Македонија
Павле Трајанов е реизбран за претседател на Демократскиот сојуз

Со учество на 350 делегати и гости денес пред „Хотелот Белви“ во Скопје, Демократскиот сојуз го одржа Шестиот конгрес, на кој ги презентираше своите програмски приоритети под мотото „За Европска Македонија“ и учеството на претстојните парламентарни избори.
Павле Трајанов е повторно избран за претседател на партијата, а истовремено е избран и нов Централен совет на Демократскиот сојуз.
Конгресот се одржа во духот на одбележувањето 20 години од формирањето на партијата, за што зборуваше Трајанов.
„Демократскиот сојуз повеќе од дваесет години опстојува на политичката сцена, препознатлив е по своите принципиелни ставови, објективност и искреност. Ние ниту едно значајно прашање не премолчуваме, за се имаме свој став и тој им го соопштуваме на граѓаните“, рече Трајанов.
Во своето обраќање Трајанов истакна дека приемот во НАТО е од огромна важност за стабилноста на државата, владеењето на правото и економскиот развој, а одлуката на ЕУ за започнување на пристапните преговори ќе ги забрза демократските процеси и севкупниот развој на Македонија. Промената на името на Република Македонија е најтешката и најризичната одлука за која следните генерации од историска дистанца ќе можат да дадат објективен суд дали ја зајакнале независноста и отвориле перспективи на Македонија.
„На сите ни е јасно дека без договорите со Грција и Бугарија далеку ќе бевме и од НАТО и од ЕУ, и затоа сум против ретроградните идеи со кои се најавува ревизија на договорите, судење за велепредавство и сл. Тоа е манипулација со чувствата на граѓаните“, истакна Трајанов.
Врвен приоритет во дејствувањето на ДС ќе бидат младите, со реални системски решенија и конкретни проекти. Ќе се формира посебен фонд со кој младите ќе управуваат за отворање нови бизниси и ќе можат да ги реализираат своите идеи.
Демократскиот сојуз во парламентот ќе предложи нов Закон за борба против организираниот криминал, со конфискација на криминално стекнатиот имот и забрана за политичко дјествување. Трајанов најави и уставни промени за прецизно дефинирање на одговорноста на судиите и обвинителите, но и други системски промени околу можноста за распуштање на парламентот, импичмент на претседателот на државата, преиспитување на Бандетеровото мнозинство и други решенија со кои ќе се јакне граѓанскиот концепт на државата.
Натамошната соработка со другите партии, според Трајанов, ќе зависи дали ќе останат на предизборниот договор, после изборите, во рок од три месеци да се прифатат предлозите на Демократскиот сојуз, Македонија да биде една изборна единица, за да се создадат еднакви услови и шанси за сите партии, и да се сруши монополот на ВМРО-ДПМНЕ и СДСМ, кои 30 години се менуваат на власт, но државата стагнира.
На конгресот свое обраќање имаше и Зоран Димитровски, генерален секретар на ДС, кој ги презентираше програмските приоритети на партијата во наредниот четиригодишен мандат. Според Димитровски, со предлозите на ДС за уставни и системски промени ќе почне да се враќа правдата и довербата во системот. Тој зборуваше и за потребните реформи во здравството и образованието и медиумската област.
„Предлагаме обврска дипломираните лекари да останат да работат најмалку 10 години во Македонија, но државата да им понуди плата од 2000-3000 евра, а парите ќе ги обезбедиме откако ќе ги скратиме бројот на министрите, агенциите и владините советници.
Програмата на ДС предвидува воведување предмети медиумска писменост и критичко размислување во основните и средните училишта, како и зајакнување на слободните и критички медиуми преку создавање посебен Фонд за проверка на фактите и истражувачко новинарство од 1,5 милиони евра годишно.
Потпретседателот на Демократскиот сојуз Зоран Петров зборуваше за 20 годишниот јубилеј на партијата, при што истакна:
„Несоборлив факт е дека обемот и квалитетот на новите идеи, планови и предлози е граничникот кој ги раздвојува големите од малите партии, а не бројот на членството, бројот на општински организации, бројот на партиски возила, бројот на вработени во големиот број партиски подружници и слично. Демократскиот сојуз посветено се придржуваше до ова начело во изминатите 20 години, поставувајќи пред себе високи критериуми и стандарди во политичкиот натпревар. Демократскиот сојуз го стави својот потпис врз цела серија проекти, што е во функција на неговиот имиџ на сериозна, динамична и современа политичка партија“, рече Петров.
Свое обраќање на конгресот имаше и потпретседателката на Демократскиот сојуз, Весна Стоименовска Атанасов, која зборуваше за неправилностите во системот поради кои изминатите години се воочени многу неправди како резултат на политичкото самоволие.
„Програмски приоритет на Демократскиот сојуз е воспоставување на систем на одговорно и чесно владеење, што е пак многу тесно поврзано со постоење на правна држава, ефикасни и непристрасни институции и неселективна борба против организираниот криминал и корупцијата.
Од Конгресот, Демократскиот сојуз упати повик до сите граѓани да излезат масовно и да ги поддржат европските вредности, да гласаат за кандидатите на коалицијата „Можеме“ под реден број 3.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Овој ден буди тага, но ќе се памети и по човечноста и хуманоста, Град Скопје оддаде почит на жертвите од земјотресот

