Македонија
Општина Валандово постхумно му додели највисоко признание на Мирко Попов

Вчеравечер, во преполната сала на Домот на културата „25 Мај“ во Валандово, во рамките на церемонијата по повод „Денот на општината“, највисокото општинско признание „6 Ноември“ за оваа година постхумно му беше доделено на Мирко Попов.
„Општина Валандово има чест највисоката општинска награда ‘6 Ноември’ годинава постхумно да му ја додели на Мирко Попов. Одлука што Советот на Општината едногласно ја донесе. Неговата иницијатива за снимање и издавање македонска музика во изведба на ансамблот ‘Распеани валандовчани’ претставува уште еден во низата придонеси за афирмација на македонскиот идентитет. Уште повеќе што го става во фокус културното наследство на Валандово преточено во музиката. Овој проект, кој го почна Попов, ќе го реализираме заедно со неговите соработници и со поддршка на Општината“, изјави Перо Костадинов, градоначалник на општина Валандово.
Претседателот на Советот на Општината, Владимир Марков, ѝ ја врачи наградата на Виолета Качакова, долгогодишна партнерка и соработничка на Мирко Попов.
„Прогресивната мисла и визија за поквалитетен живот во нашата земја Мирко Попов неуморно ја градеше преку продуцирање, издавање и промовирање автохтона македонска музика, вткаена во творештвото на разни генерации автори и изведувачи. Во овој контекст ќе биде запишано и изданието на ансамблот ‘Распеани валандовчани’, продуцирано во соработка со Владан Дробицки. Куриозитет е дека музичкиот запис ќе излезе на винил, кој се смета за најквалитетниот и најценет носач на звук во светот на музиката. ‘Распеани валандовчани’ ќе биде 14. по ред винил-издание на македонска музика како резултат на работата на Мирко Попов и неговите соработници“, изјави Качакова.
Трајниот аудиозапис на музика изведена од ансамблот „Распеани Валандовчани“ ќе се надоврзе во низата од 300 изданија македонска музика како дел од работата на Попов. Овој музички проект воспоставува и историска врска со семејното потекло на скопјанецот Мирко Попов. Неговиот дедо, истоименик Мирко Попов, кој потекнува од Валандово, бил еден од најпочитуваните граѓани и јавни личности, кој со својата работа придонел во општествениот и културниот развој на општината.
Ансамблот „Распеани валандовчани“ е основан 1973 година. Неговиот прв и досега единствен музички запис на винил е од 1974 година, издаден за Радио-телевизија Белград. По точно 50 години, ансамблот со рецентниот состав ќе добие ново винил-издание за македонски издавач благодарение на иницијативата на Мирко Попов и соработката со „Распеани валандовчани“ и Општина Валандово. Винилот ќе излезе за „ПМГ џез“ во продукција на Здружението за развој на музиката и културата „Крај Вардарот“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Манасиевски: Кандидатите за советници во Советот на општина Струмица, крвнички тепаат странци во Струмица

Вистинската СДС се покажува на дело, кандидати за советници од Струмица крвнички тепаат странски државјани. Кандидатите за советници во Советот на општина Струмица, Христијан Ефтимов, кој воедно е и претседател на младите на СДС и Илија Стојанов, крвнички тепаат странци во Струмица, истакна на прес-конференција Валентин Манасиевски, член на ЦК на ВМРО-ДПМНЕ.
„Целата македонска јавност увиде на каков начин СДС владее во Струмица, ширејќи страв и трепет врз останатите жители или туристи кои биле во тој период во градот. Да нагласиме дека освен овие насилници кои ги видовме во видеото, има и други кандидати за советници од СДС имаат кривични пријави, а за еден има и прекршочна пријава за насилство. Јасно е дека СДС во Струмица знае само за еден пристап, а тоа е заплашување на народот и физичка агресија врз него“.
СДС, додава тој, наместо да понуди визија, програма и идеа, тие нудат тепачи и насилници да бидат дел од советничката листа на СДС во Струмица.
„Во однос на оваа крвничка тепачка од страна на насилниците од СДС врз странски државјани, јавноста мора да знае дека МВР има поднесено кривични пријави, но секако погодувате, судството нема донесено никаква правна разрешница“.
Според него, тие луѓе не смеат да бидат нашата иднина, и побара осуда и оградување од страна на СДС и локалното раководство.
„Бараме и правда и одговорност. Време е за вистинска промена во Струмица“.
Македонија
Дурмиши-Колумбија: Ќе обезбедиме поддршка на женското лидерство, младите и социјалниот развој

Министерот за економија и труд, Бесар Дурмиши, денес оствари средба со постојаната координаторка на Обединетите нации во Северна Македонија, Рита Колумбија. На средбата се разговараше за продлабочување на соработката помеѓу Владата на Република Северна Македонија и Обединетите нации, вклучително и ресорните министерства, преку заеднички проекти и активности кои имаат за цел унапредување на економскиот и социјалниот развој.
Фокусот на разговорот беше ставен на зајакнување на положбата на жените во општеството, особено во делот на економскиот развој, претприемништвото и развојот на лидерските способности. Посебно внимание беше посветено и на политиките за родова еднаквост и превенција од дискриминација, како клучен предуслов за инклузивен и одржлив раст.
Истовремено, беа дискутирани и иницијативи за развој на политики за поддршка на младите, преку обезбедување поголем пристап до квалитетно образование, обуки за современи вештини, можности за вработување и активно вклучување во процесите на одлучување.
Дурмиши и Колумбија разговараа и за значењето на претстојниот Втор светски самит за социјален развој, кој ќе се одржи од 4 до 6 ноември во Доха, Катар. Самитот ќе претставува глобална платформа за обновување и засилување на клучните обврски од Копенхагенската програма за акција – искоренување на сиромаштијата, создавање пристојни работни места, промоција на социјалната инклузија и еднаквоста.
На настанот се очекува учество на шефови на држави и влади, како и на претставници од граѓанското општество, приватниот сектор и академската заедница. Дополнително, ќе биде усвоена политичка декларација која ќе ги обврзе земјите-членки да преземат конкретни чекори во унапредувањето на социјалните политики и во исполнувањето на Агендата 2030 за одржлив развој.
На средбата беше изразена заедничка заложба за интензивирање на партнерството меѓу Владата и Обединетите нации, со цел преку конкретни иницијативи да се поддржи економската независност на жените, да се создадат нови можности за младите и да се унапреди квалитетот на животот на сите граѓани.
Македонија
Унапредување на условите во поликлиниката Шуто Оризари ќе биде еден од приоритетите во рамки на заложбите на Стратегијата за инклузија на Ромите, најави Алиу

Министерот за здравство, Азир Алиу денеска ја посети поликлиниката Шуто Оризари, заедно со Министерот без ресор задолжен за интеграција и имлементација на Стратегијата за инклузија на Ромите, Шабан Салиу.
– Нашата заложба е достапна здравствена заштита за сите пациенти, а паралелно со тоа и унапредување на условите во јавните здравствени установи низ државата. Поликлиниката Шуто Оризари во следниот период ќе биде еден од приоритетите за унапредување во различни аспекти, секако со поддршка од Министерот без ресор задолжен за интеграција и имлементација на Стратегијата за инклузија на Ромите. Во духот на оваа стратегија, заеднички се залагаме за подобрен пристап до интегрирани, квалитетни, превентивни и куративни здравствени услуги за лицата од овој регион, истакна министерот Алиу при посетата.