Македонија
Паркирањето на Клинички ќе биде 50 денари, што за Таравари е добра цена, но вели дека договорот не е потпишан и ќе поништи ако јавноста е против

Секогаш ми значи мислењето на јавноста, договорот со албанската компанија за паркингот на Клинички центар не е потпишан и може да се поништи, рече денес министерот за здравство Арбен Таравари на промовирањето на обновениот кат на Инфективната клиника. Службите го известиле дека процедурата во Министерството е помината, но следува фаза во која компанијата треба да помине филтри во Владата.
„Сега има уште одредени филтри што треба да поминат во Владата, ако поминат – во ред, ако не поминат – пак ќе го објавиме конкурсот. Не е потпишано. Ако на јавноста не ѝ се допаѓа, јас сум за тоа да не го потпишам. Мислам дека на Клинички центар паркингот причинува огромна нервоза. Секогаш многу ми значи што ќе слушнам од јавноста. Ако ми кажат дека не е во ред нешто, пуштено е и во Владата, ако и таму ми кажат дека има одредени пропусти, немаме ништо. Ќе го поништиме, ќе го објавиме пак, само ќе изгубиме една година“, рече министерот Таравари.
Во документацијата била дефинирана и цената на паркирање, а Таравари уверува дека албанската компанија нема да го добие паркингот на 20 години, како што стои во физибилити-студијата, туку на најмногу 10 оти уште толку време министерот очекува Клиничкиот центар да остане на оваа локација. Токму кусиот период за стопанисување со паркингот Таравари смета дека бил причина што се пријавила само една фирма.
„Цените се 50 денари. На ‘Рамстор’ е 60 денари. Тука имавме паркирање автомобили, ги оставаа тука и потоа излегуваа во град. 50 денари јас мислам дека е пристојна цена за оваа територија. Еве пред ‘Нова Македонија’ е 40 денари за граѓани. 50 денари не е цена што е многу висока. Мислам дека цената не е лоша. Најдобро е 0 денари да биде, меѓутоа ако има таков понудувач да изгради плус 600 паркинг-места, би било идеално. Имаше аукција, тоа е цената што е дадена“, вели министерот Таравари.
Компанијата „Ѓока констракшн“ од Албанија, доколку министерот го потпише договорот, ќе има обврска по принцип на јавно-приватно партнерство да изгради две монтажни катни гаражи во Клиничкиот центар и да стопанисува со нив во период од, како што рече министерот денес, најмногу десет години. За возврат ќе ѝ дава на државата 1 отсто од годишниот приход.
За еден час паркирање сега на паркингот на Клинички центар се плаќа 30 денари. Со него стопанисува јавното претпријатие „Градски паркинг“.
Изградба на катни гаражи во Клиничкиот центар и решавање на паркирањето беше изборно ветување на секоја нова власт изминативе две децении, но место решение, пациентите со секоја нова смена на власта плаќаат сè поскап паркинг.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Потпишани договори за 40 научно – истражувачки проекти на универзитетите, научните институти и МАНУ

