Извршителката Весна Јакимовска, вчера, откога го изгреба новинарот Фуркан Салиу, во полициската станица во Кичево нападна полицаец. Министерството за внатрешни работи денес извести дека извршителката ги уништила и записниците што полицијата ги направила за настанот.

„Вчера, во 23.20 часот, полициски службеници од ОВР Кичево ја лишиле од слобода В. Ј. (60) од Скопје. Таа, претходно, на улицата Трајче Стрезоски во Кичево физички го нападнала Ф. С. (33) од Скопје и ја оштетила неговата службена опрема, а потоа во службените простории на ОВР Кичево, каде што била повикана на разговор, физички го нападнала полицискиот службеник и го уништила изготвениот службен материјал. По целосно документирање на настанот, против неа ќе биде поднесена соодветна пријава“, пишува во денешниот билтен на МВР.

 Фуркан Салиу вчера за „Макфакс“ изјави дека извршителката го изгребала, физички го нападнала и му го оштетила микрофонот.

„Почнавме да ја прашуваме зошто и како, кога го виде микрофонот, реагира како што реагира, го скина кабелот на микрофонот и бевме принудени да викнеме полиција бидејќи ни ги зеде и микрофоните. Во полицијата таа негира, два микрофона си зедовме, ама за еден негира дека е кај неа и не ни го врати. Додека бевме во полиција, имаше големи притисоци, бараше од полицијата да ми се одземат снимките, но тоа не оди така. Не може полицијата да ми одземе снимки. Мене ме изгреба, физички ме нападна и, како што кажав, го оштети микрофонот“, вели Фуркан Салиу за „Макфакс“.

Здружението на новинарите на Македонија (ЗНМ) и Самостојниот синдикат на новинарите и медиумските работници го осудија вчерашниот физички напад кон новинарот Фуркан Салиу од страна на извршителката од Кичево, Весна Јакимовска.