Министерот за надворешни работи, Бујар Османи, денес се сретна со Викторија Нуланд, потсекретар за политички прашања во Стејт департментот, на маргините на министерскиот состанок на ОБСЕ.

Османи и Нуланд разговора за одличните билатералните односи меѓу Северна Македонија и САД, кои постојано се збогатуваат, а особено се осврнаа на првите конкретни резултати од неодамнешното одржување на стратешкиот дијалог меѓу двете земји.

Во фокус на разговорите беа и соработката и сојузништвото во рамките на мултилатералните организации, како што се НАТО и ОБСЕ, а под лупа на новите светски тешкотии предизвикани од руската непровоцирана агресија врз Украина.

Во ОБСЕ-контекст Османи ја брифира Нуланд за приоритетите на идното претседавање, при што нагласи дека, покрај војната во Украина, како приоритет број еден, особено внимание ќе им се посвети и на другите кризни региони зајакнувајќи ги дополнително мировните ОБСЕ-мисии на терен.

„ОБСЕ може да помогне во изнаоѓањето на потребните решенија, со цел смирување на тензиите, зајакнување на предвидливоста, обновување на каналите на комуникација и дијалогот. Сите страни мора да го признаат и целосно да го искористат потенцијалот на оваа платформа“, истакна Османи.

Османи, меѓу другото, најави тесна координација со САД, како и со сите други земји учесници на ОБСЕ, при реализација на активностите в година, со цел да им се излезе во пресрет на најранливите категории.