Со партерното уредување во насока на збогатување на туристичката понуда во општина Могила и Пелагонискиот Регион, како и регулирање на коритото на реката Црна, односно нејзината притока Шемница, со финансиска поддршка на Министерството за локална самоуправа ги завршивме проектните активности во општината во насока на подобрување на условите за живеење и за развој на руралниот туризам, рече министерот за локална самоуправа, Горан Милевски.

„Во општина Могила сме сведоци на уредување на кејот со кој се подобруваат условите за живеење на овие жители и добиваат една нова содржина што може да ја користат за пешачење и рекреација, што е многу важно во овие услови на Ковид-19. Се надевам дека Општината и оваа година ќе предложи до нас суштински проекти. Апелирам да им помогаме што повеќе на нашите општини бидејќи и тие се соочуваат со економска криза и секоја помош е добредојдена, независно дали од меѓународните донатори, но се разбира и од средствата од разните институции на државно ниво“, рече министерот за локална самоуправа.

Носител на проектот во рамките на Програмата за рамномерен регионален развој за 2020 година е Центарот за развој на Пелагонискиот Плански Регион, а вкупната вредност на проектот изнесува 3.800.000 денари.

„Овој проект во континуитет се гради од 2015 година, меѓутоа во 2020 година, конечно, почнува да се уредува и кејот на реката Шемница. Средствата се аплицирани преку Пелагонискиот Плански Регион, а добиени преку Бирото за регионален развој и се инвестира во пешачка, бекатон-патека од 1.100 метри со тринаесет канделабри и дванаесет клупи за седење. Конечно, во Могила се доби еден урбан простор за рекреација наменет за сите групи на граѓани“, изјави градоначалничката на општина Могила, Јасмина Гулеска.