Вицепремиерот Бујар Османи најави дека на денешната владина седница очекува да помине законското решение кое се однесува на СЈО. Тој по средбата со претседателката на антикорупциската комисија, Билјана Ивановска, рече дека продолжуваат со реформите и исполнување на точките од планот 18, а дека државната Комисија за спречување корупција е дел од тоа.

„Денес на Влада најверојатно ќа го донесеме законот за обвинителство што го опфаќа и СЈО и ова значи дека двата система за антикорупција – обвинителството и ДКСК, се еден од клучните успеси во пресрет на препораката од ЕУ“, изјави Османи.

Претседателката Ивановска рече дека побарале помош од СЕП за нови простории за функционирање на антикорупциската комисија, а упати и апел да се достават анкетни листови на време од сите функционери.

„Нашата комисија нема законски основ да дава мислења дали постои судир на интереси во изборен процес и апел до сите министерства , единици на локална самоуправа и други субјекти да не доставуваат барања за мислење , бидејќи во иднина нема да се произнесуваме“, порача Ивановска.

Во однос на одговорноста кај функционерите на ДУИ за случаите на непотизам, Османи рече дека партијата дава максимална поддршка во борбата против корупцијата и непотизмот и ќе чекаат одлука на ДКСК да утврдат дали имало влијание при вработувањето на роднините на нивните функционери.

Од Комисијата порачаа дека до крајот на неделата е рокот до кога треба институциите да ги достават бараните документи за предметите кои веќе ги отвори ова тело.