Македонија
(Видео) Останува тајна колку внукот на Ахмети платил за „Соравија“, ниту стариот сопственик не ја откри сумата

Доверлива е сумата на договорот што бил потпишан за купопродажбата на трговскиот центар „Соравија“, истакна на денешната прес-конференција досегашниот сопственик Хано Соравија.
Одговарајќи на прашањата на новинарите, тој зборуваше за долгот од 20 милиони евра, но прашан за вредноста на договорот кој е потпишан, без разлика на долговите, кусо изјави дека информацијата е доверлива и верува во иднината на проектот со новиот менаџмент очекувајќи набргу да се видат бенефициите.
Рече дека по трансакциите, ќе има само 10 отсто од уделот во „Соравија“ и најави дека бизнисот го сели во Валона, Албанија, каде што има можност за инвестиции со искусни партнери.
За внукот на Ахмети, Дрин, кој го купува трговскиот центар, имаше само пофални зборови.
„Задоволен сум што најдов партнери од вашата држава. Имав можност да го сретнам Дрин. Ни ги кажа своите идеи, има силни компании во заднина. Мојот тим стекна доверба во него и во неговата компанија во следните години. Дрин е млад човек што гледа во иднината. Се надевам дека ќе ги пренесе своите идеи“, рече Соравија, додавајќи дека верувале во неговата личност, а не во политичките врски, бидејќи не биле ни запознаени со значењето на неговото презиме.
Прашан за колава сума ја купил зградата на трговскиот центар, рече дека не може да се сети и дека може само да претпоставува.
Според одредени пресметки, деловниот центар вреди околу 31 милион евра.
Бизнисменот Дрин Ахмети објасни дека дознал за долговите што ги има деловниот центар, а не може да ги врати, по што стапил во контакт со австрискиот милијардер и инвеститор Хано Соравија. Имало разговори и анализи и тогаш Дрин Ахмети решил со фирмите да го купи бизнис-центарот, но да ги исплати и долговите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВМРО-ДПМНЕ: Честит 8-ми Септември-Денот кога македонскиот народ го избра патот на независноста, кој продолжуваме да го градиме со визија, развој и достоинство

ВМРО-ДПМНЕ на сите граѓани им го честита 8-ми Септември, Денот на независноста на Република Македонија.
„На овој историски ден пред 34 години, македонскиот народ ја донесе најважната одлука, самостојно и слободно да ја гради својата иднина во независна и суверена држава.
Денес оддаваме почит на храброста, единството и визијата на сите кои го трасираа патот на слободата и самостојноста.
Но, овој празник не е само потсетник на минатото, туку и обврска за иднината, да продолжиме со градење на силна и стабилна економија, со заштита на националниот идентитет и со создавање на услови младите да останат во својата татковина.
Со гордост денес го носиме македонското знаме и независноста ја градиме низ успесите што секојдневно ги постигнуваме, повисоки плати, нови работни места, инвестиции во домашната економија и подобар стандард за граѓаните.
Нека овој ден не потсети дека силата на народот е во единството, а напредокот е возможен само ако сме обединети со заеднички поглед кон иднината.
Да ја чуваме Македонија во нашите срца, во нашите дела и мисли, затоа што таа е наш дом, наш идентитет и нашата вечна татковина.
Нека ни е честит 8-ми Септември, Денот на независноста!“, се вели во честитката на ВМРО-ДПМНЕ.
Македонија
Три активни пожари во државата, еден под контрола, а 27 се изгаснати

Во последното денонноќие, до 07:00 часот утрово, на територијата на Р.С. Македонија имало вкупно 31 пожар на отворен простор, од кои три се активни пожари, еден е под контрола, а 27 се изгаснати, извести Центарот за управување со кризи.
Активни се пожарите во: општина Берово – Дрџински рид, м.в. Стојковото, село Русиново (каде што гори дабова, букова шума и папрат); Општина Липково – село Никуштак (гори нискостеблеста деградирана шума и дабова шума); Општина Сопиште – Студеничани – село Умово кон селата Драчевица и Варвара (гори мешана вегетација)
Како што информираше ЦУК, под контрола е пожарот во општина Гази Баба – Вардариште (каде што гори ѓубриште), а изгаснати се 27 пожари.
Македонија
Сиљановска-Давкова по повод 8 Септември: Денес, 34 години потоа, сè уште водиме битка за суверена, рамноправна, модерна, стандардна, европска, правна држава, членка на Европската Унија

Претседателката на Македонија, Гордана Сиљановска-Давкова упати честитка по повод 8 Септември – Денот на независноста.
„На 8 Септември 1991 година, легално и легитимно, врз основа на неотуѓивото и непотрошно право на самоопределување на секој народ, на референдумот за самостојна и независна Македонија излегоа 75,74% од електоратот, а „за“ гласаа 72,16% од запишаните!
Така, ние, македонските граѓани, ја крунисавме вековната борба на илинденците и партизаните со унитарна, независна и самостојна држава!
Денес, 34 години потоа, во свет заснован на сила, а не на право, сè уште водиме битка за суверена, рамноправна, модерна, стандардна, европска, правна држава, членка на Европската Унија.
Изминативе три децении се соочивме со бројни внатрешни поделби и кризи, со надворешни притисоци и предизвици, со отстапки и компромиси неусогласени со референдумската одлука од 1991 година, па и со меѓународното и национално право.
Политиката, за жал, нè учи дека неправдите не се отстрануваат со потег на перото, туку со макотрпна домашна и меѓународна борба, со правни аргументи и внимателни политички активности, со макотрпно градење пријателски сојузи, а не со непромислени и избрзани акти, со внатрешно единство, а не со поделби, со самопочит, но и со меѓусебна почит.
Патот кон правото и правдата води преку европеизирана држава, втемелена на копенхагенски критериуми, преку демократска власт, ограничена со систем на ефикасни спреги и кочници, преку компетитивна и просперитетна економија, преку партиципативна политичка култура, преку силно граѓанско општество и слободни медиуми.
Младите не се задржуваат и стимулираат со партизација и политизација, туку со образование и наука што стимулираат, почитуваат и наградуваат знаење, труд и заслуги.
Ако домата ни е европска, сигурна сум дека нашите деца и внуци ќе сакаат да работат, творат и растат семејства тука, во нивната дома, или постојано да соработуваат со татковината, ако се надвор, привремено или трајно. Само во европски амбиент се креира европска иднина!
На крајот, не сум се откажала и никогаш нема да се откажам од македонските национални интереси. Мора да продолжиме да ги реафирмираме и да се бориме за нив дома и надвор, во европските и меѓународни институции, на правен и политички, демократски начин, потсетувајќи се и повикувајќи се на националното и меѓународното право, на 8 Септември.
Нека ни е честит 8 Септември – Денот на независноста!“, се наведува во честитката на Претседателката.