Македонија
(Видео) Има уште 3.400 пасоши, МВР формира комсија која ќе одобрува издавање само на итни случаи

Граѓаните што имаат интна потреба од пасош треба да поднесат барање за ургенција заедно со барањето за пасош. Комисија од Министерството за внатрешни работи ќе ги разгледува барањата и ќе им излезе во пресрет на сите кај кои ќе биде утврдено дека итно им треба пасош. Предност ќе имаат лицата што мора да патуваат од здравствени причини.
Техничкиот министер за внатрешни работи, Наќе Чулев, денес извести дека на располагање имаат 3.400 пасоши. кои ќе се издаваат само на ургентните случаи сè до 24 март кога очекуваат да пристигнат 100.000 нови обрасци за пасоши.
„Во отсуство на политичка волја кај Владата, јас на ниво на Министерство за внатрешни работи формирав комисија. Во комисијата имаме вклучено и медицинско лице – доктор и приоритет за решавање на барањата ќе имаат оние лица што имаат ургентни медицински потреби. Ги повикувам граѓаните сите ургентни барања за издавање патни исправи да ги доставуваат до подрачните единици на Министерството за внатрешни работи, одделенијата за управни работи. Комисијата ќе ги разгледа веднаш следниот ден по поднесувањето. На оние граѓани што претходно не аплицирале, а за кои ќе се утврди дека имаат ургентни барања, МВР ќе им излезе во пресрет со тоа што тие ќе аплицираат како по редовна постапка, односно нема да им бидат наплатени дополнителни финансиски средства“, рече министерот Чулев.
Тој уште еднаш повтори дека проблемот го направил неговиот претходник Оливер Спасовски, кој не ги испланирал потребите на граѓаните и не обезбедил доволен број патни исправи. Апелира Владата да најде начин да го пролонгира важењето на истечените пасоши шест месеци од денот кога ќе пристигнат новите патни исправи.
„Владата има модалитети како да го реши овој проблем, отсуствува политичка волја. Пак ја користам оваа пригода да ја повикам Владата во интерес на граѓаните да седнеме и да го решиме проблемот кој е веќе на ниво на држава и е алармантен“, повика Чулев.
Иако МВР размислуваше да забрани поднесување барања во редовна постапка поради недостигот на обрасци, министерот денес рече дека одлучиле привремено да го блокираат системот. Граѓаните во редовна постапката може да поднесуваат барања и да се сликаат и покрај тоа што новите обрасци се очекуваат на 24 март.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
УЈП со повик за исполнување на ДДВ обврските: евидентирана е загрижувачка состојба

Управата за јавни приходи информира дека заклучно со 25 јули 2025 година евидентирана е загрижувачка состојба во однос на исполнувањето на обврските поврзани со данокот на додадена вредност (ДДВ).
„Според последните податоци: не се поднесени ДДВ-пријави од 142 месечни и 2.134 тримесечни обврзници. Пријавен, но неплатен ДДВ-долг е евидентиран кај 1.326 месечни и 7.748 тримесечни обврзници.
Директорката на Управата за јавни приходи, Елена Петрова, со порака: „Непочитувањето на законскиот рок е сериозен прекршок. Сите обврзници кои не поднеле ДДВ-пријава или не го платиле ДДВ-долгот се повикуваат итно да постапат согласно законските прописи. Даночната дисциплина не е избор, туку законска обврска и одговорност на секој граѓанин и компанија, темел за функционална држава.“
Управата за јавни приходи, како што додаваат во информацијата, веќе доставила персонализирани известувања до сите ДДВ-обврзници кои имаат пријавен, а ненаплатен долг за соодветниот даночен период.
„Преку координирано постапување и интензивна комуникација со даночните обврзници и со сметководителите, се спроведува целосен сет активности и мерки — со цел да се избегнат блокади на сметки и дополнителни трошоци за присилна наплата. За секој ден на задоцнување, се пресметува камата во износ од 0,03% од преостанатиот долг. По доставата на опомените, управата ќе пристапи кон присилна наплата кај сите обврзници кои нема да го подмират долгот доброволно. Со цел навремено информирање и исполнување на обврските, како и обезбедување солидна даночна историја, УЈП останува во постојана комуникација со сите релевантни страни“.
Македонија
Владата донесе одлука за промена на таблиците на службените возила и отворање на конзулат во Корча

Владата на денешната 97 седница донесе одлука сите државни институции да ги променат регистарските таблици на службените возила со новите таблици со боја најдоцна до 15 септември 2025 година. Оваа одлука е во насока на уште едно реализирано ветување пред граѓаните со цел поголема отчетност, транспарентност и ставање крај на злоупотребите кои со биле пракса во минатото, соопшти владината служба.
Дополнително, Владата на предлог на Министерството за надворешни работи и надворешна трговија донесе одлука за отворање на генерален конзулат во Корча со јурисдикција во целиот регион. „Граѓаните мора да имаат брз и ефикасен сервис и услуги, поддршка за културни, образовни и економски врски.
Владата продолжува со конкретни мерки и политики кои имаат за цел да ја потврдат вистинската грижа за подобрување на стандардот и враќање на довербата на граѓаните во институциите“.
Македонија
Со запален факел се обидел да подметне пожар во Струмица: под истрага едно лице за загрозување на општата сигурност

Јавен обвинител од Основното јавно обвинителство Струмица донесе Наредба за спроведување истражна постапка против едно лице за обид да изврши – Тешки дела против општата сигурност од член 292 став 1 во врска со член 288 став 1 од Кривичниот законик.
Осомничениот вчера попладне, преку една социјална мрежа, се заканил на лице од Струмица дека ќе му ја запали викендицата, а потоа се обидел заканите да ги реализира.
На локацијата брана Водоча се обидел да подметне пожар и да предизвика поголема имотна штета. Со запален факел од хартија и текстил ги запалил гредите на натстрешницата, кои започнале да чадат и да горат. Со тоа предизвикал ризик од пожар не само на објектот, туку и на повеќе други викенд-куќи и на нискостеблеста и високостеблеста вегетација во непосредна близина.
Поради опасност од бегство и можност да го повтори односно да го доврши делото, јавниот обвинител до судијата на претходна постапка достави предлог за определување мерка притвор.