општина Аеродром.
Водоснабдувањето ќе биде прекинато од 09:00 часот до завршување со работните активности.
Македонија
Утрото претежно ведро и студено, преку денот сончево со мала до умерена облачност
Утрото претежно ведро и студено, преку денот сончево со мала до умерена облачност. Ќе дува слаб ветер од јужен правец.
Минималната температура ќе биде во интервал од -4 до 4, а максималната ќе достигне од 15 до 20 степени.
Во Скопје, сончево со мала до умерена облачност. Ќе дува слаб ветер од југоисточен правец. Минималната температура ќе се спушти до 2, а максималната ќе достигне до 16 степени.
Времето во наредните денови
Следува период на стабилно и суво време. Претпладне по одделни котлини ќе има услови за појава на магла или ниска облачност. Поради разведрувањето утринската температура наместа ќе се спушти под нулата, а дневната ќе бележи тенденција на благ пораст.

