Македонија
Охрид незаконски исплаќал отштети за земјотресите, случајот заврши во МВР

Општина Охрид по земјотресите во 2017 година, одобрила исплаќање пари за отштета на четири лица, иако барања биле поднесени од двајца. Најдени се голем број нерегуларности и покрената е дисциплинска постапка против лице од општината вмешано во овој процес, дознава „Макфакс“. Во општина Охрид се проверува дали има и други фалсификувани документи за отштети од земјотресите. Пари како отштети биле исплаќани и на лица кои не ги исполнувале условите од јавниот повик и чии барања не биле комплетирани.
Нашите извори тврдат дека граѓаните аплицирале за општината да им ги надомести парите по претходно објавен јавен оглас, но немало никаков пишан документ за критериумите според кои барањата се одобрувале или одбивале.
Покојниот градоначалник Јован Стојаноски еден ден пред смртта формирал комисија со задача да се изврши проверка на извршените исплати за штети од земјотресите. Членовите донеле заклучок дека претседателот на комисијата, Радован Велјановски, криел дел од документацијата. Четири дена по Нова година се формирала и дисциплинска комисија, која вчера одлучила дека службеникот Велјаноски ќе биде суспендиран од работа.
Но, ова е само дел од повеќето случаи со нерегуларности.
Исплата била направена и на вработен во Кабинетот на градоначалникот, Илија Пиперкоски, иако тој не е сопственик на имотот каде што имало штети од земјотресите. Во јавниот повик наведено е дека сопственикот на имотот треба да приложи трансакциска сметка заедно со имотен лист. Но, парите, наместо на сметка на мајката на Пиперковски, која го поднела барањето и која е сопственик на имотот, легнале на негова сметка. Службеникот Пиперовски вели за „Макфакс“ дека според него сѐ е регуларно и додава „Јас сум наследник на имотот, иако таа го поднела барањето. Јас живеам на таа адреса“.
Бидејќи постојат индиции за сторен поголем криминал при исплатите, целата документација за исплатите на средствата ќе ги испитува СВР Охрид и истата ќе биде предадена следниве денови, велат извори за „Макфакс“.
Полицијата сега ќе треба да испитува дали постои комплетна и уредна документација, дали врз основа на изготвениот извештај за констатираната фактичка состојба, елаборат и фотографии е направена реална проценка на настанатите материјални штети. Исто така, ќе се проверува дали начинот на исплата на финансиските средства е во согласност со позитивните законски прописи.
„СВР Охрид презема мерки и активности, односно врши проверки околу тоа дали има нерегуларности поврзани со доделување средства од Општина Охрид за отштета од земјотресите во јули 2017 година. Доколку се утврди кршење на законите, ќе биде поднесена соодветна пријава“.
Засега, исплатата е стопирана за случајот каде четири лица зеле општински пари со две поднесени барања. Но, неизвесно е и дали ќе продолжи исплатата кон останатите лица кои имаат одобрени барања за отштети, во време кога СВР Охрид ќе ја проверува документацијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Герасимовски: Го обновуваме паркингот на „Петар Поп Арсов“, обезбедуваме повеќе ред и подобри услови

Службите на општина Центар интензивно работат на обновување на паркинг просторот на улицата „Петар Поп Арсов“, лоциран зад Вучко.
Во тек е асфалтирање и уредување на паркингот со површина од 550 метри квадратни. По завршувањето на градежните работи, следува обележување на паркинг- местата, по што просторот ќе биде целосно функционален и подготвен за користење, извести Општината.
Реновирањето на паркингот се изведува на барање на жителите во рамки на караванот „Се гледаме во маало”, кои се соочуваат со хаотичната состојба при паркирањето и недостиг на паркинг-места, велат од Општината.
„Со уредувањето и обележувањето на овој паркинг-простор им излегуваме во пресрет на потребите на центарци, овозможувајќи организирано и поефикасно паркирање. Целта ни е да создадеме безбеден и уреден простор, со современи стандарди и подобра пристапност,“ рече градоначалникот Герасимовски.
Со овој зафат, Центар продолжува со инвестиции во подобрување на урбаната и комунална инфраструктура, се додава во соопштението на Општината.
Македонија
„Влен“: Арбен Фетаи ги уништи плановите на ДУИ и заложниците на Ѓока