Министерството за образование и наука потпиша договори за финансирање на 40 научно-истражувачки проекти со државни факултети, научни институти и МАНУ.
Од нив, 15 проекти се од природно-математичките науки, инженерството и технологијата, медицинските и здравствените науки како и од земјоделските и ветеринарните науки.
Исто толку проекти се од општествените и хуманистичките науки.
За прв пат оваа година, се финансираат 10 проекти од областите кои со Стратегијата за паметна специјализација се утврдени дека имаат висок иновациски, истражувачки и економски потенцијал: паметното земјоделство и храна со повисока додадена вредност, ИКТ технологиите, електромашинската индустрија и одржливите материјали и паметни згради.
Проектите беа одбрани на јавен конкурс, вкупниот износ за финансирање по проект изнесува до 8 милиони денари, а истражувачките тимови треба да ги завршат до крајот на октомври 2026 година.
Министерската за образование и наука Весна Јаневска рече дека ова е трет конкурс по кој се одобруваат средства за финансирање на научно-истражувачки проекти, што јасно ја покажува насоката кон која сакаме да ја придвижиме државата.
„За оваа Влада науката е стратешки ресурс за развој. Затоа ги интензивираме вложувањата во научно-истражувачки проекти, врз основа на прецизни критериуми за селекција: поттикнуваме оригинални и иновативни идеи, поддржуваме млади истражувачи и меѓународно конкурентни и релевантни проекти. Наша цел е да создадеме услови за квалитетна наука која носи реални резултати и има потенцијал да го забрза општествено-економскиот развој на државата“, нагласи Јаневска.
Претходно, Министерството за образование и наука одобри и средства за пет научно-истражувачки проекти од посебен научен и јавен интерес кои се резултат на соработката помеѓу академскиот и бизнис секторот во рамки на паметната специјализација на државата, во вкупен износ од 30,4 милиони денари.
Минатата недела беа склучени договори со осум јавни научни установи за финансирање на научно-истражувачки проекти, во вкупен износ од 23,7 милиони денари.
Оваа година Министерството за образование и наука издвои буџет од 680 милиони денари за финансирање на наука, што е речиси двојно зголемување во споредба со Буџетот од 2024 година.
Македонија
Германски државјанин протеран од државата: на натпреварот Шкендија-Карабаг во Скопје веел знаме „Голема Албанија“

По извршена идентификација и поднесена кривична пријава, Основното јавно обвинителство Скопје по итна постапка процесуираше државјанин на Германија за кривично дело – Предизвикување омраза, раздор или нетрпеливост врз национална, расна, верска и друга дискриминаторска основа.
Против него беше поднесено обвинение, бидејќи на 5 август, непосредно пред фудбалскиот натпревар помеѓу ФК „Шкендија“ и ФК „Карабаг“ што се одигра на градскиот стадион во Скопје, со истакнување и веење знаме на „Голема Албанија“ и со натпис „Автохтона“, предизвикал чувство на омраза, раздор и нетрпеливост врз основа на етничка припадност. Тоа го забележале полициски службеници, кои го лишиле од слобода.
Врз основа на обезбедените докази во координација меѓу полицијата и надлежното обвинителство, Основниот кривичен суд Скопје веднаш изрече пресуда со која обвинетиот го огласи за виновен и го осуди на условна казна затвор од две години, која нема да се изврши доколку осудениот не стори ново кривично дело во следните 5 години.
Во исто време, бидејќи станува збор за странски државјанин, Судот донесе одлука да го протера и да му забрани влез во државава во следните пет години.
Од Обвинителството најавија дека тие и МВР продолжуваат да преземаат координирани активности за откривање и идентификување на сторители на кривични дела на ширење на омраза и нетрпеливост поврзани со спортски натпревари. Веднаш по идентификацијата на сторителите, тие ќе бидат процесуирани во согласност со надлежностите на јавното обвинителство.
Македонија
Одложени активности на отворено: Министерството за здравство со препораки поради најавите за високи температури

Министерството за здравство информира дека во согласност со најновата прогноза од Управата за хидрометеоролошки работи (УХМР) во периодот од 8 до 13 август 2025 година се очекува значително зголемување на дневните температури, кои во одделни региони може да достигнат до 39°C.
Поради тоа, потсетуваат на почитување на општите препораки за заштита на населението од високи температури:
„Престојувајте во затворени, разладени простории, особено во периодот од 11 до 17 часот;
Внесувајте доволно течности избегнувајќи алкохол и засладени пијалаци;
Носете лесна, светла облека и користете заштита за главата и за очите;
Избегнувајте физичка активност во најтоплите часови од денот;
Посветете внимание на децата, старите лица, лицата со хронични заболувања и на бремените жени – овие групи се особено чувствителни на високи температури;
Во случај на симптоми, како вртоглавица, главоболка, гадење или забрзан пулс, веднаш побарајте медицинска помош;
Одложете активности на отворено во најтоплиот дел од денот;
Обезбедете микроклиматски услови (разладени простории со температура до 25°C) на работното место и во домот“.
Министерството, како што велат, внимателно ја следи состојбата на дневна основа и ќе постапува во согласност со процените и потребите.