Министерот за внатрешни работи, Оливер Спасовски, заедно со директорот на Бирото за јавна безбедност при МВР, Сашо Тасевски, и државнaта секретарка Магдалена Несторовска присуствува на комеморативен собир во дворот на црквата „Св. Атанасиј“ во Брвеница, а по повод откривање спомен-биста во чест и вечен помен на загинатиот припадник на Специјалната антитерористичка единица „Тигар“ при Министерството за внатрешни работи, Жарко Кузмановски, кој на 9 мај 2015 година, пред точно 7 години, како лидер на тим, извршувајќи службени задачи, заедно со уште седум колеги, прерано го загуби својот живот во полициската операција за неутрализирање на терористичката група во кумановската населба Диво Насеље, а во одбрана на Уставот и суверенитетот на својата држава.

На настанот присуствуваа и членови на семејството на Кузмановски, градоначалникот на општина Брвеница, Јовица Илиевски, претставници на Сојузот на воените инвалиди, претставници на Одборот на бранителите, како и митрополитот тетовско-гостиварски Јосиф и претставници од црковниот одбор на црквата „Св. Атанасиј“.

Министерот Спасовски во своето обраќање истакна дека Жарко Кузмановски со трагичната смрт како наш бранител, припадник на македонската полиција, го заслужи своето место меѓу бесмртните, меѓу сите наши херои, кои оставија вечна трага во историјата на нашава татковина, но и аманет за иднината на генерациите што доаѓаат, бидејќи не постои држава во чии темели не се вградени живототите на нејзините најхрабри синови.

„Така и нашата татковина Република Северна Македонија е создадена и постои благодарение на безрезервната жртва дадена од многу нејзини херои, а наши браќа, синови, татковци, другари, пријатели… Ова спомен-обележје во чест и вечен помен на незаборавот кон Жарко, не е никаква отплата на долгот кон него, оти она со што тој, како и другите неговите колеги и соборци нѐ задолжиле, се враќа само со хумани, професионални, благородни дела, со сѐ она добро, чисто и честито. А загубата е ненадоместлива и речиси е невозможно да се исполни празнината што како колеги, пријатели и блиски ја споделуваме во изминатите седум години од неговото трагично загинување“, рече министерот Спасовски во обраќањето пред присутните.

Припадникот на САЕ „Тигар“, Стефан Соколов, даде краток осврт на животот и делото на Жарко Кузмановски како колега, пријател, сопруг и татко на две малолетни деца.

„Жарко беше вистински пример на храброст и патриотизам, а воедно и несебичност и пожртвуваност за Единицата и за државата. Од страна на претпоставените беше препознаен како човек со висок потенцијал и на него се сметаше како на еден од припадниците што треба да ја градат иднината на Единицата. Како потврда на сето тоа е неговото унапредување во лидер на тим, кој ги поседува сите суштински карактеристики на еден вистински лидер, советник, водач, обучувач, ментор. Toj беше пример за вистински професионалец и имаше несебична љубов кон професијата и колегите. Специјалната антитерористичка единица ‘Tигар’ со гордост го чува споменот на својот загинат припадник и херој“, нагласи Соколов.

Портпаролот на СВР Тетово, Марјан Јосифоски, истакна дека 34-годишниот македонски јунак, Жарко Кузмановски, од тетовска Брвеница, борејќи се храбро, падна за својата татковина, за мирот и спокојството на семејството, на најблиските…

На спомен-обележјето на Жарко Кузмановски свежо цвеќе положија делегација од МВР, предводена од министерот за внатрешни работи Оливер Спасовски, претставници од МВР, претставници од Одделот за специјални полициски операции, припадници на САЕ „Тигар“, како и градоначалникот на општина Брвеница, Јовица Илиевски.

Жарко Кузмановски со највисоки почести е погребан на гробиштата во Брвеница, а постхумно е одликуван со медал за храброст од претседателот на Република Северна Македонија.