Македонија
Партиски лобирања за избор на нови членови на Антикорупциска комисија

Партиски лобирања и притисоци пред изборот на нови членови на Државната комисија за спречување на корупцијата (ДКСК) се случуваат непосредно пред изборот на кандидатите и додека во тек се интервјуата, дознава „Макфакс“. Според нашите извори, политичките партии имале свои фаворити од пријавените кандидати, па зад вратите на Собранието, каде што веќе трет ден течат интервјуата, се случуваат лобирања кој треба да биде избран и да влезе во новиот состав на Антикорупциската комисија.
Од ВМРО-ДПМНЕ наводно барале да има двајца членови во ДКСК на кои тие им даваат поддршка, но сè уште е неизвесно дали ќе имаат можност да лобираат за еден или за двајца. Свои кандидати бараат и СДСМ и ДУИ, а голема е веројатноста на чело на комисијата да застане жена.
Многу административци без конкретни одговори на прашања, искусни правници, луѓе во кои навистина се наѕира желба и волја да внесат видни промени во борбата против корупцијата, но и луѓе кои со себе влечат поврзаности со партиски структури досега ги поминаа интервјуата кои ги вршат Мухамед Зекири од СДСМ, Артан Груби од ДУИ, Зоран Илијоски од ВМРО-ДПМНЕ, Владанка Авировиќ од независната пратеничка група на ВМРО-ДПМНЕ од редовите на пратениците, а како претставници на невладиниот сектор во Советот за соработка на НВО со Владата се Сабина Факиќ и Бесим Небиу. По предлог на Народниот правобранител, член на комисијата е Драги Целевски, поранешен заменик-народен правобранител.
Во публиката присутни се и други пратеници, новинари, претставници од невладиниот сектор кои имаат право да поставуваат прашања.
Од вкупно 80 пријавени кандидати, 58 ја поминаа првичната селекција. Меѓу нив се Гоце Наумовски, професор на Правниот факултет и брат на Васко Наумовски, поранешен вицепремиер за евроинтеграции, Ангеле Илиевски, адвокат на Зоран Верушевски, Горан Митевски – ексдиректорот на УБК, обвинителот од случајот „Пуч“ Златко Биковски. Меѓу пријавените е и новинарот Горан Трпеноски, Софка Пејовска-Дојчиновска, поранешен генерален секретар во Антикорупциската комисија, Маја Малахова, поранешна судијка и претседателка на Државната комисија за жалби по јавни набавки, Тања Алтанџиева, поранешна членка на ДИК и многу други.
Неизвесно е кога јавноста ќе има можност да ги види интервјуата на собранискиот канал како што беше најавено, со оглед на тоа што интервјуирањето завршува утре попладне, а до вечерта или до четврток наутро седумчлената комисија ќе треба да предложи седум членови за новиот состав на ДКСК.
Изборот на кандидатите ќе покаже дали навистина овој процес на избор е со намера да се формира независно тело за борба против корупцијата или, пак, станува збор за фарса со цел повторно да се изберат кандидати зад кои стојат политички партии.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Богдановски: Теарце добива нов резервоар за вода, мултифункционални игралишта и подобрување на патната инфраструктура

Томислав Богдановски носител на советничката листа на ВМРО-ДПМНЕ, за Советот на Општина Теарце, на денешниот митинг во општина Теарце, кој е во рамки на кампањата за локалните избори, и истата се води под слоганот ,,Вистинскиот избор! Твојот човек! Твоето место! За твојата иднина“, истакна дека Општина Теарце заслужува подобри услови за живот. Тој додаде и дека ќе се вложува во патишта, осветлување, училишта, спорт, култура и туризам и како што вели тој, никој нема да биде заборавен.
„Стојам пред вас како млад човек, носител на советничката листа на ВМРО-ДПМНЕ за Општина Теарце. Стојам со чисто срце, со јасна визија и со безрезервна волја да ја вложам целата своја енергија за подобрување на животот на секој жител во оваа општина“ рече Богдановски.
Тој истакна дека Непроштено има реална потреба од ново училиште за учениците кои учат на македонски јазик, како и од подобрување на општата инфраструктура, спортските и рекреативните површини, осветлувањето.
„Мојата најголема сила не доаѓа од функцијата, туку од вас, граѓаните. Јас ќе бидам тој што ќе го даде својот придонес за Непроштено да живее достоинствено, онака како што заслужува. Непроштено заслужува реновирано спортско игралиште, рекреативно катче за најмалите, модерна инфраструктура“, истакна Богдановски.
Богдановски додаде дека Лешок заслужува пристоен животен стандард преку обезбедување чиста вода за пиење, подобрена инфраструктура и улично осветлување, уреден влез во селото и безбедни патишта
„Лешок не заслужува да биде само убаво име на хартија, туку и место кое ќе биде центар на туризмот во Полошкиот регион“, кажа Богдановски и додаде:
„Ние сме 7 села со седум срца кои чукаат заедно. Јас нема да ве гледам како гласачи, туку како соработници. Ќе бидам тука не само пред избори, туку секогаш кога ќе треба . Го познавам секое село, секој сокак, секој проблем и заедно ќе ги решаваме. Со поддршка од централната власт и Владата предводена од премиерот Христијан Мицкоски, знам дека ќе успееме“.
Македонија
Мицкоски: На овие избори изберете 9 за ВМРО-ДПМНЕ и коалицијата за напредок и развој на Македонија

