Македонија
Пациентите со тешки повреди на рехабилитација ќе одат во странство, веќе има понуди од неколку западноевропски држави, вели Таравари

Од 115 пациенти повредени во пожарот, кои се лекуваат во странство, денес во земјата се враќа еден пациент, кој се лекуваше во Белград. Министерот за здравство, Арбен Тараври, вели дека тој ќе го продолжи лекувањето кај нас.
„Пациентот е во добра општа состојба. Како што кажавме вчера, тој 24 часа минимум треба да престојува на една од клиниките. Ќе биде направена тријажа и потоа ќе биде сместен на една од клиниките во Клиничкиот центар“, рече министерот Таравари.
Од пациентите што се лекуваат надвор од земјата се уште четворица – петмина, како што нагласи министерот Таравари, сѐ уште се во посериозна состојба, кај некои имало и влошување на состојбата, но тој уверува дека здравствените работници даваат максимум за да им помогнат да го поминат овој тежок период.
Рехабилитацијата за пациентите што се во потешка состојба, која се очекува да биде подолготрајна, ќе биде во странски болници.
„Веќе имаме понуди од неколку западноевропски држави за подолгорочна рехабилитација на потешките пациенти, кои по неколку недели, ќе се вратат во Македонија. За оние што се потешки и кај кои треба подолгорочна и попрофесионална рехабилитација веќе изразуваат подготвеност. Во следните денови ќе известиме и каде може да бидат сместени тие пациенти доколку има потреба за подолготрајна рехабилитација. Од оние што се во потешка состојба сигурно некои ќе имаат и таква потреба“, вели министерот Таравари.
Во болниците во Скопје во моментот се лекуваат 39 пациенти. 12 од нив се на Клиничкиот центар, 10 пациенти се во старата Градска болница, 10 во ГОБ „8 Септември“. Во приватните клиники се седуммина пациенти.
Министерот Таравари рече дека добрата вест за денес е тоа што од болница излегуваат 12 пациенти, па на лекување во скопските болници ќе останат 27 повредени во пожарот во Кочани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Без вода делови од Центар и Аеродром

Од ЈП Водовод и Канализација известуваат дека денеска поради уличен дефект на улицата Питу Гули бб, општина Центар (во близина на Тинекс), прекинато водоснабдување ќе имаат следниве улици: Питу Гули, дел од Загребска, Ганчо Хаџипанзов, Капештец, Димитар Пандилов, Караорман, висока зона Козле и Ловќенска-крак 1,3,5 и 7.
Водоснабдувањето ќе биде прекинато од 08:30 часот до завршување со санација на дефектот.
Денеска поради уличен дефект на 3-та Македонска Бригада бб, прекинато водоснабдување ќе имаат објектите на Вива, Метро, Центро, Спорт М и Форд, во општина Аеродром.
Водоснабдувањето ќе биде прекинато од 08:00 часот до завршување со санација на дефектот.
Македонија
Делови од Аеродром, Центар и Ѓорче Петров денеска без струја

Од ЕВН Македонија АД известуваат дека денеска без електрична енергија ќе останат:
· во периодот од 08.10 до 15.00 часот, корисниците на дел од село Долно Лисиче.(општина Аеродром)
· во периодот од 08.10 до 15.00 часот, корисниците на објектите спроти Ист Гејт населба Крњево.(општина Центар)
· во периодот од 08.10 до 12.00 часот, корисниците од улица Божидар Рајковиќ, дел од ул. Горноврановска и дел од улицата Горно Лисиче (општина Аеродром)
· во периодот од 08.10 до 16.00 часот, корисниците на улиците Ибе Паликуќа, Воин Драшкоци, Веле Марков (општина Ѓорче Петров)
Македонија
Претежно облачно со повремен дожд

Времето денеска ќе биде променливо облачно со повремени локални врнежи од дожд. Кон крајот на денот врнежите насекаде ќе престанат. Ќе дува умерен до засилен ветер од северен правец (локално над 60 km/h). Минималната температура ќе биде во интервал од 6 до 13, а максималната ќе достигне од 8 до 16 степени.
Во Скопје, претежно облачно со повремен дожд. Ќе дува умерен, во делови од котлината повремено засилен ветер од северен правец. Минималната температура ќе се спушти до 12, а максималната ќе достигне до 14 степени.
Времето во наредните денови
Од четврток времето ќе биде стабилно и суво со слаб до умерен северен ветер. Дневната температура ќе биде во пораст.