Македонија
Османи молчи дали ДУИ ќе остане во коалиција со СДСМ без Законот за јазици

Потпаролот на ДУИ и вицепремиерот за европски прашања, Бујар Османи не кажува дали неговата партија ќе коалицира со владеачката СДСМ, доколку Собранието не го излгаса Законот за јазици. Тој во изјава за „Макфакс“ вели дека нема потреба да се размислува за хипотетички ситуации, иако минатата недела пропадна првата шанса за изгласување на законот, откако, претседателот на Собранието, Талат Џафери по две одложувања, ја откажа седницата. Османи е убеден дека законот ќе биде изгласан на идната седница во Законодавниот дом.
„Доколку мнозинството се плашеше од деструктивни уцени, немаше ниту да се потпише договорот со Бугарија, ниту ќе се спроведуваа реформи, а немаше да се разговара ниту за решавање на спорот со името. Бидете убедени дека мнозинството е одлучно да им покаже на деструктивните дејствувања кои мислат дека меѓуетничките односи се предмет за поткусурување за партиски агенди, дека се веќе минато“, вели Османи.
Талат Џафери вината за откажувањето на седницата ја префрли кај политичките партии. Џафери се иззема од одговорност, а пак координаторот на ВМРО-ДПМНЕ, Драган Данев рече дека тие чекале да почне седницата и дека немале средба со спикерот на Собранието. Со тоа, причините за откажување на седницата се познати само за колиционите партнери СДСМ и ДУИ. Неофицијално, двете партии не можеле да постигнат договор, бидејќи од пратеничката група на СДСМ инсистираат да се направи компромис со опозициската ВМРО-ДПМНЕ за да ги повлечат 35.000 амандмани, а пак мисијата на ДУИ е законот да биде веднаш изгласан без никакви одлагања.
Спикерот на Собранието им даде една недела на партиите да се договорат меѓусебно, а во текот на идната недела ќе биде закажано ново продолжение на седницата каде е и Законот за јазици. Остнаува непознато дали ќе се дискутира за амандманите, но и дали мнозонството ќе гласа за усвојување на законот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Тетово повика на јавна дебата за промена на имињата на улиците

Општина Тетово в петок, со почеток во 15:00 часот, организира јавна дебата за предлози за имиња на улиците.
„Ги повикуваме сите граѓани, здруженија, невладини организации и граѓанскиот сектор да учествуваат на оваа јавна дебата за именување на улиците“, велат од општината преку допис.
Додаваат дека секој предлог од граѓаните е важен и помага овој процес да биде инклузивен и успешен за граѓаните и градот Тетово.
Македонија
Тошковски: Припадниците на МВР денеска примија плата зголемена за 10 отсто

Припадниците на МВР денеска примија плата зголемена за 10 отсто, информира министерот за внатрешни работи, Панче Тошковски.
„Изминативе години сосема оправдано имаше критики дека платите во МВР се ниски, а очекувањата и одговорностите големи. Често се укажуваше на разлики во однос на некои сродни служби, а чувството на потценетост беше реално и оправдано. Ова зголемување не е доволно, но е еден од многуте чекори што ќе следат во насока на враќање на достоинството и угледот на полицаецот. Целта е јасна – да изградиме модерна, професионална и силна полиција која ќе биде вистински сервис на граѓаните. Продолжуваме понатаму кон обезбедување на подобри услови, поголема поддршка и вистинско вреднување на трудот што секојдневно се вложува“, напиша Тошковски во објавата на социјалните мрежи.
Македонија
Оставката на Папазов помина на владина седница

Владата ја прифати оставката на градоначалникот на Кочани, Љупчо Папазов.
Советот на општината ќе треба да назначи в.д. градоначалник на Кочани, откога одлуката ќе биде објавена во „Службен весник“.
Инаку, Папазов ја поднесе оставката по пожарот во дискотеката „Пулс“ каде животот го загубија 59 лица, а околу 200 беа повредени и префрлени низ клиниките во земјава и странство.
Папазов по оставката беше приведен и одреден му беше притвор. Во куќен притвор се и неговите двајца претходници од градоначалничката фотелја.
Според истрагата, тројцата осомничени градоначалници на Кочани во периодот од 2012 година до 16 март кога се запали дискотеката, не ги извршиле своите правни обврски во согласност со Законот за заштитата и спасувањето, со што овозможиле кабарето „Пулс“ незаконито да продолжи со вршење угостителска дејност. За целиот овој период, како што беше истакнато, Општината примала уплати по основ на надоместок за угостителски објект.