Македонија
Пановски: Немаме доволен број претставки и жалби од пациенти
Обновената Комисија за заштита на правата на пациентите во Град Скопје се пожали дека нема доволен број претставки и жалби од пациенти што сметаат дека им било прекршено некое право. Иако во јавноста не стивнуваат жалбите од здравството, и јавно и приватно, ретки се оние што официјално се пожалиле. Претседателот на Комисијата, д-р Никола Пановски, денес од говорницата на Советот на Скопје ги повика советниците да ги известат граѓаните дека таа постои и дека може да се пожалат.
„Стапивме во контакт со сите 39 здруженија и ги информираме дека Комисијата постои и чекаме од нив да ги информираат своите челнови за да може да се жалат и да дадат претставки во Градот. Главниот проблем што го имаме, заради тоа што Комисијата, која успешно работела, а според наши сознанија, во 2020 престанала да работи, ѝ истекол мандатот поради короната, па сега треба повторно да ја разработиме, е што немаме доволен број претставки и жалби. Ве замолувам како советници, нè има на веб- страницата и на ‘Фејсбук’, да кажете дека таква можност постои. Многу е лесно пациентите да кликнат на линкот и да излезе формулар бидејќи нам тоа ни треба. Свикуваме состанок и сакаме за секој одделен случај да имаме расправа, да помогнеме колку можеме“, рече Пановски.
Досегашните искуства од функционирањето на Комисијата пред корона-кризата покажуваат дека речиси 50 отсто од претставките биле позитивно решени, меѓу другото, со помош од Комисијата. Пановски е зачуден од односот на Градот кон Комисијата оти вели дека со месеци чекале на веб-страницата на Градот да биде поставена вест дека таа повторно работи за да може пациентите да поднесуваат жалби и претставки.
„Уште во октомври го известивме Градот дека Комисијата е конституирана и побаравме тоа да оди на веб-страницата како вест и да има линк. Поминаа два месеца, тоа не се случи, па колешката, која е заменик-претседател, Жаклина Шопова, тука е и Катерина Јовановска, ние тројца сме претставници од Советот, постави советничко прашање. По еден месец доби одговор, тоа беше во јануари, дека Градот ќе ја постави веста. Се работи, според мене, за пет минути работа. Но, откога излезе извештајот, во кој беше наведено сè ова што ви го кажувам, нè замолија да го ублажиме извештајот и веднаш го поставија, по точно четири месеци, дека постои таква комисија. Сосема неразбирливо е сам себе да си пукаш во нога. Се надевам дека Градот сака Комисијата да биде таа што ќе се пофали оти постои и работи“, рече Пановски.
Комисијата ќе отпечати постери и летоци што ќе им ги подели на здравствените установи и на здруженијата за да стане повидлива за пациентите. Известени се сите 39 здруженија на пациенти и од нив е побарано да ги известат своите членови дека секој граѓанин може да се обрати до Комисијата доколку смета дека му се нарушени правата како пациент.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Филипче: Бошњачката заедница е нераскинлив дел од нашето мултиетничко општество
Претседателот на Социјалдемократскиот сојуз на Македонија, Венко Филипче, вечерва присуствуваше на одбележување на Меѓународниот Ден на Бошњаците, во организација на Странката на демократска акција на Македонија (СДА).
Во обраќањето пред присутните, Филипче прача дека бошњачката заедница е нераскинлив дел од општеството и има значаен придонес во развојот и напредокот на Северна Македонија.
„Граѓаните Бошњаци по измените на Уставот од 2001 година, станаа дел од преамбулата и на нашиот Устав. Со нивната традиција, како составен и нераскинлив дел од нашето мултиетничко општество, имаат значаен придонес во развојот и напредокот на државата. Бошњачката заедница во Северна Македонија активно се вклучи во успешниот концепт „Едно општество за сите“, со кој Северна Македонија сега е пример во Ервопа и регионот за дијалог, меѓусебно разбирање и почитување“, рече Филипче.
