Македонија
Османи – Дарчијашвили: ОБСЕ нема да штеди напори за подобрување на состојбата на луѓето во Грузија
Во својство на претседавач со ОБСЕ и министер за надворешни работи, Бујар Османи, денеска во Грузија се сретна со министерот за надворешни работи на земјата, Илија Дарчијашвили.
На заедничка прес-конференција во Тбилиси, Османи нагласи дека како претседавач, Северна Македонија се стреми кон мирно, сеопфатно и одржливо решавање на конфликтите што ја засегаат Грузија алудирајќи на продолжување на адресирањето на овие прашања во рамките на клучните дипломатски канали за дијалог, кои се под заедничко раководство на ЕУ, ОБСЕ и ОН.
„Mеѓународните дијалози во Женева и механизмот за спречување и одговор на инциденти се витални дипломатски процеси кои мора да останат отворени не само за да се избегнат понатамошни ескалации туку и за справување со последиците од конфликтот во Грузија во 2008 година“, рече Османи.
Mеѓународните дијалози во Женева, инаку, се единствената платформа каде што сите релевантни учесници се среќаваат на политичко ниво уште од 2008 година, а кои се фокусираат на безбедносни и хуманитарни прашања. Едно од главните достигнувања на меѓународните дијалози во Женева е воспоставувањето на заедничкиот механизам за спречување и одговор на инциденти, чија цел е смирување на тензиите.
Во тој контекст, а и во насока на пораката на претседателството „За луѓето се работи“, Османи ја потенцира својата поддршката на сите прагматични пристапи за мирно решавање на ситуацијата, со цел да се обезбедат вистински резултати токму за луѓето погодени од конфликтите.
„Дозволете ми да бидам јасен, тие тоа го очекуваат од нас. Да им понудиме вистински резултати, кои ќе им овозможат да го живеат својот живот во состојба на мир и просперитет“, истакна Османи.
Тој додаде и дека ОБСЕ нема да штеди напори за подобрување на нивната состојба и во соработка со своите партнери ќе продолжи да ја промовира слободата на движење и да иницира суштински хуманитарни прашања, особено за притворените, раселените и за исчезнатите лица.
Во својата изјава претседавачот Османи се осврна и дека ОБСЕ ќе го продолжи својот ангажман за поддршка на раселените жени и млади лица погодени од конфликтот.
„Мора да бараме начини да се засили процесот на помирување“, рече Османи и потврди дека во рамките на своите активности во Грузија ќе оствари и теренски посети со граѓани со цел директно од нив да дознае повеќе за предизвиците со кои се соочуваат.
На крајот на средбата Османи повтори и дека ОБСЕ ќе продолжи да дава суштинска поддршка во спроведување на заложбите во трите димензии на Организацијата, што ќе придонесе и за внатрешните реформски процеси на Грузија.
„Многу години, ОБСЕ и нејзините земји учеснички, како Грузија, играа интегрална улога во обезбедувањето стабилност и безбедност на поширокиот регион на ОБСЕ. Затоа, дозволете ми да ве уверам дека мојата цел е како претседавач со ОБСЕ да ја зајакнам и продлабочам нашата соработка и да промовирам мир и стабилност во овие неизвесни времиња“, заклучи Османи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Без струја денеска делови од Чаир, Бутел и Шуто Оризари
Од ЕВН Македонија АД известуваат дека денеска без електрична енергија ќе останат:
· во периодот од 08.00 до 11.00 часот корисниците од дел од улицата Бајрам Шабани и дел од улицата Чаирска, општина Чаир;
· во периодот од 09.00 до 10.00 часот корисниците од објектите околу Фитофарм-Визбегово, општина Бутел;
· во периодот од 09.00 до 12.00 часот корисниците позади бензинската ОКТА во Шуто Оризари, општина Шуто Оризари.
Македонија
Делови од Карпош и Шуто Оризари денеска без вода
Од ЈП Водовод и Канализација известуваат дека денеска поради уличен дефект на улицата Демирхисарска бр 13 прекинато водоснабдување ќе имаат корисниците од улицата Демирхисарска, од 17:30 часот до завршување на дефектот, општина Шуто Оризари.
Од ЈП Водовод и Канализација исто така известуваат дека денеска поради изведување на водоводен приклучок ф-100мм на ул. Софиска 7, прекинато водоснабдување ќе имаат корисниците од следниве улици: Софиска, Бриселска, Петар Драганов, Његошева, Копенхагенска и Стокхломска, општина Карпош.
Водоснабдувањето ќе биде прекинато од 09:00 часот до завршување со работните активности.
Македонија
Утрото постудено и магливо, преку денот сончево со мала до умерена облачност
Утрото постудено со услови за појава на магла по одделни котлини и речни долини. Преку денот времето ќе биде сончево со мала до умерена локална облачност. Ќе дува слаб ветер од јужен правец.
Минималната температура ќе биде во интервал од -3 до 4, а максималната ќе достигне од 16 до 21 степен.
Во Скопје, утрото постудено, во делови од котлината магливо. Преку денот времето ќе биде сончево со мала до умерена облачност. Ќе дува слаб југоисточен ветер. Минималната температура ќе се спушти до 2, а максималната ќе достигне до 18 степени.
Времето во наредните денови
Под влијание на висок воздушен притисок следува период на стабилно и суво време со постудени утра, а дневната температура ќе биде во пораст, особено во деновите од викендот. Претпладне по одделни котлини и речни долини ќе има услови за појава на магла.

