Македонија
„Откриј го националниот парк Маврово“: кампања за природата, дивината и иднината

Под слоганот „Откриј го Националниот парк Маврово“, Јавната установа Национален парк Маврово ја започна својата најнова кампања за подигнување на свеста за зачувување на природата и промоција на природните и културните вредности на паркот.
Како најголем национален парк во Македонија, НП Маврово е дом на ретки природни богатства, автентични пејзажи, разновиден биодиверзитет и еден од највпечатливите жители на природата
во регионот – балканскиот рис. Оваа кампања има за цел да ги реафирмира вистинските вредности
на НП Маврово, неговите природни богатства и потребата од нивно зачувување.
Во следниот период, кампањата ќе информира за значењето на националниот парк и неговата
улога во заштитата на биодиверзитетот, ќе промовира одржливи туристички практики и ќе
поттикнува активности кои треба да ја зајакнат посветеноста на заедницата кон неговото
зачувување.
НП Маврово е повеќе од природен рај – тоа е нашето живо наследство, кое мораме да го зачуваме
за идните генерации. Преку кампањата Откриј го Националниот парк Маврово, сакаме да ги
инспирираме посетителите да ја откријат убавината на паркот на одговорен начин, да научат повеќе
за неговите вредности, и да станат дел од неговата заштита – изјави директорот на НП Маврово,
Харис Ибраими.
Кампањата ќе трае речиси два месеци и ќе биде реализирана низ различни медиумски канали, со
засилен фокус на дигиталните платформи. Преку социјалните мрежи, информативни видеа,
интерактивни содржини и едукативни материјали, граѓаните ќе имаат можност да се вклучат и да
откриваат нови информации со цел подигнување на свеста за значењето на зачувувањето на
природата.
Како дел од кампањата, во Маврови Анови, спроти Инфо центарот на НП Маврово, е поставен
дигитален видео дисплеј преку кој посетителите ќе можат да ги добиваат сите информации и
новости за паркот. На него, преку видеа, ќе бидат промовирани природните убавини, ретките
видови и можностите за авантуристички доживувања.
Со скенирање на поставениот QR код, заинтересираните ќе можат директно да купат билет за влез
во паркот и да ја испланираат својата следна авантура во величествената природа на територија на
НП Маврово.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Буџетот на Чаир, Бујар би го потрошил за една недела, државниот ревизор му ги извади валканите алишта на виделина

Кандидатот за градоначалник на Чаир од коалицијата „Вреди“, Изет Меџити, денеска реагираше на начинот на кој поранешниот министер Бујар Османи ги менаџирал јавните пари, предупредувајќи дека злоупотребите и вештачки надуените цени во тендерите се директна опасност за секоја институција и за буџетот на граѓаните.
„Ако само замислиме дека со вакви цени, со вакви рекетирања, Бујар ќе ја косеше тревата во Чаир исто како во салата ‘Борис Трајковски’, тогаш е јасно дека буџетот на општината ќе се проголта за една недела. Со таков начин на лошо менаџирање, наставниците ќе останеа без плати, а граѓаните без основни услуги“, изјави Меџити.
Тој се повика на последниот извештај на Државниот завод за ревизија, кој како што оцени, констатирал сериозни злоупотреби при организацијата на дводневен самит, за кој биле потрошени околу два милиони евра државни пари.
„Овде не станува збор за мои зборови или политички обвинувања. Овде зборуваат фактите, документите и официјалните извештаи. А кога еден министер троши два милиони евра за дводневен самит, додека граѓаните се мачат со инфраструктура, образование и основни услови, тоа е непростливо“, нагласи Меџити.
Тој потсети и на времето кога Османи беше министер за здравство, споменувајќи дека во Гинеколошката болница во Чаир тогаш добил прекар „пациентот“ – што според него е симболичен показател за неуспешното раководење со институциите.
Меџити кој денес оствари посета на ОУ “Васил Главинов” порача дека Чаир заслужува транспарентно управување, реални инвестиции и грижа за граѓаните, а не злоупотреби и тендери со рекетирање.
„Граѓаните имаат право да знаат каде завршуваат нивните пари. Моја обврска како иден градоначалник е да ја вратам довербата и да го заштитам буџетот на Чаир од вакви злоупотреби“, заклучи тој.
Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.