Општина Аеродром помошта од 5.000 денари за новороденче, наместо како социјален трансфер, во УЈП ги пријавува како авторски договор. Случајот во „Макфакс“ го пријави жител на Аеродром, кој на домашна адреса добил писмо во кое пишува дека Општината му префрлила пари по основ на договор за повремено вршење услуги. При пополнување на апликацијата за еднократната помош родителите тврдат дека не потпишале ваков договор ниту, пак, им било кажано дека парите во УЈП ќе бидат пријавени по овој основ.

„Нити сум потпишал авторски договор нити, пак, сум вршел некаква хонорарна работа за нив, па писмото ме збуни. Кога се обратив во Општината, ми кажаа: ‘Господине, тоа се парите што сте ги примиле за новороденче. Но, ние немаме законска основа да ги исплатиме така, па ги заведовме под таа ставка затоа што така нè подучија од УЈП. Ние на овој начин со години исплаќаме пари, сè е регуларно, нема за што да се грижите“, изјави родител за „Макфакс“.

Дека парите се исплатени како авторски договор, граѓаните дознаваат кога Општината ќе им испрати потврда за префрлените пари и платениот данок, која треба да ја приложат во УЈП

Исплатените пари за новороденче се со пресметан персонален данок од 556 денари, односно Општината ја намирила обврската кон УЈП. Но, сепак, спорно за корисниците на оваа услуга е што парите се пријавуваат по друг основ. „Макфакс“ побара одговор од надлежните служби во Општината, но од таму нема дециден одговор зошто парите се исплаќаат како за извршена услуга, туку само објаснување за персоналниот данок.

„Општина Аеродром со одлука на Советот исплаќа еднократна парична помош на новороденчиња и првачиња. Од таа причина, во согласност со Законот за персоналниот данок, односно актуелниот Закон за личниот доход, Општината е должна да пресмета и да исплати персонален данок на доход. Притоа, Општината издава потврди за исплата на персонален доход за кој е информирана и Управата за јавни приходи во согласност со нивната апликација. Конкретно, на барање за новороденче Општината исплаќа пет илјади денари, а во согласност со законската регулатива Општината го презема плаќањето на данокот за тие средства. При исплатата на овие средства не се прекршува ниту еден закон“, информираат од таму.

Инаку, кога родителите аплицираат за остварување на ова право, приложуваат извод од Матичната книга на родените за бебето, уверение од Книгата на венчаните или потврда за живот во вонбрачна заедница, копија од трансакциска сметка и пополнуваат барање со кое аплицираат за помош за првородено или втрородено дете. Притоа на родителите не им се кажува дека парите ќе бидат исплатени по овој основ и дали тие се согласни со начинот на исплата. Дека парите се исплатени како авторски договор, граѓаните дознаваат кога Општината ќе им испрати потврда за префрлените пари и платениот данок, која треба да ја приложат во УЈП.