Македонија
Отчет на Ѓорѓиевски: За две години реализирани се 90% од четиригодишната програма
Под слоганот “Големи идеи, за сериозни промени”, градоначалникот Орце Ѓорѓиевски синоќа го презентираше отчетот од својата двегодишна работа. Реализирани се 90 проценти од целокупната предизборна програма, предвидена за четири години, истакна во своето излагање, додавајќи дека како никогаш досега во овие 30 години, е извршена обнова на инфраструктурата. Асфалтирани се 44 км улици, атмосферска мрежа во должина од 5470 метри, фекална канализациона мрежа 6690 метри и 3610 метри водоводна мрежа. Изградени се 1300 нови паркинг места, два нови пазари, а големи се и инвестициите во образованието. Како што информираше градоначалникот Ѓорѓиевски, сите училишта се опремени со смарт уреди, обезбедени се компјутери за сите наставници, ранчиња за сите првачиња, наскоро и униформи за сите основци. Изградени се сензорни соби во сите училишта, изградени и обновени спортски училишни сали. За само две години, имаме две нови градинки. Ја ставивме во функција градинката во Драчево и за првпат отворивме нова, целосно инклузивна градинка во Усје. Неколку објекти со значително проширен капацитет. Ги распишавме условите за избор на најповолен изведувач за реконструкција и проширување на градинката Пеперутка1 во Драчево, а наскоро ќе градиме целосно нов објект во 11 Октомври Згради, намалувајќи ги од листите на чекање од 400 на двоцифрен број дечиња-потенцираше градоначаликот Ѓорѓиевски.
Тој посебно ја истакна изградбата на спортската инфраструктура, со посебен акцент врз обновата на запуштените спортски терени и локации кои некогаш беа култни места. Се работи за 11 спортско-рекреативни центри и паркови.
Кисела Вода е првата дигитализирана општина на Балканот која за граѓаните обезбеди услуги по електронски пат, а наспроти минатото во кое оваа локална самоупрва беше симбол за криминал и корупција, сега е првата општина која после 1965 година распиша меѓународен конкурс за идејниот лик на Расадник, поддржан од сите македонски авторитети од областа на урбанизмот и архитектурата, како и од своите жители. Жири комисијата која имаше меѓународен карактер одлучи дека Расадник кој претходното раководство сакаше да го загуши со 99 згради, сега ќе се уредува согласно принципите за хумано живеење. Градоначалникот Ѓорѓиевски информираше и за сетот мерки за поддршка на социјално загрозените граѓани, за старите лица, како и за лицата со попреченост. Заокружи со проектите од културата после кои Општина Кисела Вода стана симбол за одличен културно-забавен живот во главниот град.
Градоначалникот Ѓорѓиевски потенцираше дека и покрај тоа што го презеде раководството на Општина Кисела Вода со наследен долг од 3 милиони евра, сега таа е во ликвидна кондиција и притоа се спроведува рамномерен развој во сите населби. Во контекст на буџетот и транспарентноста, на влезот од Домот на културата “Билјана Беличанец” каде се одржа настанот, имаше штанд каде граѓаните ги запишуваа своите идеи за претстојниот Буџет 2024.
-Концептот “Големи идеи за сериозни промени” го продолжуваме со уште поголема енергија и одлучност, користејќи го секој ден што ни претстои за поубава Кисела Вода во која ќе биде престиж да се живее, инвестира и работи, потенцираше на крајот градоначалникот Ѓорѓиевски заблагодарувајќи им се на сите граѓани, на Советот и неговиот претседател и на администрацијата за цела досегашна поддршка и посветена работа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Теретана на отворено за прв пат во општина Илинден
Комплетно опремена спортска теретана на отворено за прв пат добија жителите на Општина Илинден, која се наоѓа кај пешачко – велосипедската патека во Марино.
Градоначалникот на општина Илинден, Александар Георгиевски истакна дека во рамки на ова фитнес катче, каде младите па и повозрасните жители на општината ќе можат да се рекреираат и вежбаат, поставени се повеќе најсовремени фитнес справи.
