Жителите на Кисела Вода им дадоа рок на властите до крајот на месецов да го дислоцираат Центарот за превенција и третман на зависности од дроги. Разочарани и револтирани од досегашните празни ветувања на градоначалниците и на министрите тие размислуваат по истекот на рокот, доколку не се преземат мерки, да почнат да блокираат улици и институции со цел надлежните да ги чујат. Вечерва се собраа пред Центарот за зависници за да ги договорат следните чекори. Велат дека ова е прв ваков собир откако постои проблемот.

„Животот околу болницата станува неподнослив. Децата со страв ги пуштаме на школо. Последниве месеци четири деца се повредија со употребени игли оти се расфрлани насекаде. Немам ништо против нив, тие се лечат и треба да се лечат, но на друго место. Овде веќе нема куќа што не опљачкана, нема двор во кој што не влегле. Шприцеви си наоѓаме по подрумите и гаражите, не можеме мирно да спиеме. Пред очи на нашите деца среде бел ден на улица се соблекуваат по гаќи и се боцкаат во бутовите, а ние сме немоќни да направиме било што“, се пожалија жителите околу болницата.

На собирот дојде Горан Петковски, шеф на кабинетот на градоначалникот Филип Темелковски. Тој се обиде да им објасни на граѓаните дека се преземаат мерки, но резултатот доцни поради случувањата во државата.

„Продолжен е рокот за дислокација на болницата поради се што се случуваше последниве месеци во државата. Ние заедно со Министерството за здравство работиме на случајот за решавања на вашиот проблем и очекуваме во текот на месецов да се најде решение. Запознаени сме со сите проблеми што ги имате и ве уверувам дека доколку не успееме да издејствуваме дислокација, јавно ќе ги поддржиме протестите против болницата“, објаснуваше Петковски.

Додека зборуваше жителите го заобиколија и од телефоните му покажуваа слики од купишта шприцеви и игли преку кои се принудени да минуваат излегувајќи од дома, зависници исполегнати на патот откако ја примиле дозата и слики од нередот што го оставаат зад себе. Петковски им објаснуваше дека и тој и градоначалникот се известени за сите проблеми и најави дека на следната средба ќе дојде и градоначалникот Филип Темелковски.

„Пренесете му и на градоначалникот и на сите останати дека од 1 декември овде нема да дозволиме да има зависници. Треба ли да се случи убиство за да не чуете?! Ние со овие луѓе живееме секој ден, овде не е доволно што има полиција која стои на страна, а тие се тепаат, вадат ножеви, никој не може да им се приближи“, се пожали еден од жителите.

Треба ли да се случи убиство за да не чуете?!, прашаа жителите на Кисела Вода

Дел од насобраните побараа Центарот да се пренамени во поликлиника за да не мораат децата од Кисела Вода да ги носат во Јане Сандански на лекар  и порачаа секоја општина да почне да се грижи за зависниците.

„Сега општините се станати држави, секоја нека почне да се грижи за своите. Не знаете што е овде наутро. По најмалку 200 луѓе доаѓаат, не гледаат ништо пред себе, а на само чекор од овде е училиштето ‘Круме Кепески’“, вели еден од првите соседи на болницата.

Градоначалникот на Општина Кисела Вода, Филип Темелковски попладнево за „Макфакс“ изјави дека работат на решавање на проблемот.

„Постојано сме во контакт со жителите околу Ценатрот. Нивни претставници доаѓаат на состаноци со нас. Рокот за дислоцирање на Ценатрот е продолжен поради досегашните случувања, но веќе имаме закажано состаноци следната недела за решавање на овој проблем“, рече градоначалникот Темелковски.

Тој потсети дека заедно со претставници од Министерството за здравство, од Министерството за внатрешни работи од Оддделението за недозволена трговија и од ПСОН Кисела Вода, претставници од ЈЗУ Психијатриска болница Скопје, од Центарот за превенција и третман на зависност од дроги-Кисела Вода, невладините организации ХОПС и Доверба, како и жители на Кисела Вода имале средба на која барале начин за надминување на проблемот.

Центарот за зависници претставува проблем за жителите на Кисела Вода веќе трета деценија и нема ниту локална ниту централна власт во целиот тој период која што не ветила дислокација.