Делегација на Град Скопје предводена од градоначалничката Данела Арсовска, оддаде почит на жртвите од катастрофалниот земјотрес кој пред 62 години главниот град го остави во урнатини. Скопје се сеќава на 26 јули 1963 година, ден кој засекогаш го промени ликот на градот, трагедија која одзеде над илјада животи.
„Овој ден буди чувство на тага, но секогаш ќе се памети и по човечноста и хуманоста на сите кои помогнаа во најтешките моменти“, велат од Град Скопје.
Во рамки на одбележувањето 62 години од земјотресот, вечерва во 20:00 часот во Музејот на Град Скопје ќе биде отворена изложбата „Скопје за време на земјотресот и потоа“.
Македонија
На граничните премини Табановце и Пелинце се чека по 45 минути

Интензитетот на сообраќај на патните правци надвор од градските средини е зголемен, јави АМСМ. Поради летните одмори се бележи зголемена фреквенција на возила на граничните премини Табановце и Пелинце, а времето на чекање е околу 45 минути.
На останатите гранични премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Сојузот потсетува дека од 1 јули до 31 август на државните патишта во Македонија на сила е летен времен режим на сообраќај со кој се забранува движење на тешки товарни возила со вкупна маса над 15 тони, за време на деновите од викендот и за денови при екстремно високи температури. Термините се следни:
петок од 17:00 – 22:00 часот,
сабота од 09:00 до 18:00 часот и
недела од 09:00 до 22:00 часот.
Во деновите со екстремно високи температури, определени од Министерство зa здравство, забранaта ќе важи и од понеделник до четврток во период од 11:00 до 17:00 часот.
Ограничувањето не се однесува на возила кои превезуваат животни, цвеќе, хуманитарна помош, жито и житни култури и леснорасиплива стока, нафта и нафтени деривати, превоз на опасни материјали и возила кои вршат превоз за компании кои имаат склучено договори за изведување на проекти на државните патишта со ЈП за Државни патишта.
На магистралниот пат А2 делница: Скопје – Охрид – Скопје (со важност до 01 септември) се забранува движење на тешки товарни возила чија вкупна маса преминува 7,5 тони за време на викендите, во следните интервали:
петок од 15:00 – 22:00 часот,
Uncategorized
Го онесвестиле удирајќи го со клешти оти се сомневале дека им краде лубеници

Јавен обвинител од Основното јавно обвинителство Скопје донесе Наредба за спроведување истражна постапка против две лица за кои постои основано сомнение дека заедно во група извршиле кривично дело – Насилство предвидено во член 386 став 6 во врска со став 3 и став 1 од Кривичниот законик.
Осомничените, на возраст од 39 и 31 година, на 24 јули во скопското село Орешани извршиле грубо насилство и ја загрозиле сигурноста на едно лице, за кое сметале дека украл лубеници од нивата на првоосомничениот.
Со товарно возило го следеле оштетениот додека тој со автомобилот се движел од Петровец кон селото Таор, се додека не се паркирал во дворот на куќата на неговиот внук во Орешани, се наведува во соопштението од Обвинителството.
Осомничените пристигнале веднаш по него, излегле од возилото и го нападнале. Насилно го извлекле оштетениот од возилото и го удирале со тупаници и шамари по главата и телото. Вториот осомничен извадил водоводџиски клешти од камионот, па и со нив го удирале се додека оштетениот не паднал во безсознание. Му нанеле тешки телесни повреди поради кои тој во живото- загрозувачка состојба е хоспитализиран на Клиниката за неврохирургија. Со дејствијата на насилство, кај сведокот – внукот на оштетениот и во јавноста предизвикале чувство на несигурност, загрозување и страв.
Ценејќи ги сите околности и ризици, јавниот обвинител до судијата на претходна постапка од Основниот кривичен суд Скопје достави предлог за определување мерка притвор за двајцата осомничени.