Македонија
Панова: ВМРО-ДПМНЕ ќе ги искористи сите можности да го спречи изборот на Кацарска за уставен судија
Пратеничката група на ВМРО-ДПМНЕ ќе ги искористи сите можности согласно Уставот, закон и Деловникот за работа на Собранието да го спречи изборот на Кацарска за избор на уставен судија.
Кацарска е судија на кој Уставен суд ѝ поништил одлука, таа е извршител и џелатот на власта. Кацарска е негативен пример за кој пишуваа универзитети од САД, таа не може и не смее да биде уставен судија, изјави Ели Панова, пратеник на ВМРО-ДПМНЕ.
Според Панова, со предлогот Кацарска да биде уставен судија само се заокружува договорот помеѓу власта и Кацарска.
„Таа требаше сите неистомисленици да ги осуди на максимална казна, а за возврат да биде избрана за уставен судија. Кацарска не е ниту морално, ниту стручно соодветна за да биде уставен судија. Нејзината номинација е благодарност и оддолжување од трас-трас ‘луј витон судството’ на власта, поради извршувањето на нарачките за драгонски казни. Кацарска значи неправда, а нејзиниот избор значи целосна контрола на власта врз Уставниот суд.
Во свое гостување во телевизиска емисија, во телевизијата на сега веќе осудениот Боки 13, сама кажа дека е комуњарка.
Кацарска беше дел од предметот „Поткуп“ во кој Зоран Заев беше фатен со видео и аудиоснимка како зема поткуп, предмет во кој таа снимка не се призна за доказ, а Заев беше ослободен.
Добрила Кацарска јавно се постави како портпарол на СДСМ во време на кампањата за Парламентарните избори 2020, кога за претседателот на ВМРО-ДПМНЕ Христијан Мицкоски зборуваше дека застанал на страната на криминалот и бранел криминалци, затоа што партијата искажала критика за нејзиното работење. Апсолутистот Луј 14 рекол „Државата, тоа сум јас“. Кацарска, извршителот власта, егзекуторот на одлуките на Бихаќка вели: „Правдата, тоа сум јас“.
Зошто Кацарска не може да биде уставен судија говори и фактот што таа не го почитува Уставот. Кацарска е судија на кој Уставниот суд ѝ поништил одлука. Судија кој не го знае и почитува Уставот не смее да биде уставен судија. Дополнително Комисијата за заштита од дискриминација утврди во повеќе наврати дека судијата Добрила Кацарска повредувала основни човекови права.
Кацарска е судија која не ги почитува жените.
Противуставните одлуки на Кацарска станаа предмет на интерес и на најврвните универзитети во светот, како Универзитетот Колумбија од САД, кој пишува за Добрила Кацарска како судија кој го прекршил Уставот и Европската конвенција за човекови права. Само во Северна Кореја и некои африкански племиња за уставен судија би се избрал некој кој го прекршил Уставот и човековите права, потврдено со одлука на Уставен суд. Но за власта тоа не е проблем.
Поставувањето на Кацарска за судија во Уставен суд е исто иста како одлуката Зоран Заев, трипати аболициран, да раководи со советот за реформи во правосудството. Или на Лидија Димова да ѝ се даде да биде министерка за финансии. Или најпрецизно, како на Катица Јанева да ѝ се дозволи да биде министерка за правда.
Кацарска држеше маратонски рочишта секој ден во неделата пред промената на името во случајот во кој имаше 5 обвинети пратеници, од кои тројца гласаа за промена на името и добија амнестија. За на крај својата пресуда, со која на 211 години затвор осуди луѓе за измисленото дело тероризам, да ја темели на исказите на докажаниот криминалец и лажен сведок на суд Александар Василевски – Нинџа, кој 4 пати го менуваше исказот за 27 април искажувајќи бројни лаги и измислици. Кацарска не им веруваше на сведоци под заклетва, туку на заколнат криминалец.
Кацарска со драгонски казни со прекршување на законите ги осуди и Јанкулоска, Талевски, Поповски и многу други кои не се истомисленици со власта.
Поставувањето на Кацарска во Уставен е само продолжување на праксата на СДСМ. Секогаш кога СДСМ е на власт, за судии во Уставен суд бира луѓе од многу голема доверба за самиот врв, како што на пример беше и судијката Габер-Дамјановска.