Воедно, претседателот на СДСМ, Филипче ја потенцираше важноста на Странката на демократска акција на Македонија (СДА), која како коалициски партнер на СДСМ, изминативе години даде поддршка на развојните политиките во периодот на Владата на СДСМ.
„Во основното образование за учениците Бошњаци се врати редовната настава на босански јазик, Северна Македонија и Босна и Херцеговина потпишаа серија на билатерални договори во интерес на граѓаните,Скопје и Сараево станаа збратимени градови. Со својата прогресивна идеологија во изминатите години, СДА активно учествуваше во сите процеси кои ја придвижија државата напред, како што е членството во НАТО и започнувањето на преговорите со Европската Унија“, рече Филипче, додавајќи дека токму тоа и е разликата СДСМ и актуелната власт .
Филипче во своето обраќање нагласи дека СДСМ и СДА и во иднина ќе делуваат заеднички и ќе се залагаат за соживот,меѓусебна почит и интеграција на државата.
„ За жал деновиве сме сведоци на едни политики кои ја враќаат државата назад во изолација, нешто за што граѓаните не гласаа. И тоа не смееме да го дозволиме, не смееме да се откажеме од европскиот пат, од европска иднина за нашите граѓани. СДСМ и СДА и понатаму ќе продолжат да делуваат заеднички, ќе се залагаме за демократските вредности и инклузија на сите заедници, за интеграција, а не за изолација на државата“, порача претседателот на СДСМ, Венко Филипче.
Македонија
Промена на времето: УХМР за утре најавува дожд, силен ветер и драстичен пад на температурите
Управата за хидрометеоролошки работи најавува значителна промена на времето утре – дожд, засилен ветер и пад на температурата.
Утре под влијание на влажна и постудена воздушна маса од север ќе настапи позначителна промена на времето. Од утринските часови најпрвин во северните делови, ќе има повремени врнежи од дожд и локална појава на грмежи. Ќе дува силен ветер (наместа над 70км/ч.) кој ќе продолжи и во понеделник.
ИЗВОР: УХМР
Дневната температура значително ќе се намали (утре за 6 до 8, а во понеделник уште за дополнителни 4 до 6 степени). Потоа во следните два дена времето ќе биде сончево со ниски утрински температури, а дневните ќе бидат во пораст.
Во Скопје, утре ќе има повремени врнежи од дожд, локално со појава на ретки грмежи и силен ветер.
Од четврток се очекуваат нови врнежи од дожд.
Македонија
Претседателката Сиљановска Давкова се сретна со генералниот секретар на Советот на Европа, Алан Берсе
Претседателката Гордана Сиљановска Давкова во рамки учеството на 79. Генерално Собрание на Обединетите Нации во Њујорк, оствари средба со генералниот секретар на Советот на Европа, Алан Берсе.
На средбата беа разменети мислења за целите и приоритетите насочени кон демократизацијата на македонското општество, човековите права и владеењето на правото. Реафирмирајќи ја посветеноста за натамошна конструктивна соработка со Советот на Европа, претседателката Сиљановска Давкова изрази задоволство од континураната поддршка за нашето целосно усогласување со европските стандарди и вредности.
Претседателката Сиљановска Давкова ја нагласи важноста од кредибилно постапување на Европската Унија во однос на интеграцијата на земјите од Западен Балкан кога напредокот на поединечните кандидати е евидентно заслужен. Таа се осврна и на неопходното обезбедување усогласеност со обврските што земјите-членки ги презеле, вклучително и правилното спроведување на пресудите на Судот во Стразбур.
Соговорниците разговараа и за актуелните безбедносни состојби во Европа, со акцент на војната во Украина, како и за потребата од посветеност и заеднички пристап кон сегашните и идните предизвици какви што се влијанието на новите технологии и климатските промени врз човечките ресурси.
На средбата претседателката Сиљановска Давкова упати честитки до новоизбраниот генерален секретар на Советот на Европа, Алан Берсе, изразувајќи искрени желби за успешно исполнување на важната мисија и продолжување на плодната соработка со македонските институции.