„Пропагандната машина на ДУИ и нејзините патерици започнаа ниска кампања на клевети и лаги против вицепремиерот, Арбен Фетаи. Криејќи се зад лажни профили и користејќи валкани методи, тие се обидуваат да ја оцрнат неговата личност и да го попречат процесот на промени што сега стана незапирлив“, велат од „Влен“.
„Овие напади докажуваат само едно: моќта на ВЛЕН ги уништи плановите на ДУИ и Таравари со кланот Ѓока. Тие се плашат од транспарентноста, од чистите раце и од нашата решеност да ги искорениме злоупотребите, корупцијата и мафијашките врски што ја држат државата како заложник две децении.
ВЛЕН има фундаментална разлика со ДУИ и нејзините патерици: Ниту еден јавен денар не е злоупотребен од нашите претставници. Нивното богатство и интегритет се отворена книга, секој цент е заработен чесно. Без компромис и без контакт со ДУИ, нашата дистанца е јасна, бидејќи секој што ќе ја допре ДУИ е извалкан од нивното морално распаѓање. Нашето донесување одлуки е слободно, невлијателно и неуценето, бидејќи нашата единствена зависност е од нашиот народ и нација, а не од олигарси и нарко-босови. Затоа, нивните напади оркестрирани од зад сцената се едноставно очај. Тие не се осмелуваат да се соочат со вистински обвинувања, факти и аргументи, бидејќи знаат дека ВЛЕН е олицетворение на чисти раце и чесна политика.
Нека клеветат со лажни профили, нека лаат нивните дигитални платеници, караванот ВЛЕН незапирливо се движи напред, градејќи иднина каде што Албанците се посилни, а не експлоатирани, иднина без ДУИ, без патерици и без заложниците на Ѓока“, се наведува во соопштението на „Влен“.
Македонија
Шукова: Време е да ги издигнеме Скопје и Бутел од калта во која се оставени

Кандидатката за градоначалник на Град Скопје од СДСМ, Каја Шукова, и кандидатката за градоначалничка на општина Бутел, Оливера Ливринчиќ, се сретнаа во Бутел, каде разговараа за конкретни проекти и решенија со кои општината конечно ќе добие вистинско внимание и современа урбана инфраструктура.
На прошетка низ општинaта тие разговараа за повеќе клучни теми, меѓу кои и запоставената состојба на реката Серава, сообраќајниот метеж, како и потребата од нова, функционална инфраструктура која ќе донесе поврзаност и квалитет на живеење за граѓаните на Бутел.
„Време е за паметни решенија за Бутел и Скопје. Бутел конечно ќе добие посветено лидерство, ред и модерна инфраструктура каква што бутелчани заслужуваат“, порача Шукова, истакнувајќи дека нејзината визија за Скопје подразбира грижа и развој рамномерно во секој дел од градот.
Кандидатката за градоначалник на Бутел, Ливринчиќ, се осврна на состојбата на реката Серава и нејзината целосна запоставеност од досегашната локална самоуправа. Таа најави проект за уредување на целиот кеј со пешачка и велосипедска патека, создавајќи безбеден простор за сите генерации.
„Мој план е пешачка и велосипедска патека по целиот кеј. Ова ќе биде место за рекреација, безбедно за сите генерации“, најави Ливринчиќ.
Последното уредување на реката Серава, потсети Шукова, било направено во 2021 година од поранешен градоначалник од редовите на СДСМ по кој изостанала секоја реализација и одржување од страна на новото локално раководство. Шукова на Ливринчиќ и ги презентираше плановите на градот за овој дел на градот Скопје.
„Мојот план за овој дел од градот подразбира изградба на 2 нови моста на реката Серава и надвозник над булеварот Никола Карев, потпорни ѕидови од 2 километри, атмосферска и фекална канализација. Ова е голем инфраструктурен чекор но тука не застануваме. Планираната нова клучка кај булеварите ,Словенија и Никола Карев ќе биде нова порта на Скопје. Ги поврзуваме Бутел со Ѓорче, Карпош и Чаир. Ова ќе биде современ инфраструктурен јазол со велосипедски и пешачки патеки, ЛЕД осветлување и директен пристап до скопската обиколница“, најави Шукова.
Притоа двете истакнаа дека имаат решение за сообраќајниот хаос меѓу Автокоманда и Бутел, а тоа е булеварот Хрватска кој предвидува нови коловози, зелени површини, велосипедска патека и безбедни пешачки зони.
„На Скопје и Бутел им е неопходно ново раководство и управување за да се издигнат од калта во која се оставени. Скопје и Бутел имаат потреба кандидати кои ќе се спротивстават на криминално ВМРО-ДПМНЕ кое 4 години системски ги урниса Скопје и скопските општини“, порачаа кандидатките на СДСМ за Скопје и Бутел.