Овие судско-обвинителски кланови мора да станат минато“, порача Панова.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Утре сончево време со температура до 21 степен
Времето утре наутро ќе биде постудено со услови за појава на магла по одделни котлини и речни долини. Преку денот времето ќе биде сончево со мала до умерена локална облачност. Ќе дува слаб ветер од јужен правец, информира УХМР.
Минималната температура ќе биде во интервал од -3 до 4, а максималната ќе достигне од 16 до 21 степен.
Во Скопје, утрото постудено, во делови од котлината магливо. Преку денот времето ќе биде сончево со мала до умерена облачност. Ќе дува слаб југоисточен ветер. Минималната температура ќе се спушти до 2, а максималната ќе достигне до 18 степени.
Под влијание на висок воздушен притисок следува период на стабилно и суво време со постудени утра, а дневната температура ќе биде во пораст, особено во деновите од викендот. Претпладне по одделни котлини и речни долини ќе има услови за појава на магла
Македонија
Божиновска и Јоксимовиќ: Забрзана изградба на гасниот интерконектор Македонија–Србија, се редефинира енергетската карта на регионот
Во рамки на 14. Меѓународен форум за енергија и одржлив развој (IFESD-14), што се одржува во Скопје, министерката за енергетика, рударство и минерални суровини, Сања Божиновска, оствари работна средба со Јована Јоксимовиќ, помошничка министерка за рударство и енергетика на Република Србија, задолжена за меѓународна соработка и европска интеграција.
Во фокусот на разговорите беше изградбата на гасниот интерконектор меѓу Македонија и Србија, проект од стратешко значење за енергетската безбедност и диверзификација на снабдувањето со гас во регионот.
Двете соговорнички се согласија дека проектот треба да се реализира во забрзана динамика, со цел да се овозможи поврзување на гасните системи на двете земји и пристап до нови извори на гас.
На маргините на форумот dополнително, во Министерството за енергетика на Македонија се одржа работен состанок на кој се дискутираше координацијата на институциите и операторите во двете земји за реализација на проектот. Ба разгледани процедурите и техничките чекори за понатамошно убрзување на активностите.
„Гасниот интерконектор со Србија е еден од најважните регионални инфраструктурни проекти што ќе овозможи вистинска енергетска стабилност и сигурност. Овој проект не е важен само за Македонија и Србија – тој е значаен и за цела Европа. Со оваа нова енергетска врска, двете земји добиваат пристап до алтернативни извори и рути, а Европа добива посилен и подобро поврзан Балкан. Ова е чекор што ја позиционира нашата земја како активен и одговорен партнер во новата енергетска карта на Европа. Нашата заедничка цел е овој проект да се реализира во најкраток можен рок – затоа што секој ден е важен за нашата енергетска иднина. Со заеднички напори ќе го реализираме овој проект, во тесна координација и постојана комуникација со нашите партнери од Србија “ изјави Божиновска.
„Гасниот интерконектор со Македонија е проект кој има значење подалеку од нашите граници. Тој е дел од визијата за регион кој е енергетски поврзан, сигурен и усогласен со европските цели. Србија и Македонија заедно покажуваат дека со партнерство и заедничка стратегија можеме да обезбедиме стабилна и предвидлива енергетска иднина. Соработката меѓу нашите две земји во областа на енергетиката е пример како регионалното партнерство може да донесе конкретни резултати. Соработката со колешката Божиновска и со македонскиот тим е интензивна и исклучително конструктивна. Уверена сум дека со заедничка координација и поддршка на нашите оператори ‘Србијагас’ и ‘Номагас’, ќе создадеме нова енергетска оска на стабилност меѓу двете земји. Имаме јасна динамика, завршени студии и поддршка од европските институции. Следниот чекор е координирана акција за изградба. Заеднички ќе работиме на тоа интерконекторот да стане реалност во најскоро време,“ истакна Јована Јоксимовиќ, помошничка министерка за меѓународна соработка и европска интеграција во Министерството за рударство и енергетика на Србија.
Македонија
Утре без вода делови од Карпош
Од ЈП Водовод и Канализација известуваат дека утре ( Четврток )поради изведување на водоводен приклучок ф-100мм на ул. Софиска 7, прекинато водоснабдување ќе имаат корисниците од следниве улици: Софиска, Бриселска, Петар Драганов, Његошева, Копенхагенска и Стокхолмска.
Водоснабдувањето ќе биде прекинато од 09:00 часот до завршување со работните активности. (општина Карпош).

