Македонија
Откриен тунел во „Идризово“, затвореници со високи казни подготвувале бегство

Затвореници во „Идризово“ копале тунел за бегство. Ова за „Макфакс“ го потврдува Јовица Стојановиќ, директор на Управата за извршување санкции. Тој посочува дека се упатил кон затворот, а акцијата за откривање е спроведена од нивна страна во координација со повеќе институции. Детали не може да сподели и ги најави за подоцна.
Според информации на „Макфакс“, почетокот на тунелот е од шеталиштето на затворениот дел на затворот, а водел до надвор од затворот. Во овој дел на „Идризово“ казни издржуваат затвореници со високи казни, а меѓу нив има и осудени на доживотен затвор.
Извори за „Макфакс“ посочуваат дека сето ова било добро организирано и се работело по претходно разработен план. Неофицијално, сето ова било правено со месеци од страна на повеќе затвореници, распоредени во смени, во зависност од тоа кој кога ќе добиел термин за излез во шеталиштето.
На терен е излезена и увидна екипа на МВР, односно крим-полиција. Се очекуваат повеќе детали за подоцна.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
93 пациенти повредени во пожарот во Кочани закрепнаа, уште 100 се лекуваат во странство и во домашните болници

Од вкупно 193 повредени во пожарот во Кочани, 93 пациенти закрепнаа и заминаа на домашно лекување, а во болниците во странство и кај нас се лекуваат уште 100 пациенти. Министерот за здравство Арбен Таравари утрово кажа дека е подобрена состојбата на еден од четворицата пациенти кои се во критична состојба.
„Имаме добри вести. Вкупно ни остануваат од 193 пациенти за среќа само 100 пациенти кои се лекуваат од кои за среќа денеска имаме само тројца критични. Во Македонија се лекуваат 20 пациенти. На Клинички центар петмина, во Стара градска седуммина, петмина во ГОБ ‘8 Септември’ и тројца во приватните болници. Надвор од државата се лекуваат 80 пациенти и денеска се враќаат уште двајца пациенти. Имаме најава за враќање на повеќемина пациенти до крајот на неделата“, рече министерот Таравари.
Еден од пациентите кои цело време се во критична состојба, министерот Таравари кажа дека сега е многу подобар но нагласи дека здравствената состојбата на овие пациенти постојано се менува.
Двајцата пациенти кои беа на лекување во странство, а денес се враќаат се од Полска и Белгија.
Македонија
Над 340.000 пензионери во државата од денес ќе добиваат за 2500 денари повисоки пензии

Над 340.000 пензионери во Република Северна Македонија од денес ќе добиваат за 2500 денари повисока пензија. Со линеарното покачување на пензиите во месец Септември и мартовската пензија во месец Април, пензионерите добиваат за 5000 денари повисоки пензии за само 9 месеци мандат од оваа Влада, извести МТСП.
„Покачувањето на пензиите беше едно од предизборните ветувања на оваа Влада, која веднаш, на првата владина седница, започна со постапката за нејзино реализирање.
Како Влада и ресорно министерство ја потврдуваме грижата за нашата највозрасна категорија на граѓани. Продолжуваме и понатаму со креирање на политики и мерки кои ќе го унапредуваат квалитетот на живот на пензионерите“, велат од МТСП.
Македонија
За една недела „пајакот“ кренал 116 возила

ЈП Паркинзи на Општина Центар во соработка со Сообраќајната полиција-Скопје во периодот од 24 до 30 март, со помош на специјалните возила „Пајак“ отстранија 116 непрописно паркирани возила кои го попречувале нормалното и безбедно одвивање на сообраќајот, информираат од ПОЦ.
„ЈП ПОЦ и Општина Центар континуирано ќе ја спроведуваат оваа мерка и апелираат до граѓаните да ги почитуваат правилата и прописите и да ги оставаат своите возила само на пропишаните места за да им се овозможи на пешаците и велосипедистите нормално движење по тротоарите и велосипедските патеки, а на возилата безбедно движење по улиците“, се наведува во соопштението.