Досегашната пракса на инвестирање и создавање на услови за спортување, постојано се докажува како највредна инвестиција за сите генерации, па затоа општина Илинден од сопствениот буџет оддвои средства за реализација на спортската теретана на отворено, а во наредниот период продолжува и понатаму со инвестиции во спортот и спортските терени на нејзина територија, соопштуваат од општината.
Македонија
Вицегувернерката Нацевска: Продолжуваат активностите на Народната банка за развивање на домашниот финансиски пазар
„Ефикасното спроведување на монетарната политика, покрај од мерките на Народната банка, во голем дел зависи и од функционалноста и натамошниот развој на домашните финансиски пазари, меѓу кои девизниот пазар има клучна улога. Оттаму, Народната банка продолжува со активностите за натамошно унапредување и развивање на домашниот девизен пазар и во таа смисла, искажуваме поддршка за иницијативите и активниот придонес на домашните банки. Во тој процес, нашата институција ја одржува активната соработка со сите релевантни банкарски здруженија, со деловните банки и со сите останати чинители, заради натамошно унапредување и развивање на домашниот финансиски пазар“, порача вицегувернерката Емилија Нацевска во обраќањето на 29-тото годишно собрание на Здружението на финансиски пазари – АЦИ коешто се одржа во Струга.
Во обраќањето, Нацевска нагласи дека Народната банка постојано работи на унапредување на ценовната транспарентност и натамошно продлабочување на домашниот девизен пазар.
„За задржување на професионализмот и за усогласување со најдобрите меѓународни практики, се разгледуваат можностите за прифаќање на глобалниот кодекс за девизниот пазар (FX Global Code), како во Народната банка, така и од страна на банките. Оттаму се и очекувањата дека АЦИ Македонија и Министерството за финансии ќе продолжат со активната соработка за примена на договорот ИСДА на домашните пазари, како можност за подобро интегрирање и достапност на деловните банки до странските финансиски пазари, во склоп на проектот финансиран од ЕБОР за приспособување на домашната правна рамка за деривати и репо-договори со меѓународната практика“, порача Нацевска.
Поволните движења на девизниот пазар коишто беа забележани минатата година се резултат на нормализирањето на побарувачката на девизи од енергетскиот и од останатите водечки корпоративни сектори, а значителен придонес има и натамошното зголемување на понудата на девизи од физичките лица, што е силен сигнал за довербата во домашната валута. „Ваквите позитивни движења на девизниот пазар изминатата година придонесоа за релативно обемни интервенции на Народната банка за откуп на вишокот девизни средства од банкарскиот систем, коишто беа близу до рекордните нивоа пред пандемијата“, кажа Нацевска. Поволните трендови на домашниот девизен пазар и на почетокот на тековната година влијаат поволно врз нивото на девизните резерви. Со тоа, според сите релевантни меѓународни одредници, показателите за адекватноста на девизните резерви се постојано во сигурната зона, гарантирајќи ја стабилноста на курсот на домашната валута.
Македонија
Одземена дрога испратена во мала пратка и огнено оружје од скопјанец
Одземени 30 грама дрога и пиштол од скопјанец, по заедничка акција на инспектори од Одделението за истраги при Царинската управа и крим полицијата при МВР.
Дрогата е откриена при претрес на лицето извршен откако истото подигнало пратка во Пошта пристигната од Германија. Во координација со дежурен јавен обвинител, инспектори од Секторот за контрола и истраги заедно со припадници од МВР извршија и претрес во домот на лицето каде е пронајден пиштол кој е одземен од страна на царинските инспектори, соопшти Царинската управа.
Против лицето ќе биде поведена кривична пријава до Основното јавно обвинителство.
Царинската управа согласно приоритетите во континуитет спроведува акции за сузбивање на сите форми на криминал, грижејќи за безбедноста на своите граѓани, додаваат во соопштението.