На денешниот народен митинг во Брвеница во рамките на изборната кампања за локалните избори 2025 година со слоган „Вистинскиот избор! Твојот човек! Твоето место! За твојата иднина!“, обраќање имаше и претседателот на ВМРО-ДПМНЕ, Христијан Мицкоски при што потенцираше дека е убеден дека граѓаните во голем број ќе ја дадат довербата на ВМРО-ДПМНЕ и коалицијата и ќе гласаат за бројот 9 за да продолжи Македонија да се развива и гради.
Понатаму Мицкоски истакна дека на овие избори постојат две коалиции, едната СДС-ДУИ и Левица а другата опција е ВМРО-ДПМНЕ и коалицијата.
„Овие избори, се избори на коишто има две опции, едната опција е коалиција којашто е формирана на непринципиелен начин, коалиција којашто се обедини затоа што е гладна за власт едните за прв пат а другите да го повторат тоа што го правеа 7 години. Втората причина зошто тие се обединија е неподносливиот пандемиски гнев кон ВМРО-ДПМНЕ. Тоа е коалицијата којашто ја сочинуваат СДС, ДУИ и Левица. Тоа е коалицијата којашто ја формираа Венко Филипче Али Ахмети и Димитар Апасиев. Тоа е таа неформална коалиција. Тоа е коалицијата којашто живее од Македонија. И втората опција е коалицијата којашто ја предводи ВМРО-ДПМНЕ“ кажа Мицкоски.
Мицкоски потенцира дека првата коалиција е враќање назад и уназадување на Македонија а втората опција е ВМРО-ДПМНЕ за напредок и развој на државата.
„Ова се двете коалиција кои на овие избори имаат сосема различни концепти. Првата коалиција е коалиција којашто не враќа назад како оние 7 години кога се ограбуваше Македонија, кога се распродаваше македонскиот идентитет и кога се распродаваа Македонија, и втората опција е ВМРО-ДПМНЕ, за напредок и развој.
Мицкоски истакна дека политичката партија Левица кoja е во коалиција со СДС и ДУИ не извади кандидати од каде што доаѓаат нивните пратеници и претседател на партијата но затоа пак имаат кандидати во Струга, Тетово и Гостивар.
„Не извадија кандидати ниту во Штип од каде што доаѓа втората фигура во раководството на таа партија, но затоа извадија во Тетово, Гостивар и во Струга. Зошто? Само поради една причина, да можат да направат дисипација, раслојување на анти ДУИ гласовите. Тоа нема да им помине, народот не им верува“ истакна Мицкоски.
Мицкоски заклучи дека на овие избори огромен број граѓани ќе ја изберат втората опција тоа е опција на раст на развој на инвестиции, на план и визија за Македонија.
„Затоа од овде ве повикувам на 19 октомври да го заокружите бројот 9 и во првиот круг за ја завршиме работата“ заклучи Мицкоски.
Македонија
Илиевски: Приоритет за наредните четири години е градинка во село Челопек и дом за стари лица во Брвеница

Јовица Илиевски, кандидат за градоначалник за општина Брвеница од редовите на ВМРО- ДПМНЕ, на денешниот митинг одржан во рамките на изборната кампања за локалните избори 2025 година, под слоганот „Вистинскиот избор! Твојот човек! Твоето место! За твојата иднина!“ се обрати кон присутните истакнувајќи дека во изминатите четири години општина Брвеница покажа дека чесната, транспарентна и посветена работа резултираа со успех, со реализација на ветените проекти при што се осврна на истите.
„Реализиравме вкупно 125 проекти, извршивме комплетна реконструкција на повеќе училишта во нашата општина со термоизолациона фасада, внатрешно уредување, нови кровови, како и изградба на спортски терени со вештачка трева во сите населени места. Изградивме и уредивме рекреативни паркови во сите населени места. Отворивме нов бунар за водоснабдување со нова пумпа и куќиште, поставивме нови автобуски постојки, нова канализациона мрежа во целата општина, покриена е 90 проценти од патната инфраструктура во нашата општина“.
Илиевски во продолжение пред присутните ја претстави визијата и програмата кои ќе значат континуитет во изградбата на општина Брвеница во уште посовремена, економски успешна и развиена општина Брвеница во наредните четири години.
„Како број еден проект ја нагласувам изградбата на новата градинка во село Челопек, со капацитет од 50 корисници, со чија изградба ќе се обезбеди место за секое дете, особено за оние од социјално ранливите семејства, престојот ќе биде бесплатен. Развојот на индустриската зона „Брвеница“, ќе ја прошириме оваа зона за да донесеме уште повеќе инвестиции и да ја намалиме невработеноста. Нов проект за повеќе населени места кои имаат потреба од довршување на примарната и секундарната мрежа за отпадни води. Изградба на дом за стари лица во Брвеница со капацитет од 50 корисници. Планирани се и нови проекти во културата, спортот, животната средина, здравствената заштита и дигитализација на општината“, рече Илиевски.
На крај, Илиевски истакна дека работи за успех на општина Брвеница, со јасна визија и јасен став во насока на подобрување на животот на сите граѓани без разлика на вера или етничка припадност.